STORI BLONG FRAN PEJ | HEM I HAREM NOGUD YET FROM DED
?I Rong Blong Krae?
?Samtaem yu bin kasem wan strong sik we i stap smoltaem nomo? Ating yu fogetem finis. Be yu no save fogetem, taem wan man we yu lavem hem i ded. Dokta Alan Wolfelt i talem long buk blong hem (Healing a Spouse’s Grieving Heart) se: “Yu no save winim fulwan soa we i stap long hat blong yu taem wan man we yu yu lavem hem i ded.” Hem i gohed se: “Be sloslo, taem ol manis mo yia oli pas mo ol fren oli givhan long yu, bambae soa ya i godaon.”
Yu traem tingbaot Ebraham. Baebol i talem se taem woman blong hem i ded, hem “i stap krae bigwan.” Tok ya “stap krae,” i soemaot se Ebraham i harem nogud blong longtaem.a Yu traem tingbaot Jekob tu. Hem i ting se wan wael anamol i kilim i ded pikinini blong hem Josef. Hem i “krae longtaem,” mo nating se ol famle blong hem oli traehad blong mekem hem i harem gud, be hem i gohed nomo blong krae. Plante yia biaen, Jekob i harem nogud yet from we i ting se Josef i ded.—Jenesis 23:2; 37:34, 35; 42:36; 45:28.
Ebraham i krae bigwan taem Sera i ded
Sem mak tede, plante we oli krae from wan famle we i ded, oli harem nogud longtaem. Yu traem ridim stori blong tufala ya:
Gael we i gat 60 yia, i talem se: “Long Julae 9, 2008, man blong mi Robet i ded long wan aksiden. Long moning, mitufala i mekem sem samting olsem ol narafala moning. Mitufala i dring ti, mo bifo we hem i aot blong go long wok, mitufala i holholem mitufala, kiskis, mo talem se, ‘Mi lavem yu.’ I mekem sikis yia nao we hem i ded, be soa i stap yet long hat blong mi. Mi no ting se mi save harem gud bakegen samtaem.”
Etien we i gat 84 yia, i talem se: “Bitim 18 yia finis, gudfala woman blong mi i ded. Be mi harem nogud yet, mo mi stap krae from hem. Taem mi luk wan samting we Jehova i wokem we i naes tumas, mi tingbaot olsem wanem bambae hem i glad sipos i luk samting ya.”
I stret nomo we yumi harem nogud longtaem from wan famle we i ded. Yumi wanwan i soemaot se yumi harem nogud long defdefren fasin. Taswe, yumi no save jajem narafala from fasin we hem i mekem taem hem i harem nogud. Mo tu, yumi wanwan i no mas jajem yumi bakegen, sipos yumi harem nogud bitim mak. ?Yumi save mekem wanem blong traem harem gud bakegen?
a Aesak we i pikinini blong Ebraham, hem tu i harem nogud longtaem. Haf ya long pej 12, “Yumi Folem Fasin Blong Bilif Blong Olgeta,” i talem se tri yia afta we Sera, mama blong Aesak, i ded, Aesak i stap harem nogud yet.—Jenesis 24:67.