?Baebol I Talem Wanem?
?God i ansa long prea blong hu?
YU TING SE HEM I ANSA LONG PREA BLONG . . .
Evri man
Sam man nomo
No hem i no ansa nating
SAMTING WE BAEBOL I TALEM
Jehova “i stap klosap long olgeta . . . we oli wantem tru blong hem i givhan long olgeta.”—Ol Sam 145:18.
NARAFALA SAMTING WE YUMI LANEM LONG BAEBOL
God i no lesin long prea blong ol man we oli agensem hem. (Aesea 1:15) Be oli save “stretem bisnes ya” taem oli jenisim ol fasin blong olgeta.—Aesea 1:18.
Blong God i ansa long ol prea, ol prea ya oli mas laenap wetem ol rul blong hem long Baebol.—1 Jon 5:14.
?I gat wan spesel fasin blong prea?
SAM MAN OLI TING SE oltaem oli mas nildaon, no oli benem hed blong olgeta, no oli holem han taem oli prea. ?Be wanem tingting blong yu?
SAMTING WE BAEBOL I TALEM
God i harem prea blong olgeta we oli “sidaon,” oli stanap, oli “bodaon,” no oli “nildaon.”(1 Kronikel 17:16; 2 Kronikel 30:27; Esra 10:1; Ol Wok 9:40) Hem i no talem se man i mas stanap no sidaon long wan spesel fasin taem i prea.
NARAFALA SAMTING WE YUMI LANEM LONG BAEBOL
God i lesin long prea blong ol man we tingting blong olgeta i stap daon.—Ol Sam 138:6.
Yu save prea long eni lanwis mo yu save prea long tingting blong yu nomo.—2 Kronikel 6:32, 33; Nehemaea 2:1-6.