Yumi Kam Naf Moa Blong Tij—Nao Yumi Makem Gud Ol Stampa Poen
1 Aposol Pol i talem long ol man Hibru se: “Yufala . . . i naf nao blong yufala i tij.” (Hib. 5:12) Tede, bigfala wok blong tijim ol man we Jisas i givim long yumi i kasem mak blong hem mo tok ya we Pol i talem bifo, i tru tede yet. Sipos yumi wantem kasem frut taem yumi tijim ol man, fastaem yumi mas kasem save long ol samting we yumi stap ridim. Antap bakegen, yumi mas save long ol stampa samting we yumi stap tijim long ol man. Nating se yumi ridim wan buk, wan japta no sam haf, be yumi mas luksave ol stampa poen blong hem.
2 Taem yumi mekem stadi wetem wan man long wan buk, yumi mas traehad blong faenem olsem wanem evri japta oli laenap wetem nem blong buk, from we nem ya nao i soemaot olgeta samting we i stap insaed long buk. Yumi mas givhan long ol studen blong oli luksave olsem wanem japta mo nem blong buk, tufala i joengud tugeta. Plante taem, wan japta i stap tokbaot wan haf blong stampa tok blong buk. Wan eksampel long buk Laef Foreva: Ol japta “Wok Tugeta Long Fasin Blong Lav” mo “Mekem Laef Blong Famle i Gud” bambae oli soemaot long ol man wanem samting oli mas mekem sipos oli wantem laef foreva long Paradaes long wol.
3 Insaed long wan japta, i gat sam smol stampa tok we i givhan long yumi blong makem gud ol stampa poen. Olgeta haf wanwan oli joengud wetem nem blong japta. Yufala i mas traehad blong luksave wanem poen insaed long wan haf i stret gud wetem stampa tok blong japta. Poen ya nao, bambae yufala i mas wok had blong putum long tingting blong ol man we oli stadi. Long buk Laef Foreva, pej 120, traem skelem gud smol stampa tok wetem ol haf 4 mo 5.
4 Sipos yumi yusum wan buk we i gat ol kwestin long hem, maet plante tok oli ansarem wan kwestin, no maet wan wod nomo. Yufala i mas tijim studen blong yufala blong hem i putum wan mak aninit long ol tok ya no maet long wod ya nomo we i stret. Rod ya i gud from plante samting. Fastaem, samting ya i save givhan long studen ya blong hem i ansa kwiktaem, we hem i no nid blong ridim bakegen ol tok blong wan haf. Sipos hem i putum mak aninit long sam tok nomo, bambae kwiktaem nomo hem i kasem save long ol poen we i stap long haf ya.
5 Ol tok we oli raetem long spesel fasin (italic) oli givhan bigwan long man ya we i stadi, mo tu long pablisa we i mekem stadi. Rod ya i mekem ol stampa poen blong wan haf no wan vas i kamaot long klia ples nomo. Taswe, yufala i mas traem faenem sipos studen ya i kasem save long ol tok ya we oli raetem long spesel fasin. Ol tok ya oli save halpem hem blong talemaot bilif blong hem long narafala man.
6 Ol rul ya oli stret tu long ol narafala wok blong tijim ol man: Taem yumi stap long Wajtaoa stadi no long buk-stadi, taem yumi mekem wan Baebol-stadi, no taem yumi stap tijim ol pikinini. Jisas i talem we yumi mas mekem ‘disaepol mo yumi mas tijim olgeta blong oli folem ol tok ya we hem i talem finis long yumi.’ (Mat. 28:19, 20) Sipos yumi lanem wei blong makem gud ol stampa poen, bambae yumi naf blong mekemgud wok ya we Jisas i givim long yumi.