Halpem Ol Man Blong Bilif Long Tok Blong God
1 Yumi laef i stap long wan taem we i had, taswe yumi nidim wan strong bilif. Plante man i no gat bilif, mo oli no hop se bambae long fyuja ol man oli save harem gud. Ol lida blong jyos mo blong politik oli mekem plante tok mo plante promes we oli gyaman nomo long ol man. From samting ya, plante taem tingting blong ol man i foldaon. Aposol Pol i tru taem hem i talem se: “I no olgeta man evriwan we oli bilif.” (2 Tes. 3:2) Be yumi gat bilif. Yumi trastem olgeta promes we God i mekem long Tok Blong Hem, yumi save se oli mas kamtru.
2 Yumi defren long ol narafala man, from we yumi gat bilif. Bilif blong yumi i pulum yumi blong mekem ol gudfala wok, from we ol wok ya oli save halpem yumi mo ol narafala tu, mo oli leftemap nem blong God. Bilif ya i kamaot from we yumi letem Baebol i gat paoa long laef blong yumi. Ol tru Kristin tede oli olsem wan famle long olgeta ples long wol, mo oli fren gud tugeta. Samting ya i soemaot olsem wanem Baebol i save gat paoa long laef blong yumi sipos yumi rili bilif we Baebol i kamaot long God.—2 Tim. 3:16.
Blong Wanem Yumi Mas Halpem Ol Man Blong Oli Bilif
3 Yumi mas halpem ol man blong oli bilif long Baebol, from we samting ya i save sevem laef blong ol. Yumi mas tingbaot samting ya long manis Maj. Hemia fastaem we bambae yumi givimaot buk Baebol—?Tok Blong God no Tok Blong ol Man long wok blong prij. Buk ya i save halpem ol man blong kasem save se Baebol i rili Tok Blong God. Buk ya i tokbaot mo i agensem sam tok we ol man oli mekem blong ripotem Baebol se hem i gyaman. Hem i givim gudfala ansa long sam kwestin, olsem: ?Baebol i agensem sayens, no no gat? ?Sam tok blong Baebol i agensem sam narafala tok blong hem? ?Ol store blong Baebol, oli kastom store nomo, no oli tru? ?Ol merikel we Baebol i tokbaot, oli rili kamtru, no no gat? ?Ol man blong save long ol olfala ston blong bifo, oli faenem we Baebol i talem trutok, no olsem wanem? Buk ya i soemaot klia we Baebol i kamaot long God nomo. Hem i storebaot ol profet tok blong Baebol we oltaem oli kamtru, mo hem i soemaot we i no gat sam tok blong Baebol we i agensem ol narafala tok blong hem: olgeta haf ya oli joen gud.
4 Ol tok blong Baebol oli waes tumas, oli save mekem ol man oli kam gud moa. From samting ya tu, yumi save se Baebol i kamaot long God. Yumi mas halpem ol man blong lanem trutok ya. Blong kasem mak ya, yumi mas tijim olgeta fastaem, nao oli save bilif long Baebol.
5 ?Bighaf blong yumi, olsem wanem sam man i halpem yumi blong bilif long Baebol? Wan Wetnes i kam long haos blong yumi blong mekem wan Baebol stadi wetem yumi evri wik. Ale, sipos yumi givim wan Baebol no wan buk long wan man, wok blong yumi blong mekem man ya i bilif, hem i no finis nao. Hem i stat nomo. Yumi harem gud taem wan pablisa i bin stadi wetem yumi. Taswe yumi wantem gobak kwiktaem blong toktok bakegen wetem ol man we i tekem wan buk. Yumi wantem statem wan Baebol stadi wetem olgeta long haos blong olgeta, blong mekem bilif blong olgeta i strong.
Nyufala Buk i Save Mekem Ol Man Oli Bilif
6 Sipos wan man i gat stret tingting, mo hem i wantem traem ol tok blong Baebol, man ya i mas luksave se Baebol i tru. Nyufala buk ya i gat plante pruf long hem blong halpem ol man ya, mo ol tok blong hem oli isi. Yumi laekem pulum ol narafala blong bilif se Baebol i kamaot long God, mo blong folem ol rul blong hem long laef blong olgeta. Bambae ol man we i mekem olsem oli save mekem prea wetem sam tok olsem: “Hae God, ol loa we yu tijim mifala long hem, mi mi laekem olgeta tumas. Oltaem yu yu laekem man tumas, plis yu sevem mi. Stampa blong ol tok blong yu, hem i trutok. Ol tingting blong yu oli stret nomo, mo bambae oli stap oltaem, gogo i no save finis.”—Sam 119:159, 160.
7 God i yusum Tok blong hem Baebol blong halpem gud ol man we oli askem hem blong bambae hem i sevem olgeta long taem blong “bigfala trabol.” (Mat. 24:21.) Bambae long manis Maj, yumi gat jans blong pulum ol man blong ridim mo stadi Baebol. Yumi save mekem olsem sipos yumi traehad blong givimaot buk Baebol—?Tok Blong God no Tok Blong ol Man? blong 130 VT.