‘Fasin Blong Holemtaet Long God i Karem Plante Blesing Long Man’
1 “Man we i rili holemtaet long God, bambae hem i kasem fulap blesing from.” (Prov. 28:20) Evri paenia oli save se promes ya blong God i tru nomo. Jeova, “God ya we i mekem ol man, we promes blong hem i no save foldaon,” hem i glad tumas taem hem i luk we ol man oli traehad blong holemtaet long hem. Ol man blong hem oli wok strong folem fasin blong hem, nao Hem i blesem olgeta. (1 Pita 4:19) Wan paenia we i laekem tumas fultaem minista wok i talem se: “glad we mi mi kasem i halpem mi blong winim ol trabol blong mi. Glad i mekem se taem mi mi gat trabol, be hem i no bitim mak.” Maet yu tu yu gat tingting olsem.
Help Blong Winim Ol Trabol
2 I impoten tumas we ol elda oli givhan long ol paenia we i mekem gud wok. Oli mas leftemap tingting blong olgeta oltaem. Sosaete i givhan bigwan long ol paenia, ale samting ya i karem plante frut. Ol paenia oli “hadwok moa” long ol narafala pablisa taswe yumi mas tinghae long olgeta.—2 Korin 11:23.
Yufala i Skelemgud Evri Samting
3 Tede, laef i defren, i no olsem long taem bifo. Hem i no isi nating. Taswe, i impoten tumas we yumi tingting gud long minista wok mo laef blong yumi. Samting ya i tru tumas long saed blong ol paenia from we oli gat wan program we i fulap gud mo oli gat plante samting blong mekem oltaem. ?Olsem wanem long yu? ?Yu yu mekem gud ol wok blong yu? ?Sipos yu gat pikinini, yu yu tektaem blong lesin mo tijim olgeta? Sam papa mama oli faenemaot sam gudfala rod blong givim ol samting we ol pikinini blong ol oli nidim. Be long semtaem, oli joen long wok blong fultaem paenia. Tru tumas, sipos yumi wantem mekem olsem, yumi mas skelem gud laef blong yumi wanwan mo yumi mas hadwok blong kasem mak ya.
4 Baebol i talem se king Esekaeas “i bin mekem plante gudfala samting we oli stret nomo long fes blong Jeova, God blong hem.” “Evri samting we hem i mekem oli kamaot long hat blong hem” taswe “ol man oli tokbaot tumas ol wok blong hem.” (2 Kron. 31:20, 21) Tede, i sem mak nomo, i no gat wan samting i jenis. Sipos yumi wantem gudnem long wok blong Jeova, yumi mas mekem olsem Esekaeas bifo. Maet las yia, yu yu sik no yu kasem sam trabol long saed blong mane. Ating tingting blong yu i foldaon, no yu yu harem nogud from we sam samting oli brokdaon. Be yufala i winim ol trabol ya from we yufala i trastem Jeova.
5 Sipos man i gat wan gudfala hat, samting ya i min se fasin lav nao i pusum hem blong mekem wok. Yu yu wan paenia from we yu wantem mekem moa wok blong leftemap nem blong Jeova. ?Yu rimemba yet olsem wanem yu kasem tingting ya? Fastaem, yu yu mekem stadi long Tok blong Jeova, biaen yu putum bilif blong yu long ol tok ya nao yu save gud long hem, ale yu yu gat tangkyu long ol samting we hem i mekem. ?Gudfala tingting we yu gat tede i kamtru olsem, no no gat? Sipos yufala i wantem holemtaet gudfala tingting ya long hat blong yufala, yufala i mas lukaot gud long ol filing mo ol tingting we oli go insaed long hed blong yufala. Yufala i no mas foget blong folem oltaem wan gud program blong stadi mo yufala i mas ridim Baebol wanwan.—Hib. 5:14; Prov. 4:23.
Soemaot Longfala Tingting Taem Yufala i ‘Planem Mo Wasem’ Wan Samting
6 Sipos i no isi blong prij long wan ples, no sipos yufala i mas fesem plante trabol, be yufala i no mas slak blong planem ol sid blong trutok mo blong wasem olgeta. Sipos yufala i gohed nomo blong mekem olsem, bambae Jeova i blesem yufala bigwan. (1 Korin 3:6-9) Sipos yufala i wantem kasem mak ya, yufala i mas yusum sam defren wei blong prij. Yufala i save folem gud ol nambawan advaes we Kingdom Wok Blong Yumi i givim long yumi.
7 Plante moa paenia oli traehad blong yusum evri rod blong talemaot trutok. Ol gudfala frut we oli kasem oli soemaot gud se fasin blong tekem evri jans blong prij i wok gud. ?I hadwok long yu blong statem sam Baebol-stadi? Wan sista i askem long wan woman we i stadi wetem hem sipos hem i save sam man we oli laekem blong stadi Baebol wetem hem. Sista ya i statem 4 Baebol-stadi wetem ol fren blong woman ya. Sista ya i statem wan narafala stadi bakegen. Hem i askem long woman we i stadi wetem hem blong talemaot long ol fren blong hem blong joen long stadi. Biaen long samting ya, hem i kasem 4 stadi bakegen. Rod ya i mekem se 2 stadi nomo i openem rod long 10 narafala, mo biaen, 46 man oli kam long trutok. ?Yu yu traem rod ya finis?
8 I no gat wan samting bakegen we i moa impoten i bitim minista wok we yufala i mekem. Pol i talem se i olsem se ‘ol gudfala samting we God i givim, mo yumi olsem ol graonpot nomo.’ Nating we sam brata sista oli no save joen long wok blong paenia, be oli glad nomo from we oli save se God bambae i blesem olgeta tu. God i glad long olgeta from “ol wok we oli mekem blong holemtaet long hem.” Olgeta ya oli gat tingting olsem from we oli save se oltaem Jeova i stap mekem i stret nomo, mo hem i no save fogetem ol wok ya we ol man blong hem oli mekem.—2 Korin 4:1-7; Hib. 6:10.