Talemaot Gud Nyus—Yumi Prea Plante
1 Aposol Pol i raetemdaon ol gudfala tok ya long ol man Filipae: “Mi save mekem evri samting, long paoa blong Kraes ya we i stap mekem mi mi strong.” (Fil. 4:13) Yumi tu, yumi mas trastem Jeova fulwan blong hem i givim paoa long yumi blong yumi talemaot gud nyus we yumi no fraet nating. ?Be yumi mas mekem wanem blong kasem mak ya?
2 Jisas i talem oltaem we ol man blong hem “oli mas stap prea strong, oli no save letem tingting blong olgeta i foldaon.” (Luk 18:1) Pol i talem se: “Oltaem yufala i mas stap prea.” (1 Tes. 5:17) Yes, paoa i kam long prea. Taem yumi talemaot gud nyus, yumi mas prea plante. Yumi save askem long God blong gat sam jans blong givim wetnes, blong gat fasin waes mo fasin luksave taem yumi prij long olgeta haos wanwan, mo blong tajem hat blong olgeta we oli stadi Baebol wetem yumi. Yumi mas hareap nomo blong talemaot gud nyus blong Kingdom bifo we en blong rabis wol ya i kam. Taswe yumi mas prea blong mekem se ol wok blong Kingdom oli kam bigwan moa long wol. (Mat. 24:14) Yumi mas stap ‘wekap’ long prea, blong mekem se yumi no hafhaf slip long saed blong speret. Sipos yumi mekem olsem, bambae yumi gat tangkyu oltaem long bigfala wok we Jeova i givim long yumi, se wok blong talemaot ol plan blong hem long ol man.—Kol. 4:2; wE 62 pej 544 mo 545.
LONG OL BAEBOL-STADI
3 ?From wanem yumi mas prea taem we yumi mekem wan Baebol-stadi? Sipos yumi prea bifo we yumi mekem wan stadi, bambae yumi gat gudfala tingting. Mo tu, samting ya i save halpem stadi blong yumi blong hem i luksave from wanem ol tok we bambae oli kamaot long taem blong stadi oli impoten tumas. Bambae stadi blong yumi i save fasin blong askem long Jeova blong hem i lidim hem. Yes, from eksampel blong yumi, bambae man ya tu i save prea.—Luk 11:1.
4 ?Wanem poen yumi save tokbaot long ol prea blong yumi taem we yumi lidim wan Baebol-stadi? Yumi faenem ol gudfala poen we i stap long nambawan prea we Jisas i givim long ol man blong hem mo long prea we Pol i mekem blong ol man Filipae. (Mat. 6:9-13; Fil. 1:9-11) I no nid we ol prea blong yumi oli longfala. Be yumi mas tokbaot sam poen we oli klia nomo. I impoten tumas we long ol tok we yumi talem long ol prea blong yumi, yumi yusum ol kaen tok we oli presem Jeova from ol wok blong hem we oli plante tumas mo oli gudwan tu. Yumi save leftemap bigfala paoa blong Jeova, hae rul blong hem mo ol gudfala fasin blong hem we oli stret gud. (Sam 145:3-5) Maet i gud blong talem nem blong stadi blong yumi long prea blong yumi. Yumi save talemaot long God ol trabol we hem i kasem mo askem long hem blong hem givhan long studen ya blong hem i gohed moa long saed blong speret. Nating se hem i oraet nomo long saed blong speret, yumi save askem long Jeova blong hem i blesem ol hadwok we man ya i stap mekem blong kam long ol miting mo blong talemaot long ol man ol trutok we hem i lanem finis. Be tu, yumi mas askem long Jeova blong hem i blesem wok blong prij long ful wol.
BLONG OL BRATA MO SISTA BLONG YUMI
5 Evri man blong Jeova oli man we oli joen wetem yumi blong mekem wok blong God. (1 Kor. 3:9) Taswe, sipos ol haeman blong wol oli traem blong blokem wok blong talemaot gud nyus, bambae yumi prea “from ol king, mo from ol narafala haeman.” ?Be blong wanem yumi mekem olsem? “Long fasin ya, bambae yumi gat kwaet laef, we i gat pis, we yumi save mekem ol fasin blong prea, mo yumi save folem ol stret fasin.” (1 Tim. 2:1, 2) Yes, rili ol prea we yumi mekem oli blong ol brata blong yumi long ful wol. Yumi prea blong mekem se ol haeman blong wol oli letem yumi mekem wok blong yumi.
6 Long prea, yumi save askem long God blong hem i givim paoa long ol brata blong yumi we oli prij long ol ples we i hadwok, mo blong hem i givhan long olgeta we oli no strong tumas long saed blong speret, blong mekem se oli joen moa long minista wok. (2 Tes. 3:1, 2) I gud tu blong prea from ol elda blong kongregesen, from ol elda we oli goraon mo from Hed-kampani—hemia ‘olgeta we oli wok strong long medel blong yumi.’—1 Tes. 5:12.
7 Oltaem nomo, yumi mas putum ol wari blong yumi long han blong Jeova. (Sam 55:22; 1 Pita 5:7) Yumi save se sipos yumi prea long Jeova blong askem wan samting we i stret gud long ol samting we hem i wantem, bambae hem i lesin long prea blong yumi. (1 Jon 5:14) From samting ya, taem yumi askem long Jeova blong hem i givhan long yumi blong kam gud moa long minista wok blong yumi, yumi mas trastem hem, se bambae hem i lesin long yumi mo i mekem yumi win.—2 Tim. 4:5.