Miting Blong Kingdom Wok Blong Janewari
Wik We i Stat Long Desemba 30
Singsing 12
10 menet: Lokol mesej mo ol Advaes long Kingdom Wok Blong Yumi.
20 menet: Tok long saed blong lokol nid.
15 menet: “Olgeta Man Oli Mas Save Se Seftaem Long Fulwol i Kolosap.” Afta long fastok, tokbaot trifala poen long fasin blong toktok mo mekem wan pleplei wetem wan pablisa we i rere gud fastaem sipos i gat taem. Sipos i oraet, i gud we wan yangfala i mekem pleplei long poen No. 2. Poen No. 3, pablisa i save ridim wan gudfala vas long Baebol long man blong haos blong hem i tingting long hem biaen. Enkarajem ol brata blong yusum ol fastok we i stap long pej 8 mo wan long trifala poen long fasin blong toktok.
Singsing 160 mo laswan prea.
Wik We i Stat Long Janewari 6
Singsing 151
5 menet: Lokol mesej.
10 menet: “Wan Gudfala Rod Blong Mekemrere Wok Blong Prij.” Toktok wetem kwestin mo ansa, storeyan wetem tri no fo pablisa we oli rere gud, tokbaot olsem wanem samting ya i givhan long olgeta. Eksampel, oli save tokbaot ol defren kaen rod blong toktok, olsem wanem blong yusum ol defren kaen fasin we i stret long teritori blong yufala, fasin we i no strong tumas, ol pablisa oli save jusum ol haf we oli ting se i gud blong yusum. Leftemap tingting blong ol pablisa blong tekem Kingdom Wok Blong Yumi wetem olgeta taem oli kam long miting blong prij.
18 menet: “Ol Fastok Blong Pulum Ol Man Blong Haos Oli Lesin.” Fastaem tokbaot teritori blong yufala. ?Wanem samting oli impoten long ol man blong haos? Tokbaot ol fastok mo ol tok we i save givim gudfala frut long ples blong yufala. Pablisa we i rere gud i soemaot olsem wanem blong seremaot buk ya Worldwide Security. Hem i mas yusum rod olsem we i stap long haf ya blong seremaot buk. Mo wan yangfala we i stap go long skul yet i mekem semkaen pleplei ya mo hem i givim magasin long man we i intres. Leftemap tingting blong evriwan blong yusum ol rod ya long wok blong prij.
12 menet: Wan Nyufala Kad Blong Haospetal. Sekretari i gat ol nyufala Kad Blong Haospetal blong givimaot long ol pablisa long kongregesen we oli baptaes finis mo yusum gud leta long Novemba 15, 1991, we i tokbaot ol pepa blong haospetal long ol pablisa we oli baptaes finis mo Identiti Kad long ol pikinini blong ol Wetnes blong Jeova we oli no tekem baptaes yet. Blong rere olsem, ridim bakegen leta blong Janewari 1, 1990, blong faenem ol gudfala poen we i stret long lokol nid. Makemaot se tufala wetnes we i saenem kad ya i mas luk se man i saenem nem blong hem bifo we tufala i saenem nem blong tufala. Soemaot from wanem oli mas folem gud ol tok blong mekem se kad ya i stret blong i save givhan long yumi.
Singsing 129 mo laswan prea.
Wik We i Stat Long Janewari 13
Singsing 49
10 menet: Lokol mesej mo Tiokratik Nyus. Ol ripot blong kaon mo leta blong talem tangkyu from mane we kongregesen i givim.
15 menet: ?Wok Blong Paenia i Blong Mi? ?Plante long yumi, wetem ol yangfala we oli finis long skul, yumi save mekem wok blong fultaem paenia? Storeyan wetem tri paenia, i gud sipos wan i yangfala, wan woman blong haos mo wan we i finis long wok from we hem i olfala. (Sipos fultaem paenia i no gat, yu save yusum ol haftaem paenia no ol pablisa we oli stap mekem paenia.) Tingbaot olsem wanem blong kasem mane. ?Wanem kaen haftaem wok we i gat long ples blong yufala? ?Olsem wanem wan man i save kasem inaf mane? ?Olsem wanem oli save jenisim fasin blong spenem mane blong oli gat i naf? Tingbaot ol program we oli save givhan blong oli kasem ol haoa blong olgeta. ?I gat sam we oli gat trabol long bodi blong olgeta? ?Olsem wanem oli winim? ?I gat ol narafala traem we olgeta oli winim finis? Storeyan ya i mas stret mo i mas leftemap tingting blong ol pablisa. Askem ol man we oli lesin blong tingbaot prapa laef blong olgeta blong luk sipos i gat rod blong oli save mekem fultaem paenia.
20 menet: Olsem Wanem Wan Papa No Wan Mama We i Stap Hem Wan i Save Givhan Long Ol Pikinini Blong Hem. Tokbaot smol mo biaen mekem wan pleplei wetem wan mama we i gat tu pikinini, olgeta oli rere blong mekem wok blong prij. Long ogenaesesen blong Jeova tede i gat plante famle we oli stap olgeta nomo wetem pikinini blong olgeta, i bitim bifo. Rod we mama mo bubu blong Timote tufala i folem blong tijim trutok long hem, i wan gudfala eksampel long ol papa mama blong folem. (2 Tim. 1:5; 3:14, 15) Mekem wan pleplei: Wan mama, wan pikinini gel we i gat bitim 13 yia, wan yangfala gel, trifala i sidaon long tebel long kijin, mo trifala i jes finisim kakae blong olgeta. Mama i talem se bifo we oli wasem ol dis bambae oli mekemrere blong oli prij mo hem bambae i man blong haos. Pikinini gel we i yangfala moa i tekem wan fastok we i stap long pej 8 long Kingdom Wok Blong Yumi mo i yusum wetem mama blong hem. Mama i talem se hem i mekem wan gudfala wok mo i askem hem blong ridim vas long Baebol we Sosaete i givim. Pikinini gel ya we i yangfala moa, kwiktaem i ridim Aesea 9:6, 7. Biaen mama i askem pikinini gel we i olfala moa olsem wanem hem i save givimaot buk. Pikinini gel ya i jusum wan long ol tri poen long fasin blong toktok we i stap long pej 1 blong Kingdom Wok Blong Yumi mo i yusum wetem mama blong hem. Mama i talem tangkyu long hem mo i leftemap tingting blong tufala blong tufala i yusum ol fastok mo ol tok ya we i save statem storeyan mo seremaot buk long wok blong prij. Mama i talem long tufala pikinini gel blong hem blong tufala i mas lanem longtaem lelebet, biaen tufala i jes wasem ol dis. Elda i finisim tok blong hem mo i leftemap tingting blong ol famle long kongregesen blong oli givhan long ol pikinini blong olgeta.
Singsing 183 mo laswan prea.
Wik We i Stat Long Janewari 20
Singsing 191
15 menet: Elda i talem ol mesej mo i tokbaot ol lokol nid. Sipos i gat taem, hem i save tokbaot ol poen we oli kamaot long ol magasin we oli jes kam. I gud blong jusum wan haf we i laenap gud wetem ol fastok no ol tok we oli kamaot long Kingdom Wok Blong Yumi naoia. Mo i save mekem pleplei: Wan pablisa we i rere gud i yusum ful stampa tok blong prij, mo ol fastok wetem ol tok we i stap long Kingdom Wok Blong Yumi, afta, hem i soemaot ol magasin long man ya we i intres.
18 menet: “Akseptem Ol Responsabiliti Blong Mekem Ol Visit.” Toktok wetem ol kwestin mo ansa. Leftemap tingting blong evriwan blong oli joen long wok ya blong mekem ol visit. Leftemap tingting blong olgeta blong oli kambak nekis wik from we long miting blong Kingdom Wok Blong Yumi bambae yumi tokbaot moa long saed blong mekem visit.
12 menet: Tok long saed long fasin blong “Kilim Pikinini Long Bel” we i kamaot long Reasoning buk, pej 25 mo 26 (Engglis) mo pej 39-41 (Franis). Afta long wan sot fastok long haf ya, soemaot olsem wanem hemia wan trabol we ol man oli gat long wol tede. Wan pleplei: Wan sista i mekem Baebol stadi wetem narafala woman. Studen i talem long sista se hem i wari from hem i gat bel. Hem i eksplenem olsem wanem hem i wari, from we naoia famle i faenem i had blong kasem mane. Ol famle blong hem long wol oli pusum hem blong hem i kilim pikinini we i stap long bel blong hem kwiktaem. Sista i yusum Reasoning buk wetem hem blong faenemaot ol vas long Baebol blong luk tingting blong Jeova long laef blong wan pikinini we i no bon yet mo blong luk sipos Jeova i agri long fasin blong kilim pikinini long bel. Fastaem tufala i tokbaot mining blong tok ya kilim pikinini long bel. Biaen tufala i storeyan long ol kwestin, ol vas long Baebol, mo ol narafala tok we i stap long pej 25 mo 26 (40 mo 41). Sista ya i mas givhan long studen ya blong i luksave se laef i wan tabu samting.
Singsing 183 mo laswan prea.
Wik We i Stat Long Janewari 27
Singsing 92
10 menet: Ol lokol mesej. Leftemap tingting blong ol pablisa blong mekem ol plan naoia blong mekem haftaem paenia long Maj mo Epril. Leftemap tingting blong ol famle, mo ol yangfala pablisa, blong mekem plan blong oli joen moa long wok blong prij.
20 menet: “?Bambae Yu Talem Wanem Taem Yu Gobak?” Toktok wetem kwestin mo ansa long ol man we oli lesin mo mekem sam pleplei we ol pablisa oli yusum ol haf we yu tokbaot. Yu mas rere long ol pleplei ya fastaem.
15 menet: “Fasin Blong Givim Mane Long Narafala Kristin.” Elda i mekem tok ya we i kamaot long Wajtaoa (Engglis mo Franis) Oktoba 15, 1991, pej 25-28.
Singsing 167 mo laswan prea.