“Yufala i Mas Stap Mekem Samting Ya Blong Tingbaot Mi Bakegen”
1 Jisas i talem long ol man blong hem blong mekem lafet blong tingbaot ded blong hem. (Luk 22:19) Lafet ya i blong mekem olgeta oli tingbaot bigfala sakrafaes we Jisas i mekem blong sevem olgeta man. Long yia ya ol Wetnes blong Jeova long olgeta ples long wol bambae oli mekem lafet blong tingbaot ded blong Kraes long Fraede, Epril 17 afta we san i godaon finis.
2 Mekemrere From: ?Olsem wanem yumi save mekemrere long wan lafet we i stret blong tingbaot impoten taem ya? Yumi save tingting bakegen long laef mo minista wok blong Jisas taem hem i stap long wol. Hem i kam Man Blong Sevem ol man taem hem i givim gudfala laef ya blong hem olsem wan sakrafaes. (Mat. 20:28) Blong givhan long yumi blong luksave samting ya, i gud blong ridim buk ya Man We i Hae Moa Long Ol Narafala Man, japta 112 go kasem 116.
3 Bifo long taem blong Memoriol long yia ya Baebol riding blong yumi i stap long Kalenda 1992 blong ol Wetnes blong Jeova, ol vas oli kamaot long buk blong Mak. Spesel Baebol riding ya i stat long Sande Epril 12 go kasem Fraede 17. Bambae yumi wantem tekem taem blong tingting dip long ol sad taem ya.
4 Ol Elda Oli Mekemrere Gud: Meksua se i gat ol kad blong invaetem ol man. ?I gat naf ples blong sidaon long taem blong Memoriol? Long ples we tu no tri kongregesen oli stap yusum wan Haos-Kingdom, ol elda oli mas mekem plan blong evri kongregesen oli save gat inaf taem blong mekem Memoriol. Oli mas askem ol man blong mekem wok blong welkam. Bambae oli rere blong tekem ol nyufala man i kam insaed. Oli mas jusum wan man we i gat gudhan blong toktok blong i givim tok we i klia mo i stanap long Baebol. Jusum ol elda no ol man blong givhan blong oli pasem bred mo waen. Oli mas mekemrere bred we i no gat is long hem mo wan red waen. Blong talem bakegen, lukluk Wajtaoa long Febuwari 15, 1985 long pej 19 (Engglis), pej 17 (Franis).
5 Taem yumi mekemrere gud fastaem, samting ya bambae i soemaot se yumi luksave mining blong spesel taem ya mo yumi wantem mekem lafet ya blong tingbaot ded blong Jisas olsem we Jisas i talem.—1 Kor. 11:23-26.
[Bokis blong pija long pej 3]
1. ?Evriwan, wetem man blong givim tok oli save stret taem mo ples blong mekem lafet ya? ?Man blong givim tok i gat transpot?
2. ?I gat plan finis blong mekemrere bred mo waen?
3. ?Yu mekemrere finis se wan man bambae i tekem wan kaliko blong tebel we i klin mo hamas glas mo plet blong yusum?
4. ?Wanem plan blong klinim Haos-Kingdom bifo Memoriol mo afta Memoriol sipos wan narafala kongregesen bambae i yusum Haos-Kingdom ya?
5. ?I gat man blong mekem wok blong welkam mo blong pasem bred mo waen? I gat plan blong mekem miting wetem olgeta bifo we oli mekem wok blong olgeta long taem blong Memoriol? ?Wetaem? ?Wanem plan bambae oli folem blong meksua se oli mekem gudfala wok?
6. ?I gat plan finis blong givhan long olfala mo ol brata sista we oli no strong? ?I gat plan finis blong givim bred mo waen long olgeta we tabu speret i makemaot we maet oli stap long haospetal no oli no save kam long Haos-Kingdom?