Talemaot Ol Fasin Blong Jeova
1 “Yufala i talemaot ol fasin blong hem long ol laen blong man. Yufala i talemaot samting ya: se ol man oli mas leftemap nem blong hem . . . , from we hem i mekem ol samting long fasin we i nambawan tumas.” (Aes. 12:4, 5) ?Wanem tingting blong yu long tok ya? Taem yumi tingting long ol fasin we Jeova i stap mekem long ol man mo long yumi wanwan, ?olsem wanem, samting ya i pusum yumi blong tokbaot hem long ol narafala man? Long 73 yia nao i pas, Jeova i mekem ol man blong hem oli fri finis long Babilon. Stat long 1919 trufala wosip i stanap strong mo i stap go long olgeta ples long wol. Jeova i naf blong mekem ol samting ya we yumi sapraes from. ?Olsem wanem, yumi wanwan i soemaot fasin tangkyu long God from we hem i stap lidim yumi, i protektem yumi, mo i blesem yumi? ?Yu save gohed moa blong talemaot ol fasin blong hem mo leftemap nem blong hem?
2 Taem blong Memoriol i mekem yumi tingbaot wok blong God we yumi save glad oltaem from. Manis Epril bambae i wan spesel taem long yumi blong soemaot fasin tangkyu long Jeova taem yumi putum nem blong yumi blong mekem haftaem paenia. Mo tu, sipos yu mekem wok blong haftaem paenia long taem we seket elda i mekem visit, bambae yu kasem ol gudfala samting long hem mo hem bambae i leftemap tingting blong yu long wok ya.
3 Plante taem, plan i save wok gud taem ol grup blong ol pablisa oli putum nem blong olgeta blong mekem haftaem paenia. Wan gudfala program i save mekem se evriwan i gat man blong wok wetem. Mo ol sista we oli gat ol pikinini oli save mekem plan blong givgivhan long olgeta. Plante pablisa oli faenemaot se i no hadwok blong kasem mak ya 60 haoa sipos oli gat gudfala plan. I min se oli mas spenem tu haoa long wan dei no 15 haoa long wan wik long wok blong prij. Sam haftaem paenia oli prij long wan haoa no tu haoa bifo we oli go long prapa wok blong olgeta mo oli gat moa taem blong prij long wiken.
4 Nating sipos yu no save mekem wok blong haftaem paenia, yu save mekem moa long wok blong prij. Mo tu, yu save givhan long olgeta long saed blong transpot no yu save wok wetem ol narafala we oli mekem paenia, olsemia nao bambae yu leftemap tingting blong olgeta. Evri samting we yumi mekem blong leftemap nem blong Jeova mo talemaot ol fasin blong hem bambae God i lukluk samting ya.—Mal. 3:16.