Talemaot Ol Gudgudfala Wok Blong Jeova
1. ?Wanem i pulum yumi blong talemaot ol gudgudfala wok blong Jeova?
1 “Yu yu hae we yu hae, mo yu gat olgeta paoa. Nem blong yu i hae, mo yu yu gud tumas. Yu yu king we yu rul long paoa blong yu. Olgeta samting long heven mo long wol oli blong yu nomo.” (1 Kron. 29:11) ?Lav mo tangkiu we yumi gat long Jeova i save gat paoa olsem wanem long yumi? Tufala fasin ya oli pulum yumi blong ‘talemaot ol gudgudfala wok blong hem. Hem i singaot yumi finis blong yumi aot long tudak, yumi kam long gudfala laet blong hem.’ (1 Pita 2:9) !Yumi no save stop blong tokbaot gudfala God blong yumi! Bambae yumi gat plante janis blong talemaot ol gudgudfala wok blong Jeova long ol manis Maj, Epril, mo Mei.
2. ?Wanem spesel wok we bambae yumi mekem blong talemaot Memoriol, mo hu olgeta we oli save joen long wok ya?
2 Spesel Wok Blong Talemaot Memoriol: Long Mande, Epril 2, bambae yumi tokbaot ol gudgudfala wok blong Jeova taem yumi mekem Lodsapa. Long Maj 17 kasem Epril 2, long olgeta ples long wol, bambae yumi seremaot wan spesel pepa blong askem ol man blong oli kam long Memoriol. Evriwan oli mas joen fulwan long wok ya. Hemia i wan janis blong ol niuwan we oli naf, oli stat blong talemaot gud nius. Sipos yu gat ol Baebol studen no ol pikinini we oli naf, yu mas go talemaot long ol elda.
3. ?Wanem samting we yumi save talem taem yumi singaot ol man blong oli kam long Memoriol?
3 Spesel wok ya bambae i sem mak wetem hemia we yumi mekem taem yumi talemaot Distrik asembli ya “!Klosap Nao Yumi Fri!” Ol kongregesen bambae oli kasem i naf pepa blong singaot ol man. Wanwan pablisa i save gat 50 pepa mo wanwan paenia i save kasem 150. Fastok blong yu i mas sot nomo. Maet yu talem se: “Hemia pepa blong singaot yu blong kam long wan impoten miting we i stap evri yia. Yu yu welkam blong kam. Pepa ya i tokbaot ol samting long saed blong miting ya.” Sipos man blong haos i gat sam kwestin, yu mas tekem taem blong ansa long olgeta. Blong givhan, yu save yusum haf blong Diksonari long buk ya Baebol Tijim, long pej 206, we i tokbaot Kakae Blong Masta. Long ol wiken, bambae yumi seremaot ol spesel pepa ya wantaem wetem ol niufala magasin. Makemdaon olgeta we oli intres, mo mekem plan blong gobak visitim olgeta.
4. ?Olsem wanem yumi save seremaot spesel pepa blong singaot ol man oli kam long Memoriol?
4 Sipos i gat rod, yumi wan i mas givim spesel pepa ya long ol wanwan man blong haos. Taswe, yumi mas makemdaon ol haos we i no gat man long olgeta mo mekem plan blong gobak long wan narafala taem. Sipos kongregesen i gat plante pepa i stap, yumi save lego wan pepa long haos we i no gat man long las wik bifo long Memoriol, be i no bifo long taem ya. Meksua se ol visit blong yu, ol Baebol stadi, famle, ol fren blong yu long wok, ol man we oli stap klosap long yu, mo ol narafala we yu yu save olgeta, oli kasem spesel pepa ya.
5. ?From wanem yumi mas stat naoia blong mekem plan from wok blong haftaem paenia?
5 Haftaem Paenia: ?Yu yu save mekem haftaem paenia long Maj, Epril, mo Mei, blong joen moa blong talemaot ol gudgudfala wok blong Jeova? Blong mekem olsem, i klia se yu mas jenisim sam samting long program blong yu. (Efes. 5:15-17) Yu save sua se sipos yu traehad blong mekem moa long wok blong Jeova, bambae yu kasem glad mo blesing we i kamaot long Hem. (Prov. 10:22) Yumi stap kam klosap long manis blong Memoriol, taswe yumi mas stat naoia blong mekem plan.—Prov. 21:5.
6. ?Wanem samting we yumi save lanem long stori blong wan olfala sista we i gat 90 yia blong hem, we i mekem haftaem paenia long las yia?
6 Long las yia, wan olfala sista we i gat 90 yia blong hem, i gat janis blong mekem haftaem paenia. Hem i talem se: “Mi mi laekem tumas blong wok long garen mo mi wantem stat blong planem ol kakae blong mi. Be mi kasem save se mi mas mekem ol samting we oli moa impoten fastaem. Mi mi wantem putum ol wok blong Kingdom long fasples long laef blong mi, taswe long Maj mi mekem wok blong haftaem paenia.” ?Olsem wanem? ?Sista ya i kasem blesing from traehad blong hem? Hem i talem se: “Mi harem se mi mi haf blong kongregesen mo hemia i mekem se mi kam klosap moa long Jeova.” ?Olsem wanem? ?Yumi save jekemgud wanem samting we i moa impoten long laef blong yumi mo jenisim sam samting olsem sista ya i mekem?
7. ?I hadwok blong mekem wok blong haftaem paenia?
7 I no had tumas blong kasem 50 aoa we ol haftaem paenia oli mas mekem long wan manis. Yu mas prea mo tingtinggud long ol wok we yu stap mekem evri dei. Biaen, yu mas mekem wan program blong ol tiokratik wok, mo raetemdaon program ya long kalenda blong yu. Yu nomo yu save gud wanem samting we yu yu naf blong mekem. Sipos yu stap siksik mo yu no gat paoa, maet evri dei yu save spenem tu aoa long wok blong prij. Sipos yu wok fultaem blong wan masta no yu go long skul, yu save mekem haftaem paenia sipos yu prij long evri sapa mo long ol wiken.
8. ?Wanem i givhan long wan hasban mo waef blong hem blong tufala i mekem wok blong haftaem paenia?
8 Plante famle oli joen tugeta blong mekem wok blong haftaem paenia. Long ol yia we oli pas finis, wan man mo waef blong hem tufala i fraet blong mekem wok blong haftaem paenia, from we tufala i luk se bambae tufala i no gat naf taem. ?Tufala i mekem wanem? Tufala i talem se: “Longtaem finis mitufala i wantem mekem wok ya tugeta. Ale mitufala i prea long Jeova blong i givhan long mitufala.” Tufala i mekem wan gudfala plan, ale tufala i naf blong kasem mak ya. Tufala i talem bakegen se: “Wok ya i nambawan. Mitufala i kasem plante blesing. Advaes we mitufala i save givim se, yufala i mas traem blong mekem wok ya. Mitufala i naf blong mekem, taswe yufala tu i save mekem.”
9. ?Wanem samting we yu save mekem long nekis famle stadi, blong rere from ol wok long ol spesel manis we oli stap kam?
9 ?Olsem wanem? ?Yu yu save makemaot smol taem long nekis famle stadi blong yufala, blong tokbaot olsem wanem yufala evriwan i save spenem moa taem long wok blong prij long ol manis we i stap kam? Nating sipos ful famle i no save mekem haftaem paenia, ating wan memba blong famle i save mekem wok ya mo ol narafala oli save givhan mo sapotem hem. Sipos famle blong yu i no save mekem olsem, yufala i save putum mak blong spenem moa taem long wok blong prij long ol spesel manis ya.
10. ?From wanem yumi mas tokbaot long ol narafala se yumi wantem mekem haftaem paenia long ol manis klosap long Memoriol?
10 Yumi Givgivhan Long Yumi: Taem yumi glad, ol narafala tu oli glad. Tokbaot long ol narafala se yu wantem mekem wok blong haftaem paenia. Hemia i save leftemap tingting blong olgeta blong oli joen long wok ya. Mo tu, olgeta we oli bin haftaem paenia bifo, oli save givim sam advaes we i givhan long yu blong jenisim sam samting long laef blong yu mo mekem wan program we bambae i halpem yu blong paenia. (Prov. 15:22) Sipos yu yu naf blong mekem wok blong haftaem paenia, i gud yu askem wan narafala pablisa, ating wan we ol samting long laef blong hem i sem mak long ol samting long laef blong yu, blong i joen wetem yu long gudfala wok ya.
11. ?Olsem wanem ol elda oli save pulum ol narafala blong oli glad blong mekem haftaem paenia long ol manis we i stap kam?
11 Plante elda oli mekem plan blong joen long spesel wok ya. (Hib. 13:7) !Hemia bambae i rili leftemap tingting blong kongregesen! Mo tu, taem ol elda oli stap storian wetem ol narafala, oli save pulum olgeta blong oli glad blong mekem wok ya. Samfala oli jes nidim blong harem ol toktok we i kaen mo i leftemap tingting blong olgeta, no sam gudfala advaes we i save pulum olgeta blong mekem wok blong haftaem paenia. Elda we i lukaot long wok blong prij bambae i mekem plan blong i save gat sam moa miting blong prij, nao evriwan oli save joen wetem ol grup blong go prij, maet afta we oli finis wok no skul. Ol elda oli save talemaot ol miting ya oltaem. Elda we i lukaot long wok blong prij i save meksua tu se i gat naf teritori blong prij wetem naf buk mo magasin.
12. ?Wanem samting we yumi save mekem sipos yumi no naf blong joen long wok blong haftaem paenia?
12 Nating sipos ol samting long laef blong yu i blokem yu blong yu no save mekem haftaem paenia, be yu save leftemap tingting blong olgeta we oli mekem wok ya, mo yumi save prea from olgeta. (Prov. 25:11; Kol. 4:12) Maet yu save mekem se yu prij wan moa dei evri wik, no yu prij moa aoa evritaem we yu go prij wetem ol narafala.
13. ?Wanem mak we Niukaledoni, Vanuatu, mo Walis mo Futuna oli mas traehad blong kasem? ?Olsem wanem kongregesen blong yu i save givhan blong kasem mak ya?
13 Bambae Yumi Traehad Blong Kasem 60 Haftaem Paenia Long Epril: Long Niukaledoni, namba blong ol haftaem paenia we i hae moa i bitim ol narafala yia hemia 323 long Epril 2000. Long Vanuatu, yumi kasem 59 long Maj 1997, mo long Walis, 17 long Maj 2003. Taswe, namba we i no strong tumas blong kasem long manis Epril, hemia 370 haftaem paenia long trifala kantri we Branj ofis i lukaot long olgeta: 300 long Niukaledoni, 60 long Vanuatu mo 10 long Walis. Yumi save kasem mak ya sipos 1 pablisa aot long evri 6 pablisa long wanwan kongregesen, oli joen long haftaem paenia. I tru, long sam kongregesen bambae i gat sam moa pablisa we oli save mekem wok blong paenia. I isi blong ol kongregesen oli kasem mak olsem. !Tingbaot glad we bambae kongregesen i kasem! !Mo hemia bambae i mekem wok blong prij i gohed gud moa long ples blong yu!
14. ?From wanem Epril i wan gudfala manis blong mekem haftaem paenia?
14 ?From wanem Epril i wan gudfala manis blong mekem wok blong haftaem paenia? Long stat blong manis ya, bambae i gat Memoriol, taswe biaen, bambae yumi gat plante janis blong visitim olgeta we oli bin joen long Memoriol. Bambae yumi seremaot ol magasin wetem tingting blong gobak luk ol man ya, givim buk ya Baebol Tijim long olgeta mo statem Baebol stadi. Taswe, sipos yumi mekem haftaem paenia long Epril, bambae yumi gat plante janis blong statem ol Baebol stadi. Long manis Epril, i gat faef Sande mo wan pablik holide. Bambae i isi long olgeta we oli wok long wan masta mo olgeta we oli skul, blong oli mekem wok blong haftaem paenia.
15. ?Taem ol manis blong Memoriol oli stap kam klosap, from wanem yumi mas wok wetem tingting ya se taem i sot?
15 Evri taem we Memoriol i pas, yumi stap kam klosap moa long en blong ol rabis fasin blong wol ya. I no gat plante taem i stap blong yumi talemaot gudfala God blong yumi long ol man. (1 Kor. 7:29) Taem Memoriol blong yia ya i pas finis, ol gudfala janis we yumi gat long taem ya blong presem Papa blong yumi long heven, bambae oli lus blong olwe. !I gud we yumi plan naoia blong mekem bes blong yumi blong talemaot ol gudgudfala wok blong Jeova long manis Maj, Epril, mo Mei!
[Bokis blong pija long pej 4]
?Yumi save gat 60 Haftaem Paenia Long Epril?
◼ Jekemgud ol samting we oli moa impoten long laef blong yu
◼ Joen tugeta olsem wan famle blong tokbaot ol mak we yufala i wantem kasem
◼ Tokbaot ol plan blong yu long ol narafala