Wan Gudfala Mak Blong Kasem Long Niufala Sevis Yia
1. ?Wanem mak we yumi save tingbaot blong kasem long niufala sevis yia?
1 Sipos yumi wantem gohed gud long saed blong spirit, yumi mas putum sam mak. ?Wanem mak we yu yu wantem kasem long niufala sevis yia? Wan nambawan mak hemia blong mekem wok blong haftaem paenia blong wan manis, no moa. Blong mekem gudfala wok ya, yu mas reregud fastaem. Taswe, naoia i gudfala taem blong mekem rere plan blong yumi. ?From wanem yumi mas tingbaot blong kasem mak ya blong kam haftaem paenia?
2. ?From wanem yumi mas tingbaot blong kasem mak ya blong kam haftaem paenia?
2 ?From Wanem i Gud Yumi Mekem Wok Blong Haftaem Paenia?: Taem yumi mekem wok blong haftaem paenia, yumi spenem moa taem long wok blong prij, mo samting ya i givhan long yumi blong “gohed moa” blong mekem Papa blong yumi long heven i glad. (1 Tes. 4:1) Taem yumi tingbaot olgeta samting we Jeova i mekem blong yumi, hat blong yumi i pusum yumi blong talemaot hem long ol narafala man. (Sam 34:1, 2) Jeova i luk ol samting we yumi lego blong yumi save mekem moa long wok blong prij, mo hem i gat tangkiu from ol samting ya. (Hib. 6:10) Taem yumi save se Jeova i glad long ol hadwok blong yumi, yumi kasem bigfala glad.—1 Kron. 29:9.
3, 4. ?Olsem wanem wok blong haftaem paenia i save givhan long yumi?
3 Plante taem, moa we yu gohed blong mekem wan wok, bambae wok ya i kam moa isi long yu, mo bambae yu glad moa long hem. Sipos yu spenem moa taem long wok blong prij, bambae yu no moa fraet blong toktok long ol man. I no longtaem bambae yu gat gudhan blong statem ol storian mo blong yusum Baebol. Taem yu gohed moa blong tokbaot bilif blong yu, bilif ya bambae i kam strong moa. Plante we oli no bin gat ol Baebol stadi bifo, oli bin statem wan stadi taem oli mekem wok blong haftaem paenia.
4 Wok blong haftaem paenia i save pusum yumi tu blong yumi wekap moa long saed blong spirit. Wan brata, we bifo i wan fultaem paenia, i luksave se hem i stap spenem tumas taem long wok blong kasem mane, ale hem i tekem desisen blong mekem wok blong haftaem paenia long wan manis. Brata ya i talem se: “!Mi mi sapraes olsem wanem mi kasem paoa long saed blong spirit long wan manis ya nomo! Mi tekem desisen blong gohed nomo blong mekem haftaem paenia, mo hemia i openem rod long mi blong mi kam fultaem paenia bakegen.”
5. ?Sipos yumi harem se yumi no naf, olsem wanem yumi save winim filing ya?
5 Winim Ol Traem: Maet samfala oli fraet blong putum nem blong olgeta blong kam haftaem paenia, from we oli harem se oli no gat gudhan long wok blong prij. Sipos yu ting se yu no save kam haftaem paenia from risen ya, Jeova i save givhan long yu, olsem we hem i bin givhan long Jeremaea. (Jer. 1:6-10) Nating se Moses i “no save toktok gud,” Jeova i yusum hem blong mekem samting we Hem i wantem. (Eks. 4:10-12) Sipos yu harem se yu no naf, askem long Jeova blong hem i givhan long yu blong no fraet.
6. ?Olsem wanem yumi save mekem wok blong haftaem paenia nating sipos yumi gat problem long helt blong yumi no yumi bisi tumas?
6 ?Olsem wanem? ?Yu yu fraet blong putum nem blong yu from we yu gat problem long saed blong helt no yu bisi tumas? Sipos yu yu stap siksik, yu save mekem wok blong haftaem paenia yet be yu no mas hareap tumas, yu mas traem faenem wan rod blong prij we i save mekem se i isi long yu. Sipos yu yu bisi tumas, ating yu save seftem sam wok we oli no impoten tumas oli go long wan narafala manis. Samfala we oli wok fultaem blong kasem mane, oli pemaot taem blong mekem wok blong haftaem paenia taem oli tekem wan no tu dei blong spel.—Kol. 4:5, NW.
7. ?From wanem i gud blong prea from wok ya blong haftaem paenia?
7 ?Olsem Wanem Blong Mekem?: Talemaot long prea se yu wantem mekem wok blong haftaem paenia. Askem long Jeova blong hem i blesem traehad blong yu blong mekem moa long wok blong prij. (Rom 12:11, 12) Hem i save givhan long yu blong mekem ol waes desisen taem yu wantem jenisim sam samting long program blong yu. (Jem. 1:5) Sipos yu no wantem mekem wok ya, askem long Jeova blong hem i givhan long yu blong yu faenem glad long wok blong prij.—Luk 10:1, 17.
8. ?Taem yu folem Ol Proveb 15:22, olsem wanem hemia i save givhan long yu blong kam haftaem paenia?
8 Tokbaot mak ya blong haftaem paenia wetem famle. (Prov. 15:22, NW) Maet wan memba blong famle i save mekem wok blong haftaem paenia mo ol narafala oli save sapotem hem. Tokbaot long ol narafala long kongregesen se yu wantem mekem wok blong haftaem paenia, speseli long olgeta ya we fasin blong laef blong olgeta i sem mak long hemia blong yu. Hemia i save mekem se plante moa bambae oli glad blong kam haftaem paenia.
9. ?Wanem ol manis we maet yu jusum blong mekem wok blong haftaem paenia?
9 Taem yu lukluk bakegen long program blong yu blong niufala sevis yia, ?yu ting se wetaem bambae yu naf blong kam wan haftaem paenia? Sipos yu wok fultaem no yu go long skul, yu save tingbaot ol manis we oli gat wan holide long olgeta, no oli gat faef Sarede no faef Sande. Olsem nao, manis Septemba, Disemba, Maj, mo Ogis oli gat faef Sarede mo faef Sande long olgeta. Manis Mei i gat faef Sarede, mo Jun i gat faef Sande long hem. Sipos yu stap siksik, tingbaot ol manis we i gat gudfala weta. Mo tu, yu save tingbaot blong mekem wok blong paenia long manis we seket elda i visitim kongregesen blong yu. Long taem we hem i visitim kongregesen, bambae yu gat narafala blesing ya blong joen long faswan haf blong miting we hem i mekem wetem ol fultaem paenia. Long nekis yia, Memoriol bambae i stap long Maj 22, taswe i gud blong mekem wok blong haftaem paenia long Maj, Eprel, mo Mei. Taem yu jusum finis wan manis no plante manis we yu wantem mekem wok blong haftaem paenia long olgeta, yu mas stat blong raetem wan program we bambae i givhan long yu blong kasem ol aoa blong yu.
10. ?Wanem samting we yu save mekem sipos yu no naf blong mekem wok blong haftaem paenia?
10 Sipos yu harem se yu no naf blong mekem wok blong haftaem paenia long niufala sevis yia, yu save gohed yet blong gat tingting blong paenia. Gohed blong mekem evri samting we yu yu naf blong mekem long wok blong prij, mo yu save sua se Jeova bambae i glad long traehad blong yu blong givim bes blong yu long hem. (Gal. 6:4) Sapotem olgeta we oli naf blong mekem wok blong haftaem paenia mo leftemap tingting blong olgeta. Ating yu save jenisim program blong yu, blong yu save joen wan moa dei evri wik blong prij wetem olgeta we oli paenia.
11. ?From wanem yumi mas gat tingting ya se taem i sot?
11 Ol man blong Jeova oli save se taem i sot. I gat wan wok we yumi mas finisim—hemia wok blong talemaot gud nius. Laef blong ol man i stap long denja, mo i gat smol taem nomo i stap. (1 Kor. 7:29-31) Lav we yumi gat long God mo long ol man bambae i pulum yumi blong mekem evri samting we yumi naf blong mekem long wok blong prij. Sipos yumi traehad mo yumi mekem gudfala plan, bambae yumi naf blong mekem wok blong haftaem paenia, maet long wan manis no long plante manis long niufala sevis yia. !Hemia i rili wan gudfala mak!