Rul Blong Evriwan, Ol Nyuwan Mo Olgeta We Oli Gat Ekspiryens Finis Long Minista Wok
1 Deved we i raetem Ol Sam i askem se: ‘O Jeova, ?wanem man i stret blong go prea long yu long haos tapolen blong yu? ?Wanem man i stret blong go mekem wosip long yu long Saeon, tabu hil ya blong yu?’ Wetem smol tok nomo Deved i givim ansa se: “Man we i stret blong mekem olsem, hemia man we i stap obei long yu long evri samting, mo oltaem i stap mekem ol samting we i stret, mo ol tok blong hem i tru.” (Ol Sam 15:1, 2) Ol rul ya oli no save jenis. Tede olgeta we oli kam blong wosip long Kristin kongregesen oli mas livim olgeta rabis fasin blong olgeta mo fasin blong drong. Long medel blong ol man blong Jeova i no gat ples blong ol man we oli mekem tumas toktok oltaem, oli save kros kwik, no we oli gat tu fes. Maet samfala oli stap longtaem finis no samfala oli nyuwan nomo, be yumi mas stap gohed strong blong holem ol gudfala fasin we i laenap wetem Tok blong God.—Gal. 5:19-21.
2 Plante nyuwan we naoia oli stap joen long ogenaesesen blong Jeova. I gat ol yangfala mo ol olfala we oli mas jenisim tingting blong olgeta blong mekem laef blong olgeta i laenap wetem ol rul blong God. Long Saot Amerika i gat wan boe we i no gruap wetem papa mama blong hem mo we i kasem sam problem long ol fasin blong hem. Long taem we hem i gat 18 yia, hem i stap tekem drag mo hem i bin spenem sam taem finis long kalabus, from we hem i stap stil blong sapotem hem blong tekem drag. Taem hem i stap gohed blong stadi Baebol, hem i stop blong joen wetem ol kampani blong hem blong bifo, faenem ol nyu fren long ol Wetnes blong Jeova, mo i givim laef blong hem i go long God.
3 Long sem fasin, yumi mas mekemap tingting blong yumi blong mekem ol samting we i save mekem God i glad long yumi long ol fasin blong yumi, “long trufala stret fasin mo fasin blong obei long hem oltaem.” (Efes. 4:24) Hemia i wan wok we yumi mas mekem blong “tekemaot ol olfala laef ya wetem ol fasin blong hem” mo blong “putum nyufala fasin blong laef we i kamaot from stret save” sipos yumi wantem stap insaed long ogenaesesen blong God we i olsem wan bigfala hil.—Kol. 3:9, 10.
4 Tok Blong God, i Gat Paoa: Tru long Baebol yumi save luk klia ol fasin blong Jeova we samting ya i save gat paoa long tingting blong yumi mo long ol samting we yumi stap mekem. (Rom 12:2) Tok blong hem i gat paoa blong jenisim tingting blong yumi mo i save klinim hat. (Hib. 4:12) Tok blong hem i tijim yumi we Jeova i wantem we laef blong yumi i klin mo i stret, save joen fulwan long minista wok, mo no mas gat tingting we yumi no kea nating long ol Kristin miting.
5 Long ol taem naoia we laef i had tumas, i gat plante samting we oli stap kam antap we oli save pulum wanwan Kristin blong brekem ol loa blong God. Maet fastaem wan Kristin i gat strong bilif, be sipos hem i kam slak long stadi wanwan, famle stadi, ol miting blong kongregesen, no moa tinghevi long minista wok,—Kristin olsem i save stap go longwe long fasin blong bilif, maet i save foldaon long nogud fasin. From samting ya Pol i raet long Timote se: ‘Oltaem yu mas lukaotgud long fasin blong yu, mo long ol tok we yu stap tijim ol man long hem’ mo, ‘Oltaem i gud yu stap tingbaot ol tok ya blong mi.’—1 Tim. 4:16; 2 Tim. 2:7.
6 Nating ol nyuwan we oli jes joen no olgeta we oli stap long sam yia finis we oli gat ekspiryens, yumi mas putum ol rul blong God long klia ples blong skelemgud fulwan minista wok blong yumi, mo holemstrong long hop blong yumi sipos yumi wantem kasem laef. (1 Pita 1:13-16) Hem i impoten tumas blong obei fulwan long ol stret rul blong God evridei.
7 Yu mas putum wan mak blong yu save goaot long wok blong prij long laswan manis blong sevis yia ya 1993. Mekemap tingting blong yu blong halpem ol narafala blong gru long fasin blong bilif mo blong karem frut long minista wok blong olgeta. (Rom 1:12) Putum tingting blong yu i stap long ol stret samting, tru long stadi wanwan oltaem, famle stadi, mo joen long ol miting. (Fil. 4:8) Fasin traehad blong yu blong mekem God i glad, taem yu mekem laef blong yu i laenap wetem ol rul blong hem, bambae i no blong nating nomo, bambae i mas karem frut.—Kol. 3:23, 24.