Gobak Blong Mekem Intres Long Baebol i Kam Bigwan Moa
1 Samtaem yumi mitim sam man long wok blong prij we oli soem intres long gud nyus, be oli bisi tumas, oli no save toktok wetem yumi long taem we yumi stap fored long olgeta. ?Yumi traem blong kambak bakegen long wan narafala taem blong serem mesej blong Kingdom wetem olgeta? No maet yumi bin gat wan gudfala toktok wetem wan man long haos blong hem, be hem i no karem wan buk. ?Yumi gobak blong toktok moa wetem hem long saed blong trutok?
2 Hem i impoten tumas blong kavremap gud ol teritori blong yumi, mo gobak long olgeta man we oli intres. ?Yumi stap gobak blong visitim ol man we oli karem buk mo magasin nomo? Sipos i olsem, yumi save mestem sam man we oli intres. Yumi no mas jajem ol man se, oli no nidim help long saed blong speret, from we oli no karem buk. (Lukluk Rom 14:4.) Maet afta long visit blong yumi, man blong haos i save stap tingbaot wanem we yumi bin talem, no ating hem i save gat fasin tangkyu from traehad blong yumi, we yumi go blong visitim hem. Maet hem i save intres moa, taem yumi gobak blong luk hem bakegen.
3 Taem yumi gobak blong luk man we i bisi tumas, maet yumi save talem se:
◼ “Mi glad blong luk yu bakegen. Lastaem taem mi kam ya, yumitu no save storeyan from we yu no gat taem. Mi luksave se yu wan man we yu bisi oltaem, taswe mi jes mekem wan sot visit nomo. Maet yu yu stap tingbaot gudfala helt blong yu mo blong olgeta we yu laekem olgeta tumas. Be, ?yu yu save se God i promes we bambae hem i mas finisim olgeta sik? ?Yu ting se hemia i wan nambawan promes? [Letem hem i ansa.] Lukluk poen ya we i stap long paragraf 4 long buklet ya ‘Look! I Am Making All Things New.’ ” Sipos i gat taem, ridim paragraf ya mo luk long ol vas long botom blong pej 4 we i tokbaot ol fasin we bambae i stap long nyufala wol ya. Sipos man blong haos i glad, yu save statem wan Baebol stadi wetem hem.
4 Taem yu gobak blong visitim wan man we hem i bin karem traket, yu save talem wan samting olsem:
◼ “Lastaem mi luk yu, yu bin karem wan kopi blong traket ya ?Hu i Rili Rulum Wol? Yu yu faenem i had blong agri we Setan i rulum wol ya? [Letem hem i ansa.] Lukluk long faswan paragraf ya long pej 6.” Ridim paragraf, afta yu save askem se: “?From wanem Setan i wantem gyaman long yumi?” Afta we man blong haos i ansa, lukluk wetem hem long paragraf 4 long pej 3. Yu save gohed wetem hem blong lukluk fulwan long traket ya, no maet yu wantem soemaot long hem buklet ya ?God i Rili Kea Long Yumi? mo lukluk long paragraf 8 long pej 13.
5 Hem i gat gud risen, blong gat wan positif tingting mo gobak long olgeta we oli intres, we yumi faenem long wok blong prij nating se oli soemaot smol intres nomo. Hem i impoten tumas blong kea long ol narafala, mo blong gat tingting we i pusum yumi blong halpem olgeta blong lanem trutok. Ogenaesesen blong Jeova i stap givim ol buk mo ol toktok we i save halpem yumi, blong mekem ol narafala oli save tingtinggud long ol nid blong olgeta long saed blong speret.—Mat. 5:3.
6 Sipos yu bin gat wan gudfala toktok wetem wan man we i soemaot smol intres nomo, yu no mas fogetem blong gobak blong mekem intres blong hem i gru moa. Maet yu save statem wan Baebol stadi, mo yu stap givhan long hem blong wokbaot long rod blong laef. Mifala i stap leftemap tingting blong yufala evriwan, blong gohed blong lukaotgud long wok ya, we i rod blong sevem laef.—1 Tim. 4:16.