Olsem Wanem Blong Wok Long Intres
1 Long wan diksonari yumi lanem se “wok” i minim mekemrere blong givhan long wan samting blong gru moa. Be tok ya i save min tu se yumi mas wok, lukaotgud, no stadi long wan samting blong mekem i gru moa. Mekem disaepol hem i wan impoten mak long minista wok blong yumi. (Mat. 28:19, 20.) Taswe, yumi mas traehad blong wok long intres we yumi faenem long wok blong prij.
2 Ol visit we yumi mekem bakegen mo bakegen oli gud blong givhan long ol man we hat blong olgeta i stret oli gru long speret. Ol visit we oli karem frut oli mas lidim yumi blong mekem wan Baebol stadi evri wik.
3 ?Olsem wanem, yu stap mekem visit nomo long ol man we oli soem bigfala intres? Yu no nidim blong livim wan buk blong mekem se yu mas gobak. Wan paenia we oltaem i no livim wan buk long ol man long fastaem we hem i storeyan wetem olgeta, hem i gobak blong visitim evriwan we oli frengud wetem hem. Wan gudfala storeyan we yu tokbaot wan tingting long vas blong Baebol, i givim wan stampa blong wan visit bakegen.
4 Yusum Ol Traket Blong Statem Ol Baebol Stadi Long Visit Bakegen: Ol defren kaen poen long ol traket blong yumi oli stret long taem blong yumi. Oli tokbaot nid blong kasem save long Baebol mo mekem i wok long laef.
Yu save talem se:
◼ “Lastaem yumi bin tokbaot sam risen blong trastem Baebol. ?Baebol i tokbaot wanem kaen fyuja?” Stat blong ridim long namba tu haf long pej 3 blong traket ya Laef Long Pis Blong Nyufala Wol. Ridim ol vas. Askem man blong haos wanem tingting blong hem long samting we yu stap ridim. Blong finisim yu save tokbaot poen aninit long stampa tok “Olsem Wanem Long Yu” long pej 5.
5 Long sem fasin, yu save yusum traket ya ?Olsem Wanem Long Ol Fren Blong Yumi We Oli Ded?
Maet yu save talem se:
◼ “Olsem we yumitu bin tokbaot smoltaem bifo, plante man oli lusum fasin blong trastem God. Eksampel, oli askem se, ‘Sipos God i gat olgeta paoa, ?from wanem hem i letem ol man oli ded?’ Traket ya i save halpem yu blong ansa long kwestin ya.” Pulum tingting long poen we i stat long haf fo pej 2. Askem wan kwestin afta long ol wanwan haf, mo ridim ol vas blong Baebol we oli stap. Sipos kongregesen blong yufala i gat finis sam nyufala buklet ya ?God i Rili Kea Long Yumi?, yu save yusum long sem fasin tu.
6 Gohed Long Stadi: Taem yu folem sam tingting we oli talem long ples ya, yu statem wan Baebol stadi. Blong mekem storeyan i gohed moa, long en blong visit blong yu askem man blong haos se: “?Yu yu luksave se yumi ansa long sam impoten kwestin long smoltaem nomo? Nekis wik yumi save spenem smoltaem moa blong tokbaot hop blong laef bakegen no wan narafala poen we yu intres long hem.” Yu save yusum wan long ol kwestin we oli stap long ol haf ya evritaem we yu mekem visit. Long wan taem we i stret, yu save jenisim i go long wan buklet no yu save statem Baebol stadi wetem Laef Foreva buk.
7 Yumi glad tumas taem yumi statem Baebol stadi wetem wan man we i rili lukaotem trutok !Blesing i save kamaot mo minista wok blong yumi i save karem frut taem yumi mekem ol advaes we oli givim long saed blong olsem wanem blong wok long intres we yumi faenem.