Mekem Tingting i Strong Blong Visitim Ol Man Bakegen
1 ?Yu yu laekem blong mekem ol visit? Plante pablisa oli laekem. Maet yu bin fraet fastaem, antap moa, taem yu gobak long ol man we oli bin soem smol intres nomo. Be, taem God blong yumi i mekem tingting blong yu i strong blong talemaot gud nyus mo blong mekem ol visit, bambae yu sapraes blong luk se wok ya i isi mo yu save kasem blesing from. (1 Tes. 2:2) ?Olsem wanem?
2 Fastaem, i gat wan impoten samting we i mekem se ol visit oli defren long faswan taem we yu prij long wan man. Taem yu mekem visit, yu save man ya smol finis, hem i no moa wan strenja. Kolosap oltaem, i isi moa blong storeyan wetem wan we yu save hem lelebet, i bitim we yu storeyan wetem wan strenja. Long saed blong ol blesing we yu save kasem taem yu joen long wok ya, ol visit oli save lidim yu blong statem ol Baebol stadi we oli gohed gud.
3 Taem yumi stap prij long olgeta haos wanwan, plante taem yumi faenem ol man we oli no intres bifo. ?From wanem yumi stap gobak long olgeta? Yumi save se laef blong ol man i stap jenis, mo se wan man we fastaem hem i no soem intres no maet hem i agens, hem i save soem intres long nekis taem we yumi kam. From samting ya, yumi mekemrere visit blong yumi mo yumi prea blong askem Jeova blong blesem yumi, olsem nao, maet samting we yumi talem bambae i pulum man blong haos blong lesin.
4 Taem yumi go long olgeta haos wanwan, yumi glad blong prij long ol man we bifo oli no soem intres nating. Taswe, yumi mas glad moa blong gobak long olgeta we oli soem intres long mesej blong Kingdom.—Wok 10:34, 35.
5 Plante blong yumi i stap long trutok from we wan pablisa i gat longfala tingting, nao hem i bin kam visitim yumi plante taem. Sipos i gat wan we i bin mekem olsem long yu, maet yu tingbaot se, ‘?Pablisa ya i tingting olsem wanem long mi fastaem? ?Mi mi bilif long mesej blong Kingdom kwiktaem, long faswan taem we mi harem? ?Maet i bin luk olsem se mi no intres?’ Yumi mas glad se pablisa ya i bin ting se yumi soem naf intres blong hem i mekem wan visit long yumi, mo yumi mas glad we ‘God [blong hem] i mekem tingting blong hem i strong’ blong visitim yumi bakegen, mo we hem i tijim yumi long trutok. (1 Tes. 2:2) ?Olsem wanem long ol wanwan man we oli soem intres fastaem, be biaen i luk olsem se oli no moa wantem toktok wetem yumi? Yumi mas holem wan positif tingting, olsem store ya we i kam biaen i soem.
6 Long eli moning, tu pablisa oli stap prij long rod. Tufala i faenem wan yangfala woman we hem i stap pusum wan pikinini long kat. Woman ya i karem wan magasin mo i askem tufala sista ya blong kam long haos blong hem long Sande we i kam. Tufala i kamtru long stret taem we oli bin putum finis, be woman ya i talem long tufala se hem i no gat taem blong toktok. Hem i promes se bambae hem i wet long tufala long nekis wik blong hem. Tufala sista ya oli no ting se bambae hem i holem promes blong hem, be taem tufala i gobak, woman ya i stap wet long tufala. Tufala i statem wan stadi wetem woman ya, mo hem i gohed kwiktaem nomo. Smoltaem biaen, hem i stat go long ol miting mo joen long wok blong prij. Naoia hem i baptaes finis.
7 Putum Faondesen Long Faswan Taem We Yumi Prij Long Wan Man: Plante taem, wan gudfala visit i dipen long faondesen we yumi putum long faswan taem we yumi prij long wan man. Lesingud long ol toktok blong hem. ?Yumi faenemaot wanem long ol toktok blong hem? ?Hem i gat wan skul finis? ?Hem i wari long ol problem long laef blong ol man? ?Hem i intres long sayens? histri? ol samting raonabaot long yumi we ol man oli stap spolem? Taem yu rere blong aot, yu save stanemap wan kwestin we i pulum tingting blong man ya, mo yu save promes blong tokbaot ansa we Baebol i givim taem yu kambak.
8 Eksampel, sipos man blong haos i glad long promes blong Baebol long saed blong paradaes long wol ya, maet i gud blong storeyan moa long saed ya. Jes bifo we yu aot, maet yu askem se: “?Olsem wanem yumi save sua se God bambae i mekem promes ya i kamtru?” Nao talem se: “Mi save kambak taem ol narafala memba blong famle oli stap tu, mo mi save soem long yufala, ansa we Baebol i givim long kwestin ya.”
9 Sipos man blong haos i no soem intres long wan spesel poen, yu save stanemap wan long ol kwestin we oli stap long las pej blong Kingdom Wok Blong Yumi, mo yu save yusum samting ya olsem stampa blong nekiswan storeyan blong yutufala.
10 Raetemdaon Ol Samting Long Stret Fasin: Pepa blong prij we yu raetemdaon ol samting long hem, i mas stret mo i mas gat plante save long hem. Raetem nem mo adres blong man blong haos taem yu jes aot long haos blong hem. Yu no mas raetemdaon haos we yu tingting nomo se i stret—jekem blong mekem sua se i stret. Eksplenem ol samting long saed blong man ya. Raetemdaon samting we yu bin tokbaot, ol vas we yu bin ridim, ol buk we yu livim, mo kwestin we bambae yu ansarem nekis taem. Raetem stret dei mo taem we yu bin faenem man ya, mo taem we yu bin talem long hem se bambae yu kambak. !Nao afta we yu raetemdaon ol samting ya, yu no mas lusum pepa ya! Putum i stapgud blong bambae yu save ridim bakegen biaen. Gohed blong tingbaot man ya mo olsem wanem bambae yu mekem visit long hem.
11 Savegud Ol Mak We Yu Wantem Kasem: Faswan samting, soem kaen fasin mo fasin fren. Olsemia, bambae yu mekem se man blong haos i no fraet. Soem se yu intres long hem wan, be yu no mas askem tumas kwestin. Long nekis visit, pulum tingting blong hem i gobak long kwestin we yu bin stanemap lastaem. Lesingud long tingting blong hem, mo talemaot trufala tangkyu from ol toktok blong hem. Nao soem long hem from wanem tingting blong Baebol i save wok long laef blong yumi. Traem soem wan poen we i joen wetem storeyan blong yutufala, long buk ya Save Blong Lidim Yu Long Laef We i No Save Finis. Tingbaot oltaem se bigfala mak we yu wantem kasem taem yu mekem ol visit, hemia blong traem statem wan Baebol stadi.
12 Ol stret tok long Save buk i pusum plante long yumi blong ‘mekem tingting blong yumi i strong,’ blong pulum ol Baebol studen oli kam long ol miting mo joen wetem ogenaesesen blong Jeova. Long ol yia we oli pas, yumi gat fasin blong stadi wetem man blong longtaem lelebet, bifo we yumi askem hem blong kam long ol miting. Be naoia, plante studen oli kam long ol miting taem oli jes stat blong stadi, mo samting ya i mekem se oli gohed kwik moa.
13 Wan hasban mo waef blong hem, tufala i tekem jans blong prij long wan man we i wok wetem tufala. Taem man ya i soem se hem i intres long trutok, tufala i askem hem sipos tufala i save stadi Baebol wetem hem tru long Save buk. Mo tu, oli talem long hem se hem i mas kam long ol miting, mo long ples ya, bambae hem i kasem ansa blong plante kwestin blong hem. Man ya i talem yes kwiktaem long stadi, mo antap long samting ya, hem i stadi tu taem long wan wik mo hem i kam long ol miting long Haos Kingdom.
14 Yusum Buklet ya ?Wanem Samting We God i Wantem Yumi Blong Mekem?: Long Distrik Asembli ya, “Ol Man Blong Talemaot Pis Blong God,” yumi kasem buklet ya ?Wanem Samting We God i Wantem Yumi Blong Mekem? Buklet ya i gud blong statem ol Baebol stadi wetem ol man we oli ona long God, nating se oli skulgud no no gat. Buklet ya i olsem wan ful kos blong stadi Baebol, we i tokbaot olgeta stampa tijing blong Baebol. Hem i wan nambawan tul blong givimaot save blong God. Hem i eksplenem trutok long fasin we i kliagud mo i isi blong kasem save long hem, mekem se evriwan long yumi i naf blong yusum buklet ya blong tijim ol narafala long ol samting we God i wantem. Ating plante pablisa bambae oli kasem blesing ya blong mekem wan Baebol stadi long buklet ya.
15 Samfala oli harem se oli no gat taem blong stadi long Save buk. Be maet oli glad blong mekem ol sot stadi long buklet ya Samting We God i Wantem. !Bambae oli haremgud tumas long ol samting we oli lanem! Afta we oli stadi long tu no tri pej nomo, bambae oli faenem ansa long ol kwestin we ol man oli bin tingbaot blong plante handred yia finis: ?God hem i hu? ?Setan hem i hu? ?Wanem stampa tingting blong God long saed blong wol ya? ?Wanem ya Kingdom blong God? ?Olsem wanem yu yu save faenem trufala skul? Buklet ya i talemaot trutok long isi fasin, be mesej blong hem i gat bigfala paoa. Long buklet ya, i gat sam stampa poen we ol elda oli tokbaot wetem olgeta we oli wantem tekem baptaes, mo hem i save kam olsem wan tul we yumi yusum blong lidim man i go long wan stadi we i dip moa long Save buk.
16 Blong askem wan visit blong stadi, yu save talem se: “?Yu yu save se long sam menet nomo, yu save kasem ansa blong wan impoten kwestin long Baebol?” Nao askem wan kwestin we i stap long fas haf blong wan long ol stadi long buklet ya. Eksampel, sipos yu stap mekem visit long wan olfala, yu save talem se: “Yumi save se Jisas i bin mekem ol sikman oli kamgud long taem bifo. Be long fyuja, ?bambae Jisas i mekem wanem long ol sikman? ol olfala? mo ol dedman?” Yumi faenem ansa blong ol kwestin ya long stadi 5. Wan man we i strong lelebet long skul blong hem, i save intres long kwestin ya: “?God i stap lesin long olgeta prea?” Ansa blong kwestin ya i stap long stadi 7. Ol famle oli wantem save se: “?God i wantem wanem long ol papa mama mo ol pikinini?” Bambae oli faenem ansa long stadi 8. Sam narafala kwestin hemia: “?Ol dedman oli save mekem trabol long ol man we oli laef?” we ansa blong hem i stap long stadi 11; “?From wanem i gat plante tumas skul we oli stap talem se oli Kristin?” we ansa blong hem i stap long stadi 13; mo “?Yumi mas mekem wanem blong kam wan fren blong God?” we ansa blong hem i stap long stadi 16.
17 Givhan Long Olgeta We Oli Toktok Narafala Lanwis: ?Olsem wanem long man we i toktok wan narafala lanwis? Sipos i gat rod, i moagud we hem i kasem tijing long lanwis we hem i savegud. (1 Kor. 14:9) Sipos i no gat wan pablisa long kongregesen we i toktok lanwis blong man ya, yumi save traem yusum buklet ya Samting We God i Wantem long tufala lanwis, blong stadi wetem man ya.
18 Wan pablisa we i toktok Engglis, i stat stadi wetem wan man we i toktok lanwis blong Vietnam, mo waef blong hem i toktok lanwis blong Taelan. Oli yusum ol buk mo Baebol long Engglis, lanwis blong Vietnam, mo lanwis blong Taelan, long stadi ya. Nating se fastaem i hadwok blong winim problem ya blong ol lanwis, pablisa i raetem se: “[Tufala ya] i gohed kwik long saed blong speret. Tufala i luk se tufala i mas kam long ol miting wetem tufala pikinini blong tufala, mo oli stap ridim Baebol evri naet olsem wan famle. Smol gel blong tufala we i gat sikis yia nomo, hem i gat wan Baebol stadi blong hem finis.”
19 Taem yumi stadi wetem ol man we oli toktok wan narafala lanwis, yumi mas toktok slou, talem ol tok long klia fasin, mo yusum ol isi tok. Be, no fogetem se, yumi mas soem respek long ol man we oli toktok narafala lanwis. Yumi no mas mekem long olgeta olsem we oli pikinini nomo.
20 Yusum ol naesfala pija long buklet ya Samting We God i Wantem. Sipos i tru se “wan pija i moagud bitim wan taosen wod,” ale bigfala namba blong pija long buklet ya bambae oli givim fulap save long ol man. Askem long man blong haos blong ridim ol vas long prapa Baebol blong hem. Sipos yu save mekem stadi ya long taem we wan memba blong famle i stap we hem i toktok Engglis mo i save tanem tok i go long lanwis blong man ya, samting ya bambae i givhan bigwan.—Lukluk Kingdom Wok Blong Yumi, Maj 1984, pej 8; Oktoba 1990, pej 7 mo 8.
21 Mekem Ol Visit Kwiktaem: ?Yu mas wet hamas dei bifo we yu visitim wan man bakegen? Sam pablisa oli gobak afta wan no tu dei nomo. !Samfala oli gobak long sem dei nomo, maet long aftenun! ?Oli kwik tumas blong gobak? I luk olsem se bighaf blong ol man oli glad nomo. Plante taem, pablisa nao i nidim blong gat tingting we i moa positif, mo mekem tingting blong hem i strong moa. Tingbaot store ya.
22 Wan dei, wan pablisa we i gat 13 yia i stap prij long ol haos wanwan, nao i luk tu woman oli stap wokbaot long rod. Hem i tingbaot we yumi bin kasem tok blong prij long olgeta man we yumi faenem olgeta, ale hem i go toktok wetem tufala woman ya. Tufala ya i soem intres long mesej blong Kingdom mo wanwan blong tufala i karem buk ya Save. Yangfala brata ya i askem adres blong tufala, hem i gobak tu dei biaen, mo i statem Baebol stadi wetem tufala evriwan.
23 Wan sista i stap folem fasin blong gobak long nekis wik afta we hem i prij long wan man. Be, wan no tu dei afta we hem i faenem man ya we i intres, hem i go luk hem blong givim wan magasin long saed blong samting we tufala i bin tokbaot. Hem i talem long man ya se: “Mi faenem magasin ya, mo mi ting se bambae yu glad blong ridim. Mi no gat taem blong toktok naoia, be bambae mi kambak long Wenesde aftenun olsem yumi mekem plan finis. ?Taem ya i stret long yu yet?”
24 Taem wan man i soem se hem i intres long trutok, yumi save sua se bambae samfala oli agensem hem. Sipos yumi gobak kwik, bambae yumi givhan long hem blong gat paoa blong winim fasin agens blong ol famle, ol gudfala fren, mo sam narafala.
25 Mekem Intres Blong Olgeta We Yumi Faenem Olgeta Long Ol Pablik Ples, i Gru: Plante long yumi i laekem blong prij long rod, long ol ples blong putum ol trak, long sevis bas, long ol bigfala stoa, long ol ples blong spel, mo sam narafala ples bakegen. Antap long fasin blong seremaot ol buk, yumi mas mekem intres blong man i gru. Blong mekem olsem, yumi mas traehad blong kasem nem, adres, mo traem kasem namba blong telefon tu, blong olgeta man we oli soem intres. I no hadwok tumas blong kasem ol save ya. Taem yu rere blong finisim storeyan blong yu wetem wan man, karemaot wan pepa mo pen long basket blong yu mo askem se: “?I gat wan rod blong yumi save gohed long storeyan ya?” Wan narafala fasin: “Mi mi wantem se yu ridim sam save we mi sua se bambae yu intres long hem. ?Mi save karem i kam long haos no ofis blong yu?” Wan brata i stap askem nomo se: “?Mi save toktok wetem yu long wanem telefon namba?” Hem i talem se long tri manis, i gat tri man nomo we oli no glad blong givim namba blong telefon blong olgeta long hem.
26 Yusum Telefon Blong Faenem Intres Mo Blong Mekem i Gru: Wan sista we hem i paenia, i yusum telefon blong toktok wetem ol man we oli stap long ol haos we i tabu blong go insaed long yad blong olgeta. Hem i yusum telefon blong mekem ol visit tu. Long faswan taem we hem i prij long wan man long telefon, hem i talem se: “Mi save se yu no save mi. Mi mi stap traehad blong toktok wetem olgeta man long eria blong yu, blong serem wan tingting blong Baebol wetem olgeta. Sipos yu gat smoltaem, mi glad blong ridim wan promes long yu we i stap long . . . ” Afta we hem i ridim vas ya, hem i talem se: “?Yu ting se i gud sipos yumi save luk wan taem olsem long fyuja? Mi mi glad we mi gat jans blong ridim vas ya long yu. Sipos yu yu glad tu, mi wantem telefon i kam long yu bakegen blong tokbaot wan narafala vas.”
27 Taem hem i mekem visit long telefon, hem i pulum tingting blong man blong haos i gobak long laswan storeyan, mo hem i talem se hem i glad blong ridim sam vas blong Baebol we oli soem wanem samting bambae i kamaot long wol taem i no moa gat ol rabis fasin. Nao hem i storeyan smol wetem man blong haos long saed blong Baebol. !Hem i bin storeyan wetem plante man long telefon, mo i gat 35 man we oli singaot hem i kam long haos blong olgeta, mo hem i statem seven Baebol stadi! ?I gat sam taem we i hadwok long yu blong mekem ol visit, from we rod i nogud, i gat hariken, no yu yu sik? Sipos i olsem, i gud blong toktok wetem ol visit long telefon.
28 Gobak Long Olgeta Long Ol Stoa We Oli Soem Intres: Taem yumi prij long ol stoa, yumi no seremaot ol magasin nomo. Plante man long stoa oli rili intres long trutok, mo yumi mas mekem intres ya i gru. Samtaem, maet yumi save storeyan wetem olgeta long Baebol no mekem wan stadi wetem olgeta, stret long stoa nomo. Sipos no, maet yu save mitim man ya we i intres long wan ples long medel dei, no long wan narafala taem we i gud long hem.
29 Wan elda we i stap goraon blong visitim ol kongregesen, i prij long masta blong wan smol stoa, mo i talem long hem se bambae hem i soem olsem wanem blong mekem Baebol stadi. Taem man ya i askem se storeyan ya bambae i tekem hamas taem, elda ya i talem se 15 menet nomo. Ale, masta blong stoa ya i putum wan saen long doa we i talem se: “Kambak long 20 menet.” Hem i karem tu jea i kam, mo tufala ya i storeyan long haf 1-5 long faswan japta blong Save buk. Man ya we hat blong hem i stret, i laekem tumas samting we hem i lanem, ale hem i go long Pablik Tok mo Wajtaoa Stadi long Sande biaen, mo hem i agri blong gohed blong stadi long wik we i kam.
30 Blong askem wan masta blong stoa blong stadi, maet yu talem se: “Bambae i tekem 15 menet nomo blong soem plan we mifala i folem blong mekem Baebol stadi. Sipos taem ya i stret long yu, mi mi glad blong soem samting ya long yu naoia.” Afta, yu no mas bitim taem ya we yu talem. Sipos i no gat rod blong storeyan longtaem long stoa, maet i moa gud blong go luk masta blong stoa long haos blong hem.
31 Gobak Nating Se Yu No Bin Livim Sam Buk: Evri taem we wan man i soem smol intres, yumi mas gobak, nating se yumi bin livim sam buk wetem hem no no gat. Sipos biaen i kam klia se man blong haos i no rili intres long mesej blong Kingdom, i moagud blong mekem ol narafala visit.
32 Long wok blong prij long ol haos wanwan, wan sista i faenem wan woman we hem i glad blong toktok wetem hem, be hem i talem stret se hem i no wantem ol magasin. Pablisa ya i raetem se: “Plante dei, mi gohed blong tingbaot woman ya mo mi mekem disisen blong toktok wetem hem bakegen.” Biaen, sista ya i prea, i mekem tingting blong hem i strong, nao i kilim doa blong woman ya. Sista ya i haremgud tumas taem woman ya i askem hem blong kam insaed. Hem i statem wan Baebol stadi wetem woman ya mo hem i gohed long hem long nekis dei nomo. Biaen, woman ya i kam long trutok.
33 Blong Karem Moa Frut, Mekem Plan Fastaem: I gud we yumi spenem sam taem evri wik blong mekem ol visit. Yumi save mekem plante wok sipos yumi plan gud fastaem. Tingbaot ol visit we yu save mekem long eria we bambae yu prij long hem. Sipos yu yusum wan trak blong mekem ol visit, i moagud blong no tekem tumas man i go long trak. Olsem nao, evriwan bambae oli gat jans blong mekem sam visit. Brata no sista we i draevem trak ya i mas save fastaem weples ol visit oli stap, blong mekem se yufala i no ronron olbaot blong nating nomo.
34 Olgeta we oli mekem ol gudfala visit mo statem plante Baebol stadi, oli talem se i impoten blong soem se yu gat trufala intres long ol wanwan man, mo blong gohed blong tingbaot olgeta afta we yu mekem visit. Mo tu, yu mas gat wan poen blong Baebol blong tokbaot we man i intres long hem, mo yu mas putum faondesen blong wan visit bifo we yu aot long haos. Mo tu, i impoten blong gobak kwik. Yumi neva mas fogetem se yumi wantem kasem mak ya we yumi statem wan Baebol stadi.
35 Wan impoten samting we yumi nidim blong karem frut long ol visit, hemia strong tingting. ?Olsem wanem yumi save kasem? Aposol Pol i ansa, taem hem i talem se “God blong yumi” i ‘mekem tingting blong yumi i strong’ blong talemaot gud nyus long ol narafala. (1 Tes. 2:2) Sipos yu nidim blong kamgud moa long saed ya, prea long Jeova mo askem hem blong givhan long yu. Afta, wok folem prea blong yu, mo gobak long olgeta we oli soem intres. !Bambae Jeova i blesem fasin traehad blong yu!
[Bokis]
Olsem Wanem Blong Karem Frut Long Ol Visit
■ Soem trufala intres long ol man wanwan.
■ Jusum wan poen long Baebol blong tokbaot, we man i intres long hem.
■ Long evri visit, putum faondesen blong nekiswan visit.
■ Gohed blong tingbaot man blong haos afta we yu mekem visit.
■ Gobak wan no tu dei biaen blong mekem intres i gru moa.
■ No fogetem mak we yu wantem kasem, hemia blong statem wan Baebol stadi.
■ Prea long Jeova mo askem hem blong mekem tingting blong yu i strong blong mekem wok ya.