I Nidim Moa Baebol Stadi

¹ Jeova God i stap blesem ogenaesesen blong hem long wol ya, i stap mekem se plante moa man oli joen long hem. Long laswan sevis yia, 375,923 man long wol oli tekem baptaes. !Hemia i olsem 1,000 nyufala disaepol evri dei, no 43 evri haoa! Nating se long plante ples blong wol, ol brata blong yumi oli bin fesem hadtaem blong plante yia, wok blong Kingdom i stap kam antap bigwan mo namba blong ol man i stap gru. !Yumi haremgud tumas blong ridim ol ripot we oli soem se wok blong talemaot gud nyus i stap kam antap olsem!

² Long Vanuatu tu, long laswan sevis yia, namba blong ol pablisa mo paenia i kam antap, wetem namba blong ol haoa long wok blong prij, mo namba blong ol buklet mo magasin we yumi seremaot. Mo tu, i gat 1,583 man we oli kam long Memoriol, hemia i bitim namba blong olgeta yia bifo. ?Olsem wanem long ol visit mo Baebol stadi? Hemia wok ya we i impoten tumas blong pulum ol man oli kam disaepol. Long yia we i pas, yumi mekem 20,067 visit, mo long Septemba, namba blong ol Baebol stadi i kasem 450. Yumi haremgud blong tingbaot wanem samting i save kamaot long fyuja from ol namba ya. Taswe, i klia se plante man yet long kantri ya oli intres blong stadi Baebol. ?Yumi wanwan i save mekem wanem, blong mekem bigfala namba ya blong ol visit mo Baebol stadi i kam bigwan moa?

³ Mekem Tingting Blong Wantem Wan Stadi i Kam Strong Moa: Yumi wanwan i mas traehad oltaem blong stap strong long bilif mo mekem plante wok. Ol trufala man blong Kraes, oli “strong blong mekem ol gudfala samting.” (Taet. 2:​14) Long saed blong wok blong prij, ?yumi save talem se yumi wantem tumas blong visitim ol man bakegen we yumi bin livim wan buk no magasin wetem olgeta? ?Yumi askem wetem glad long olgeta man we oli soem intres, sipos oli wantem stadi Baebol? (Rom 12:11) Sipos no, ating yumi mas wokem wan tingting we i strong moa blong wantem mekem ol visit mo statem ol Baebol stadi.

⁴ Sipos yumi wanwan i ridim Baebol oltaem, kam long olgeta miting, mo stadi long ol buk blong yumi, bambae yumi stap wekapgud oltaem long saed blong speret, mo yumi gat paoa we tabu speret blong God i givim. (Efes. 3:​16-​19) Samting ya bambae i mekem bilif mo tras blong yumi long Jeova i strong moa, mo lav we yumi gat long ol narafala man bambae i kam strong moa tu. Bambae yumi wantem tijim narafala long trutok, mo samting ya bambae i mekem se yumi intres moa long wok blong prij, yumi karem moa frut, mo yumi haremgud moa long wok ya. !Yes, yumi mas wantem blong statem moa Baebol stadi!

⁵ Stadi Wetem Famle Fastaem: Ol Kristin papa mama we ol pikinini blong olgeta oli stap yet long haos, oli mas tingbaot program blong olgeta blong mekem famle Baebol stadi oltaem. (Dut. 31:12; Sam 148:12, 13; Prov. 22:6) I gud we ol papa mama oli stadi long buklet ya Samting We God i Wantem mo long buk ya Save wetem ol pikinini blong olgeta, blong givhan long olgeta blong kam ol pablisa we oli no baptaes yet, mo blong kasem mak we oli givim laef blong olgeta i go long Jeova mo tekem baptaes. I tru, oli save stadi long sam narafala samting tu, folem nid mo yia blong ol pikinini. Taem papa no mama i stadi wetem wan pikinini we i no baptaes yet, hem i save makem stadi, taem, mo visit ya long ripot blong prij blong hem, olsem Kingdom Wok Blong Yumi long Epril 1987, i talem long Ansa Long Wan Kwestin.

⁶ Mekem Plan We i Moagud: Taem yumi tingbaot bigfala namba blong magasin, buklet, mo buk we yumi stap seremaot, i klia se yumi stap sakem plante sid blong trutok. Ol sid ya oli save mekem plante nyufala disaepol. Be, ?wan man blong wokem garen bambae i haremgud sipos hem i hadwok blong planem sid oltaem, be hem i neva tekem taem blong karem kakae we i rere long garen? No gat. Long sem fasin, yumi nidim blong gohed blong givhan long ol man afta we yumi planem sid blong trutok.

⁷ ?Yu yu makemaot taem long program blong yu blong mekem ol visit? Gobak kwiktaem long ol man we oli soem intres. Taem yu mekem wan visit, traehad blong statem wan Baebol stadi. ?Yu yu stap raetemdaon ol save long saed blong ol man we yu visitim olgeta, mo holem ol pepa ya oli stapgud mo klin? Yu mas raetem nem mo adres blong man, mo no fogetem blong raetem dei we yu mitim hem fastaem, ol buk we yu livim wetem hem, samting we yutufala i bin tokbaot, mo wan poen we yu wantem tokbaot nekis taem. Livim naf ples long pepa, blong raetem ol narafala save long ol wanwan taem we yu visitim man ya.

⁸ Tingtinggud Olsem Wanem Blong Mekem Wan Visit: ?Wanem sam samting blong tingbaot taem yu mekem visit long wan man we i soem intres? (1) Soem kaen fasin mo fasin fren, soem se yu glad blong toktok wetem hem, mo yusum ol tok olsem yu yusum taem yu storeyan wetem wan fren. (2) Tokbaot ol poen no kwestin we man ya i intres long olgeta. (3) Yu no mas mekem storeyan i dip tumas, storeyan long fasin we i pulum intres, mo yusum Baebol. (4) Long ol wanwan visit, traem tijim man long wan samting we i mekem hem i luksave se stadi i stap givhan long hem. (5) Pulum hem blong tingting long samting we bambae yutufala i tokbaot nekis taem. (6) Yu no mas storeyan longtaem tumas. (7) Yu no mas askem ol kwestin we oli mekem man ya i sem, no we oli strong tumas blong hem i ansa long olgeta. (8) Yusum fasin luksave, olsemia, bambae yu no save agensem ol rong tingting mo fasin blong man bifo we yu givhan long hem blong laekem trutok blong Baebol.​—Lukluk pepa long medel blong Kingdom Wok Blong Yumi, Maj, 1997, blong faenem moa save long fasin blong mekem ol gudfala visit mo statem Baebol stadi.

⁹ Lukaot Ol Man Long Evri Ples: Long wan ples, i gat wan bigfala stori haos we ol narafala man we oli no stap long hem oli no gat raet blong go insaed long hem. Ale, kongregesen i faenemaot nem blong ol man mo namba blong ol rum long stori haos ya. Nao, oli raetem leta i go long ol wanwan man ya, mo oli sanem i go wetem tu traket. Long en blong leta, oli askem man blong haos sipos hem i wantem stadi Baebol, mo oli givim wan namba blong telefon we hem i save ring long hem. Sam dei biaen, wan yangfala man i telefon i kam, blong askem wan stadi. Long nekis dei, oli mekem visit long yangfala ya, mo oli statem wan stadi wetem hem long Save buk. Long semfala naet ya, man ya i kam long Buk Stadi, mo hem i gohed blong kam long olgeta miting. Kwiktaem nomo, hem i stat blong ridim Baebol evri dei. Hem i gohed gud gogo hem i tekem baptaes.

¹⁰ Ol pablisa long wan trak oli stap mekem ol visit. Long visit blong wan sista, woman we hem i mitim fastaem i no stap, be i gat wan narafala yangfala woman i openem doa. Woman ya i talem se: “Mi mi stap wet long yufala.” Hem i bin kasem wan Save buk long wan fren blong hem. Taem tufala sista ya i kamtru long haos blong hem, hem i ridim buk ya tu taem finis, mo hem i laekem tumas ol save we hem i bin ridim. Hem i talem se hem i no sapraes we ol Wetnes oli kam luk hem long dei ya, from we hem i prea se bambae oli kam mo stadi Baebol wetem hem. Tufala sista i statem wan Baebol stadi wetem woman ya, hem i stat blong kam long ol miting blong kongregesen, mo i gohed kwik long trutok.

¹¹ I no longtaem i pas, wan sista we hem i baptaes kolosap 25 yia finis, i givim wan Save buk long mama blong hem. Mama blong hem, we i stap go long jyos oltaem, i stat ridim buk ya. Afta we hem i finisim tu japta, hem i telefon i go long gel blong hem, mo hem i talem samting we i mekem gel blong hem i sek, i se: “!Mi wantem kam wan Wetnes blong Jeova!” Mama ya i stat stadi mo naoia hem i baptaes finis.

¹² Sam Samting Blong Traem: ?Yu bin askem stret long man blong haos sipos hem i wantem wan Baebol stadi? Yu save talem ol isi tok ya se: “Sipos yu glad blong stadi Baebol we yu no pem, bambae mi soem long yu long sam menet nomo, olsem wanem yumi mekem samting ya. Sipos yu laekem, ale yu save gohed.” Plante man oli glad blong agri long samting ya, mo blong save olsem wanem blong mekem Baebol stadi.

¹³ Smoltaem nomo afta we yu stat stadi wetem wan man, soem long hem olsem wanem blong mekemrere stadi blong hem, hemia se, ridim ol vas mo putum mak aninit long ol impoten tok long stret ansa. Tokbaot ol bigfala poen nomo. Maet yu nidim blong jenisim taem blong ol faswan stadi lelebet, be i impoten blong mekem Baebol stadi ya evri wik. Tingbaot olsem wanem bambae yu eksplenem long hem se prea i wan impoten haf blong stadi, mo tingbaot ol vas we bambae yu yusum blong mekem man ya i rere from fasin agens. !Meksua se stadi i pulum intres blong hem!

¹⁴ I tru, i no olgeta studen blong Baebol we oli gohed kwik. Samfala oli neva bin tingting dip long trutok blong Baebol, mo oli no kwik olsem sam narafala man blong kasem save long hem. Sam narafala oli bisi tumas, mo ating oli no save makemaot naf taem blong mekem plante haf long buk evri stadi. Taswe, maet i tekem longtaem lelebet blong finisim wan japta, mo bitim wan yia blong finisim buk. Be samting ya i oraet nomo, sipos studen ya i stap gohed gud blong kasem save long trutok, mo i stap mekem ol save we hem i lanem i wok long laef blong hem. Plante taem, yumi save stadi long buklet ya Samting We God i Wantem fastaem, mo biaen, long Save buk. Sipos yumi statem wan Baebol stadi long Save buk mo yumi luk se i hadwok long studen blong kasem save, i moagud blong jenisim stadi ya i go long buklet ya Samting We God i Wantem, nomata hamas pej yumi kavremap finis long Save buk. Taem yumi finisim buklet ya, yumi save gobak long Save buk, mo stat long faswan japta bakegen. Sipos studen i stadi olsem, mo i kam long ol miting, bambae hem i putum wan strong faondesen blong trutok long laef blong hem.

¹⁵ !Samting we i impoten tumas, hemia se yu mas prea blong kasem wan Baebol stadi! (1 Jon 3:​22) Samting we i save givim moa glad long wan Kristin i bitim ol narafala samting, hemia taem Jeova i yusum hem blong givhan long wan man blong kam wan disaepol blong Kraes. (Wok 20:35; 1 Kor. 3:​6-9; 1 Tes. 2:8) !Naoia i taem blong wok strong blong statem ol Baebol stadi, wetem strong tingting se Jeova bambae i blesem ol traehad blong yumi!

[Tok blong pija long pej 3]

?Yu yu stap prea long Jeova blong kasem wan nyufala Baebol stadi?