Yu Mas Mekem Visit
1 Jisas i talem long ol minista blong gud nyus olsem yumi se yumi mas mekem disaepol. (Mat. 28:19, 20) Mekem ol visit i wan impoten haf long wok blong mekem disaepol. Yumi luksave se laef blong ol man i dipen long wok ya, taswe yumi wantem traehad blong wokem smol intres we i stap long olgeta i kam bigwan.
2 Yumi mas tingbaot evri man wanwan we yumi livim buk wetem olgeta, blong yumi visitim olgeta. Ol buk we yumi stap givimaot, i no rod ya nomo we yumi save yusum blong mekem visit. Plante man oli wantem tokbaot mesej blong Baebol be oli no wantem tekem buk. Taswe sipos yumi luksave se man i intres, yumi mas gobak mo traem mekem intres blong hem i gru.
3 Visitim Ol Man We Oli Karem Buk: From we namba blong ol buk we yumi givimaot i bitim namba blong ol visit, i impoten blong yumi mekem moa visit. Wan paenia i givimaot wan buk be i luk se man blong haos i no intres tumas. Long wan aftenun, afta we hem i mekem ol narafala visit blong hem, brata ya i go luk man ya bakegen. Mo hem i statem wan Baebol stadi.
4 Wan brata i livim tu magasin wetem wan man mo hem i no tingbaot blong go luk hem bakegen, hem i ting se man ya i no rili intres. Sam dei afta, man ya i raetem wan leta i go long kongregesen long ples blong hem mo i askem sipos hem i save tekem baptaes. Taem oli askem wan misinari sista se wanem samting i impoten blong hem i save givhan long 74 man oli kam pablisa, hem i ansa se: “Mifala i mekem plante wok long magasin, mo oltaem mi stap visitim ol man we oli karem ol magasin kam kasem taem we mi save statem ol Baebol stadi wetem olgeta.”
5 Samtaem, maet yumi livim wan traket nomo wetem man long haos long faswan visit. Plante taem yumi save yusum ol traket blong mekem ol visit mo soemaot olsem wanem blong mekem Baebol stadi. Wan seket elda we i prij wetem wan narafala pablisa, i livim wan traket wetem wan woman. Hem i no toktok plante, be hem i leftemap tingting blong sista blong i mekem visit ya. Sista ya i mekem visit mo wantaem nomo hem i statem wan Baebol stadi.
6 Taem Man i Soem Intres: Sipos man blong haos i no tekem buk taem yumi prij long hem fastaem, plante taem samting ya i no min se hem i no intres. Wan pablisa i visitim tu yangfala we tufala i jes mared. Hem i faenemaot se tufala i gat sam buk mo bifo tufala i bin stadi. Tufala i agri blong gohed long stadi blong tufala. Wan spesel paenia i luksave intres blong wan woman we plante taem hem i no wantem karem ol magasin. Paenia ya i no yusum ol magasin mo woman ya i rere blong tokbaot sam haf long wan buklet. Afta we spesel paenia ya i visitim hem tu no tri taem biaen, hem i mekem Baebol stadi wetem hem, tu taem long wan wik.
7 Evriwan we oli givim laef blong olgeta long Jeova finis oli mas harem se i wan responsabiliti blong joen long wok blong mekem disaepol. Taem yumi gobak oltaem long ol man we oli soem intres, bambae yumi save kasem frut we bambae i givim bigfala blesing long yumi mo long ‘ol man we oli stap lesin long yumi.’—1 Tim. 4:16.