Yumi Mekem Visit Blong Statem Baebol Stadi
1. ?From wanem wok ya blong visitim ol man bakegen i impoten?
1 Jisas i bin givim oda long ol man blong hem, se oli mas prij. Be antap long hemia, oli mas ‘pulum ol man oli kam man blong hem . . . mo tijim olgeta.’ (Mat. 28:19, 20) Wan man blong prij hem i talemaot tok blong God be wan tija hem i mekem moa. Hem i tijim man, i eksplenem samting, mo i givim pruf blong ol samting we hem i tijim. Wan rod blong tijim ol narafala man, hemia blong yumi gobak bakegen blong luk olgeta we oli intres mo traehad blong statem Baebol stadi wetem olgeta.
2. ?Hu olgeta ya we yumi mas go luk olgeta bakegen?
2 ?Hu olgeta ya we yumi mas go luk olgeta bakegen? Yumi mas gobak blong luk olgeta man we oli karem ol buk mo tu, olgeta we oli intres long gud nius, nating se intres we oli soem i smol nomo. Taem yu stap prij long pablik ples mo yu faenem wan man we i intres, i gud blong traem kasem adres mo telefon namba blong man ya, blong yu save storian moa wetem hem biaen. Yu mas gat strong tingting blong statem ol Baebol stadi. Yu mas gohed blong lukaotem olgeta we oli rili wantem stadi Baebol, mo bambae yu save faenem olgeta ya.—Mat. 10:11.
3, 4. ?Olsem wanem blong mekem wan visit we i karem gudfala frut?
3 Soem Intres Long Wanwan Man: Blong mekem wan visit we bambae i karem gudfala frut i impoten blong mekem rod blong samting ya long faswan taem we yu prij long wan man. Olgeta we oli karem frut long wok ya blong talemaot tok blong God, oli luksave wanem we man blong haos i intres long hem, nao oli tokbaot samting ya long nekis visit. Samfala oli faenem i gud blong stanemap wan kwestin long en blong storian blong olgeta, blong pulum man blong haos blong intres long samting we bambae oli tokbaot long nekis visit. Taem yumi rili intres long ol man, yumi gohed blong tingbaot olgeta afta we yumi lego haos blong olgeta, mo tu, yumi wantem kambak kwik blong luk olgeta bakegen. Sipos yu yu naf, traem go luk man ya wan no tu dei biaen nomo, taem tingting blong hem i stap yet long storian blong yutufala.
4 Taem yu yu mekem wan visit, traem blong gohed long storian we yutufala i statem lastaem finis. Traehad blong soem wan vas long Baebol we i save leftemap tingting blong hem, mo yu mas rere oltaem blong lesin long tok blong hem. Traem blong save gud man ya. Nao taem yu go luk hem bakegen, yu save serem ol trutok blong Baebol we oli stret long ol wari blong hem.
5. ?Wanem wan isi rod blong statem Baebol stadi?
5 Lukaot Rod Blong Statem Baebol Stadi: Taem we yu mekem ol visit, tingting blong yu i mas stap long Baebol stadi. ?Olsem wanem yu save statem wan Baebol stadi wetem visit ya? Talemaot long hem se yu wantem serem wan gudfala poen wetem hem. Nao openem Save buk no buklet Wanem long wan haf we yu ting se man ya bambae i intres long hem. Ridim haf ya, askem kwestin, mo storian long wan no tu vas we oli stap long haf ya. Yu save mekem olsemia blong faef no ten menet, stret long taem we yutufala i stanap long doa blong haos blong man ya nomo. Blong finisim storian ya, askem nekiswan kwestin we i stap, mo mekem plan blong kam luk hem bakegen.
6. ?Olsem wanem yumi soemaot se yumi luksave we ol visit oli impoten?
6 Wan impoten saed blong wok blong prij, i blong mekem intres blong ol man i gru. Taswe, makemaot taem long plan blong yu evri wik blong mekem ol visit. Taem yu yu mekem olsemia, bambae yu kasem trufala glad mo bambae yu karem gudfala frut long wok blong yu.