Wok Long Intres Taem Yumi Mekemgud Visit Bakegen
1 Evri tok we oli mekem reregud i gat wan gud fastok we i pulum tingting, bodi blong tok we i gat plante save long hem, mo wan lastok we i pulum man blong mekem wan samting. Fastok i blong pulum tingting blong ol man we oli lesin, be sipos i no gat bodi mo lastok, tok ya i no fulwan. Yumi save folem sem rul olsem long minista wok blong yumi. I wan gud samting blong wekemap intres blong man blong haos long fastaem we yumi toktok long hem, be yumi mas gohed blong wok long intres we man i soem fastaem taem yumi mekemgud ol visit bakegen long hem.
2 ?From wanem God i letem fasin nogud i stap? !Hemia wan gudfala kwestin! ?Yu agri se poen ya i stap long tingting blong plante man tede? Hemia from wanem, long haf we i stap antap, i talem se i gud blong askem kwestin ya long en blong fastaem we yu toktok wetem man wetem tingting blong ansa long hem taem yu mekem visit bakegen.
3 Yu save talem olsem se:
◼ “Halo. Lastaem we yumi bin storeyan, yumi bin tokbaot poen from wanem God i letem fasin nogud i stap, mo mi promes blong kambak blong givim sam ansa long yu. Plante man oli harem se sipos God i rili kea long yumi, bambae hem i finisim ol fasin nogud ya. Maet yu tu yu harem olsem. [Letem man blong haos blong ansa.] Baebol i soem klia long yumi se God i rili kea long yumi. [Ridim 1 Jon 4:8.] I gat gud risen blong God i letem fasin nogud i stap gohed kasem naoia. 2 Pita 3:9 i eksplenem wan long ol risen ya. Ol narafala risen oli stap long buklet ya.” Nao openem i go long pej 12-14 blong buklet ya ?God i Rili Kea Long Yumi? mo tokbaot wan poen we man blong haos i intres long hem.
4 Maet sam man blong haos oli intres blong kasem ful save long poen ya, mo ating yu nidim blong mekem sam visit bakegen bifo we man i glad fulwan long ansa ya. Plante buk blong Sosaeti we oli gat 192 pej long hem we bambae yumi seremaot long Janewari, oli gat wan japta we yumi save yusum blong gohed blong tokbaot samting ya.
5 Taem kolosap storeyan i finis, stanemap wan narafala kwestin mo talem long man blong haos se yu glad blong storeyan wetem hem long sam moa save long nekis taem we yu kambak. Plante man oli wantem save olsem wanem long man taem hem i ded. ?Ating i gud blong storeyan long poen ya wetem hem long wan taem we hem i glad long hem a?
6 I gud blong yu holem tri stampa rul long tingting blong yu oltaem. Yu no mas strong tumas. Ating man blong haos i no gat fasin ya blong putumap wan taem blong tokbaot Baebol. Yu mas stap smoltaem nomo. Yu no stap longtaem tumas no kavremap plante poen wantaem. Plante taem, bambae man i glad blong yu kambak sipos yu tokbaot sam poen nomo long sot taem ya. Yu mas kaen mo gat fasin fren. Soem long man blong haos se yu intres long hem.
7 Mak blong yumi i blong pulum man blong haos long wan storeyan long Baebol. Afta yumi wantem statem wan gudfala Baebol stadi wetem wan buk we i stret, olsem Laef Foreva buk. Bambae yu save kasem glad sipos yu wok long intres taem yu mekemgud visit bakegen.