Ol Visit We Oli Isi Mo Wokgud
1 ?Olsem wanem, yu stap mekem ol visit bakegen, no yu faenem i had from yu no save wanem blong talem? I no nid blong fraet. I gat tri samting we bambae oli halpem yu blong winim: (1) fasin blong reregud; (2) fasin blong save tokbaot wan no tu poen long Baebol; mo (3) fasin blong wantem lesin long tingting blong man blong haos.
2 Taem yu mekem rere blong mekem visit, traem luksave wanem poen we i stret blong tokbaot wetem man blong haos. ?Yu bin livim wan kwestin long en blong fas visit blong yu, no man blong haos i soem intres long wan poen? Lukluk bakegen long ol samting yu bin raetem daon, mo yusum Reasoning buk blong faenem poen ya we i save halpem yu blong mekem wan gudfala visit. Taem yu mekem visit bakegen, yu mas kaen mo gat fasin fren. Yusum nem blong man blong haos taem yu talem halo long hem.
3 Sipos yu bin livim Wajtaoa mo Wekap! long man blong haos, taem yu mekem visit bakegen yu save tokbaot wan no tu poen we yu jusum long wan magasin. Sipos yu bin livim wan traket long fastaem we toktok wetem man, maet yu save yusum wan poen long wan magasin no buklet we i laenap wetem traket.
4 Sipos yu bin livim traket ya “Laef Long Pis Blong Nyufala Wol,” yu save talem se:
◼ “Lastaem we mi storeyan wetem yu, yumi bin tokbaot promes blong God long saed long wan nyufala wol we i gat pis long hem. Olsem we yumi bin tokbaot, gudfala fasin blong laef bambae i kamtru long Kingdom blong God. ?Yu ting se wanem samting yumi mas blong kam haf blong nyufala wol ya we bambae i gat pis long hem? Letem man blong haos blong talem tingting blong hem, afta tokbaot tingting we i stap long Ol Sam 37:9, 11, 29 long hem.
5 Sipos yu bin livim traket ya “?Olsem Wanem Long Ol Fren Blong Yumi We Oli Ded?,” ol sot toktok ya nomo oli save halpem yu blong statem storeyan:
◼ “Long en blong storeyan blong yumi tu lastaem, mi bin livim wan traket long yu we stampa blong hem ?Olsem Wanem Long Ol Fren Blong Yumi We Oli Ded Finis? Haf tri i askem sam kwestin we oli intres tumas: ‘?From wanem ol man oli stap ded? ?Ol ded man oli stap wea? ?Mo olsem wanem yumi save sua se bambae oli laef bakegen?’ Nekis smol stampa tok, we nem blong hem ‘Ded—Mo Wanem Samting i Kamaot Long Ded,’ i ansa long wanwan kwestin ya. Mi gat wan moa kopi blong traket ya wetem mi. Makem wanem i talem long haf 4.” Nao taem man blong haos i stap folem wetem yu, ridim haf ya, wetem tufala vas, mo askem wanem tingting blong man blong haos. Lesingud long wanem we hem i mas talem, mo folem tingting blong hem.
6 Taem storeyan i stap gohed, maet man blong haos bambae i talem sam poen we oli no stret. I no nidim blong stretem evri samting we hem i talem. Defren olgeta, stap long poen we yufala i tokbaot. Ol tingting blong hem we maet oli no laenap wetem Baebol yu save stretem olgeta long nekis visit blong yu.
7 Long olgeta samting traem mekem plan blong wokgud long olgeta intres taem yumi mekem ol visit we oli isi mo wokgud long manis Epril.