Yusum Laef Foreva Buk Long Ol Visit Bakegen
1 Aposol Pol i luksave from wanem i impoten blong lukaotgud long olgeta man we oli soem intres long trutok. Hem i tokbaot olgeta olsem ol yang tri we oli nidim blong putum wora long olgeta oltaem. (1 Kor. 3:6-9) Sem mak tede, taem yumi faenem ol man we oli intres long trutok oli nidim we yumi lukaotgud long olgeta taem yumi mekem visit long olgeta bakegen blong wokem olgeta oli gru long saed blong speret.
2 I gud blong tingbaot oltaem se olgeta man we yumi toktok long olgeta oli nidim yumi blong halpem olgeta blong tingbaot olgeta samting we yumi bin tokbaot fastaem wetem olgeta. I gud se, long olgeta visit wanwan yumi save tokbaot kwiktaem bakegen olgeta samting we yumi bin tokbaot lastaem yumi visitim man ya, we i stret long poen we man blong haos i laekem. Pulum man blong haos blong joen long storeyan mo yu mas kwik blong luksave intres mo nid blong hem.
3 Taem yumi mekem visit bakegen, nating yumi bin livim “Laef Foreva” buk no no gat, ating yu wantem statem tok blong yu olsem blong askem stret long man sipos hem i wantem wan Baebol stadi:
◼ “Plante man we mifala i stap toktok wetem olgeta oli faenem ansa blong ol kwestin we oli gat long saed blong Baebol taem oli yusum buk ya.” Nao yu save openem i go long pej we i gat nem blong ol japta oli stap long hem insaed long Laef Foreva buk, mo yu askem: “?Wanem japta insaed ya we yu yu intres moa long hem?” Tanem i go long japta we hem i soem intres long hem mo soem long man blong haos olsem wanem ol haf wanwan oli gat ol namba i stap long olgeta we i laenap long ol kwestin we oli stap daon long ol pej wanwan blong mekem se hem i save ol bigfala poen long ol haf wanwan. Tokbaot sam poen nomo mo mekem plan blong kambak bakegen.
4 Wan narafala fastok i olsem:
◼ “Mi glad tumas long storeyan blong yumitu las wik. Plante man oli wantem save from wanem mifala i stap go oltaem long haos blong olgeta. Mi ting se bambae yu intres bigwan long ol tok we oli stap long pej 29 blong buk ya, Yu Save Laef Foreva Long Paradaes Long Wol. [Ridim haf 11.] ?Taem yumi tingbaot samting we yumi ridim long ples ya, wanem samting yu ting se i nidim blong wosip blong yumi i stret long ae blong God? [Letem man blong haos i ansa mo givim ansa long hem.] Long taem blong Jisas, i gat sam man we oli ting se skul blong olgeta i stret long ae blong God. Makemgud wanem samting oli talem long saed blong olgeta long haf 2 blong japta ya.” Ridim mo talem sam tok bakegen long poen ya.
5 Taem yumi mekem ol visit we yumi livim wan “Laef Foreva” buk long hem, yumi save talem se:
◼ “Lastaem mi visitim yu, yumi bin tokbaot plante samting long saed long fasin blong wol we i nidim jenis. ?Yu yu stap tingbaot from wanem God i letem ol fasin nogud oli stap?” Letem man i ansa mo tanem i go long pej 99 haf 2, mo soem ol kwestin long saed blong stadi. Ridim mo tokbaot haf ya, ridim ol vas. Yu save joenem storeyan blong yutufala taem yu openem i go long ol pija we yu jusum we oli stap long buk, eksampel, pej 78, 84-5, 119, 147, 149-153, mo 156-158.
6 Long Ples We Yu Livim Wan Traket Long Hem: Samtaem yumi livim traket taem yumi toktok fastaem wetem olgeta man. Taem yu mekem visit bakegen, yu save storeyan long wan no tu haf long traket wetem sam vas long Baebol we oli stap long hem. Mo soem olsem wanem wan long olgeta vas we i stap insaed long traket, oli eksplenem hem moa long Laef Foreva buk. Yu save livim Laef Foreva buk mo mekem plan blong gohed blong storeyan long nekis visit blong yu.
7 Taem yumi lukaotgud blong putum wora long bilif blong olgeta Kristin we i no strong, God bambae i mekem i gru blong leftemap mo givim ona long nem blong hem.—1 Kor. 3:7.