Gobak Blong Halpem Ol Man Blong Oli Lanem Olsem Wanem Oli Save Laef Blong Olwe
1 Stat long taem we Laef Foreva buk i kamaot, oli bin wokem moa long 65 milyan kopi long 115 lanwis. Plante man we naoia oli stap mekem wok blong Jeova, oli lanem ol stampa trutok blong Baebol long nambawan buk ya. Manis ya mo nekis manis, maet yumi gat jans blong givimaot buk ya mo yumi save statem Baebol stadi, no maet yumi mitim sam man long teritori we oli gat buk ya finis.
2 Gobak Long Olgeta We Oli Gat Buk ya: Sam pablisa oli kasem sam gud frut from oli luk long nem blong ol japta mo askem long man we i intres se wanem japta nao hem i intres long hem. Taem man blong haos i jusum wan japta, oli askem long hem blong ridim ol tok long japta blong buk ya bifo long nekis visit.
3 Yumi mas makem wan stret taem blong gobak, sipos yumi save mekem olsem. Bifo we yumi gobak, yumi wantem rere blong tokbaot sam paragraf nomo long japta ya we man blong haos i jusum. Sipos hem i no jusum wan japta, yumi save stat blong tokbaot japta 1. Afta we yu tokbaot sam paragraf finis, yumi save stanemap wan kwestin we ol nekis paragraf oli save givim ansa long hem. Samting ya i save mekem i isi blong yumi gobak long nekis visit, taem yumi gohed blong stadi long buk ya Laef Foreva.
4 Be, sipos man blong haos i gat kwestin, hem i gud blong tokbaot olgeta fastaem. Plante taem ol ansa blong ol kwestin ya oli stap insaed long buk. From we yumi save gud nem blong ol japta blong buk ya, maet yumi save tanem i go long ol stret paragraf mo yusum ol poen ya blong ansa long kwestin we hem i stanemap.
5 Gobak Long Olgeta We Yumi Livim Wan Traket Wetem Olgeta: Maet yumi livim traket ya Pis Blong Nyufala Wol. Taem yumi gobak, yumi save stat blong tokbaot fas paragraf blong traket ya.
Taem yumi kam long en blong fas paragraf long pej 3, long haf we oli raetemdaon tok blong Ol Sam 37:29, yumi save talem se:
◼ “Olgeta tok ya, oli soemaot stampa tingting we i stap long buk ya Yu Save Laef Foreva Long Paradaes Long Wol. Tingbaot tingting we i stap long paragraf 3 long japta 1 aninit long stampa tok ya ‘From Wanem Yumi Save Bilif.’ ” Yumi save ridim paragraf 3, askem kwestin we i stap long hem, mo gohed wetem paragraf 4 mo 5 long sem fasin. Afta yumi save talem se: “?From wanem ol fasin blong tede oli no laenap wetem stampa tingting blong God? Nekis paragraf i save eksplenem samting ya, mo mi laekem blong kambak nekis wik long semtaem olsem mo ansa long kwestin ya blong yu.” Askem long hem sipos hem i wantem karem buk.
6 Blong askem hem blong karem “Laef Foreva” buk, yumi save talem se:
◼ “Mi sua we bambae yu glad blong gat wan prapa buk blong yu olsem. Mo afta yu save stat blong ridim fastaem mo samting ya i save mekem se yu kasem moa save long ol samting we bambae yumi tokbaot nekis taem.”
7 Blong gobak blong halpem ol man blong oli lanem olsem wanem oli save laef foreva, hem ya wan impoten wok ya. Jisas i givim oda long ol man blong hem blong tijim ol narafala long wanem we hem i bin tijim olgeta long hem. Yumi prea long Jeova blong sanem moa man blong wok. Taswe, yumi mas mekem wok blong yumi blong faenem ol man we oli intres mo tijim olgeta blong kam man blong wok long taem blong karem kakae long garen.—Mat. 9:37; 28:19, 20.