?Bambae Yumi Mekem Wanem Long Sevis Yia Ya?
1 Long Septemba 1 hem i stat blong 1994 sevis yia, hemia nao wan stret taem blong yumi evriwan ol man blong Jeova, blong mekem i klia long tingting blong yumi wanem we yumi wantem mekem long sevis yia ya, olsem yumi wanwan man mo olsem wan ogenaesesen.
2 Gohed Blong Gru Long Saed Blong Speret: Sipos yumi ol nyuwan we yumi jes joen nomo long trutok, yumi mas wantem blong kam strong moa long bilif. (Hib. 6:1-3) Sipos yumi strong finis long saed blong speret, yumi no mas ting se yumi save halpem ol nyuwan mo ol narafala nomo, be yumi mas lukaot yumi wanwan tu long saed blong speret, neva yumi mas harem olsem we yumi gat olgeta save long Baebol mo olgeta ekspiryens olsem wan Kristin. ?Yumi stap ridim teks blong dei evridei, gohed wetem Baebol riding we i stap long Program Blong Tiokratik Skul, mo mekemrere buk stadi mo Wajtaoa stadi? Samting ya i mas olsem wan isi mak blong yumi evriwan. Yumi mas gohed blong stap gru long saed blong speret, sipos yumi wantem pastru long taem ya we ol nogud fasin blong naoia oli lus mo stap sef long nyufala wol blong God.—Skelem Filipae 3:12-16.
3 Stap Klin Long Saed Blong Speret: Blong Jeova i save akseptem yumi fulwan, yumi mas mekem yumi klin long saed blong ‘bodi mo long saed blong tingting.’ (2 Kor. 7:1) Taem yumi klin finis, ?from wanem yumi wantem ‘gobak long sofmad’ blong ol nogud fasin blong olfala wol ya? (Skelem 2 Pita 2:22.) Yumi mas gat strong tingting blong stap strong mo klin long saed blong speret. Olsem nao, bambae yumi savegud ol nogud trik blong Setan, bambae hem i no save pulum yumi blong mekem se, yumi foldaon long wan sin mo go longwe long gladhat blong Jeova.—2 Kor. 2:11.
4 Harem Ol Waes Advaes: Proveb 15:22 i soemaot se: “Taem i gat fulap man blong givim advaes, bambae ol plan oli kamtru.” Be, tingbaot, man we i talem ol tok ya, Solomon, biaen i letem ‘ol waef blong hem oli tanem hat blong hem blong folem ol narafala god’ from hem i no harem ol advaes blong God long saed blong no tekem ol waef blong narafala ples. (1 King 11:1-4) Taswe, sipos yumi wanwan i no harem ol waes advaes, ?olsem wanem yumi save mekemgud wok blong Jeova no soemaot wan eksampel we narafala i save folem? (1 Tim. 4:15) Ol advaes blong Baebol bambae oli halpem yumi blong lukaotgud long hat blong yumi. (Prov. 4:23) Laekem wanem we Jeova i laekem, no laekem wanem we hem i no laekem nating, stap gohed blong lukaot ol rod blong hem i lidim yumi mo mekem wanem we i save mekem hem i glad, ol samting ya bambae oli protektem yumi.—Prov. 8:13; Jon 8:29; Hib. 1:9.
5 Wosip blong yumi long Jeova i no olsem wan mesin we i wok sem mak nomo oltaem, no wan fasin blong wosip we i sem mak nomo long ol man we oli stap talem se oli Kristin long wol ya, be wosip blong yumi i mas laef, yumi mas mekem wetem speret mo paoa we i laenap wetem trutok we yumi save faenem long Tok blong God.—Jon 4:23, 24.
6 Maet yumi kasem traem evridei blong daonem strong tingting blong yumi blong mekem wok blong God. Yumi save kam strong moa from save ya se “ful kampani” blong ol brata blong yumi oli stap fesem sem traem tu, mo Jeova nao bambae i mekem yumi strong. (1 Pita 5:9, 10) Olsem nao yumi naf blong finisim minista wok blong yumi long sevis yia ya 1994.—2 Tim. 4:5.