Frut We Yumi Kasem i Stret Long Wok We Yumi Mekem

¹ Jeova God i mekem plante samting blong soemaot we hem i laekem ol man. Wan taem, Jisas i soemaotgud lav blong God. Hem i talem long ol man we oli stap hivap, i se: “From we [God] i save mekem san blong hem i saen long ol gudfala man mo ol man we oli nogud, long sem mak nomo. Mo i save mekem i ren long ol stret man mo ol man we oli no stret tu.” (Mat. 5:43-48) Wan narafala dei, Jisas i talemaot samting we i soemaot moa lav blong God, i bitim ol narafala fasin blong hem. God i givim Pikinini blong hem, wan nomo we hem i gat, olsem wan sakrafaes blong sevem yumi. (Jon 3:16) Jisas i pulum ol man we oli stap lesin long hem blong oli gat tangkyu from lav blong God. ?Yumi tu yumi traehad blong mekem olsem?

² Man we i rili wantem talem tangkyu long Jeova, mo kasem ol nambawan blesing from lav blong hem, hem i mas kasem save long God fastaem. (Jon 17:3) Yumi nidim sam advaes blong mekem wok blong hem long stret fasin. Jeova i soemaot finis we hem i kea gud long yumi, mo i laekem yumi tumas. Hem i givim Tok blong hem Baebol long yumi, mo i stanemap nambawan ogenaesesen blong hem we i stap givim advaes mo rul long yumi. (Mat. 24:45-47; 2 Tim. 3:16, 17) From we yumi givim finis laef blong yumi long hem, Jeova i soemaot ol rod blong hem long yumi. ?Be olsem wanem long yu? ?Yu yu stap traehad blong talem tangkyu long hem from lav blong hem? ?Yu yu stap folem ol advaes blong hem blong yu save harem gud, mo blong mekem hem i glad tu? (Aes. 48:17; Jem. 1:22) Long 1 Korin 3:​8, aposol Pol i talem se: “Mi ya we mi olsem man blong brekem graon, mo man ya we i olsem man blong planem yam, mitufala i wan mak nomo. Bambae God i givim pei long mitufala, stret long ol wok we mitufala i mekem.”

³ Taswe yumi mas strong blong mekem ol samting we God i askem long yumi. I tru we olgeta man oli no save gohed long sem fasin nomo. Maet yumi gat sam fasin we oli save blokem yumi, no oli save givhan long yumi. Taswe i no waes blong skelem fasin blong yumi wetem fasin blong narafala man. Be i impoten tumas blong yumi evriwan i wok strong. ?Yumi mas mekem wanem blong kam kolosap moa long ogenaesesen? ?Maet i gat sam Kristin wok blong yumi we yumi save mekem i moa gud? ?Yumi save mekem wanem blong joen moa long wok blong prij we kongregesen i mekem? ?Maet i gat sam rul blong ogenaesesen we yumi mas folem?​—⁠1 Tim. 4:16.

FOLEM FASIN BLONG OL GUDFALA KRISTIN

⁴ Sam gudfala brata sista oli stap talemaot gud nyus blong Kingdom i stat plante yia finis. Olsem Pol, oli stret nomo, mo yumi save folem fasin blong olgeta. (1 Korin 11:⁠1) Oli talem tangkyu long Jeova from lav blong hem, mo oli wok strong, mo oli traehad blong folem ol advaes blong Baebol. From samting ya oli kasem plante blesing. Insaed long kon­gregesen, oli olsem wan strong grup. Oli no ronwe long wok blong olgeta. Frut blong wok blong olgeta i klia nomo.​—⁠Rom 1:13; 2 Korin 3:1-3.

⁵ Long taem blong yumi, plante taosen nyufala disaepol oli kam long ogenaesesen evri yia. (Aes. 60:8) Olgeta tu oli wok strong blong kam bigman long saed blong speret. Mo yumi save leftemap fasin blong olgeta from we oli strong blong go prij. Taem olgeta i luk olsem wanem Jeova i stap blesem ol man we i wok strong long wok blong hem, samting ya i leftemap tingting blong olgeta. Mo tu, taem oli luk fasin blong ol brata sista we oli bigman finis long saed blong speret, ol nyuwan oli luksave se i no taem naoia blong go slou long wok blong God. Nating we yu yu wan nyu pablisa, no yu gat ekspi­ryens, ?be olsem wanem long yu? ?Yu yu stap gohed blong gru long saed blong speret? ?Yu yu agri blong mekem olgeta Kristin wok blong yu? ?Mo yu yu kasem frut long olgeta wok we ogenaesesen i mekem blong givhan long yu?

YUMI MAS MEKEM SAMTING WE YUMI LANEM FINIS

⁶ Jemes i talem se yumi mas ‘man we i mekem wok.’ Be longtaem bifo, Moses i talem long ol man Jyu, i se: “Mo yufala i mas putum ol tok blong mi long hat blong yufala.” (Jem. 1:25; Dut. 11:18) Tok ya i soemaot we i no naf blong gat save. Ol man Jyu oli mas putum ol tok blong Loa long hat blong olgeta, oli mas obei long Jeova. Stampa rul ya i no jenis nating. Pikinini blong God Jisas, hem i tinghae long fasin obei. (Jon 8:28) Long Matyu 7:24 hem i talem se: “Man we i harem ol tok ya blong mi, nao i stap mekem ol samting ya, hem i olsem wan waesman we i wokem haos blong hem antap long wan bigfala ston.”

⁷ ?Yu yu stap mekem ol samting we yu lanem finis long ol seket asembli? ?Yu yu kasem save from wanem long taem blong yumi, yu mas wekap gud blong yu no foldaon? ?Yu yu stap lukaot gud blong no foldaon long ol rabis trik mo trap blong Setan? Ogenaesesen i stap givim sem advaes mo woning plante taem bakegen, blong yumi save stap klin long ol fasin blong yumi mo long saed blong speret insaed long kongregesen. ?Olsem wanem long yu? ?Yu yu gat tangkyu from ol advaes ya? ?Yu yu rili stap mekem ol samting we yu lanem, no olsem wanem?​—⁠Jem. 1:​23-25.

⁸ Spesel dei blong asembli long yia ya i bin soemaot from wanem yumi mas tabu, olsem we Jeova i tabu. (1 Pita 1:14-16) Man we i tabu hem i klin long saed blong wosip. Tok ya tabu i min se wan samting i wan spesel samting we i stret long wok blong God nomo. God i givim wok long yumi blong talemaot gud nyus. Sipos yumi stap klin long saed blong speret, long ol fasin blong yumi, mo long bodi blong yumi tu, bambae yumi stap stret oltaem blong karem tabu Tok ya blong trutok. Taswe yumi mas strong moa blong skelem ol fasin blong yumi, blong luk se oli olsem wanem. (Hib. 2:⁠1) Olsemia nao, bambae yumi kasem frut i stret long wok we yumi mekem.

STADI YU WAN BLONG KASEM FRUT

⁹ Taem yumi stadi wanwan, bilif blong yumi i kam strong, mo yumi wantem talem tangkyu moa from trutok. Stadi i mekem we yumi no fraet mo yumi gat paoa long toktok blong yumi. Man we i stadi i gat waes mo fasin luksave. Mo tu hem i save tekem ol nyufala fasin long laef blong hem. (Kol. 1:​9-11) Be sipos yumi wantem we stadi blong yumi i karem gudfala frut, yumi mas spenem taem long hem mo yumi mas traehad. I no gat narafala rod blong kasem stret save mo blong kam strong long saed blong speret. Long saed blong stadi, bambae yumi kakae frut blong ol samting we yumi planem.​—⁠2 Korin 9:6, 7; Gal. 6:7.

¹⁰ ?Olsem wanem? ?Yu stap tekem naf taem blong mekem ol miting blong kongregesen oli rere evri wik? Hemia wan fasin blong talem tangkyu long Jeova from ol gudfala kakae blong speret we slef we i stret mo waes i givim long yumi. Sipos yumi mekem ol miting oli rere gud, yumi save folem program blong Baebol riding mo yumi kasem gud save long hem. ?Olsem wanem? ?Yu yu stap tekem taem evri wik blong ridim haf ya blong Baebol we oli putum long program blong Tiokratik Skul? Samfala menet nomo evri dei oli naf blong ridim ol vas ya mo blong tingtinggud long olgeta. Miting Blong Kingdom Wok i soemaot bakegen long yumi olsem wanem yumi save kasem frut long wok blong prij. ?Olsem wanem? ?Taem yu stap mekem hem i rere, yu stap tingbaot olsem wanem bambae yu yusum ol tok ya long wok blong prij? ?Mo yu stap folem ol advaes ya kwiktaem nomo? ?Mo tu yu gat wan program blong mekem Wajtaoa stadi mo Buk Stadi oli rere?

GIVIM ANSA LONG OL MITING

¹¹ Taem yumi givim ansa long ol miting, yumi kasem moa frut long olgeta. Sipos yumi rerem gud ol miting, mo biaen yumi traehad blong givim ansa, bambae yumi wekap gud mo yumi save harem gud long ol ansa blong ol narafala. Maet yu yu rimemba yet olsem wanem i hadwok long fastaem we yu givim ansa long wan miting, mo long faswan tok we yu mekem long Tiokratik Skul. Maet naioa i no moa hadwok olsemia long yu. ?Be olsem wanem? ?Yu yu stap traehad yet, mekem se olgeta man oli save we yu yu stap gohed gud? (1 Tim. 4:15) Ol ansa we yu givim oli save halpem ol narafala mo leftemap tingting blong olgeta. Sipos yumi rere gud, yumi stadi gud ol tok blong ol miting, bambae ol ansa we yumi givim oli pulum ol narafala blong oli gat lav mo oli mekem ol gudfala wok.​—⁠Hib. 10:​23-25.

¹² Yumi no mas givim ansa we i longfala tumas no i fasfas tumas. I moa gud blong givim sam ansa we oli sot, oli ansa stret long ol kwestin, no oli soemaot olsem wanem yumi save mekem ol samting we wan vas blong Baebol i talem. Sipos yumi rere gud, bambae yumi save yusum prapa tok blong yumi. Ale bambae ol narafala, mo yumi tu, yumi save kasem blesing from. ?From wanem? From we sipos yumi yusum prapa tok blong yumi, yumi tingting fastaem long ol samting we yumi talem, mo yumi talemaot ol samting olsem we yumi kasem save long olgeta. Ale, samting ya i save givhan long ol narafala tu, blong oli kasem moa save long ol tok ya. Mo tu bambae yumi save rimemba long olgeta.

YUMI GAT GLADHAT BLONG SAKEM SID LONG WOK BLONG PRIJ

¹³ Kristin minista wok blong yumi i wan gudgudfala samting. (2 Korin 4:⁠7) ?Yu gat tingting olsem? Minista wok i givim jans long yu blong talemaot bilif blong yu. Jisas i talem se maot i stap toktok taem hat i fulap long ol gudfala samting fastaem. (Luk 6:45) Olgeta hadwok we yumi wanwan i stap mekem blong joen fulwan long wok blong prij oli save karem gudfala blesing long yumi. Yumi kasem moa save long trutok, mo yumi save yusumgud Baebol. Yumi glad from we yumi stap talemaot trutok long ol narafala, nao oli save kasem save long God we i wokem olgeta. Yumi soemaot we yumi wetnes blong God, yumi stanap long saed blong rul blong hem we i stret nomo. Mo yumi glad tu, from we yumi save se Jeova i glad long yumi, yumi olsem pija blong hem, mo yumi mekem ol samting we hem i wantem.​—⁠Mat. 5:48.

¹⁴ Sipos oltaem yumi tingbaot ol wok blong yumi blong yumi save mekem moa, bambae yumi no save kam slak tumas long wosip we yumi mekem long God. ?Samting ya i minim wanem? Samting ya i min se bambae yumi no hafhaf nomo long wok blong God. Bambae yumi no mekem wok blong ol man nomo oli luk yumi. Bambae yumi no man blong givim smosmol nomo long Jeova. Bambae yumi mekem wok blong Jeova long fulhat blong yumi. Baebol i talem se yumi mas traehad long wok blong hem. (Kol. 3:23, 24) I tru we ol fasin blong laef blong ol Kristin i no sem mak. Mo Jeova i no save askem long yumi sam samting we yumi no naf blong mekem. Be ol samting we yumi save mekem, Jeova i wantem we bambae yumi mekem olgeta. (Mat. 22:37) Sin we i stap insaed long yumi i traem blokem yumi blong yumi no givim fulwan. Taswe yumi mas skelemgud ol fasin blong yumi wanwan, blong luksave olsem wanem yumi save mekem wok blong yumi long God i moa gud. ?Yu yu stap mekem olsem?

¹⁵ Yumi mas lukaot gud blong no letem ol wok blong yumi mo ol samting we yumi laekem oli blokem yumi, nao yumi no save traehad long wok blong Jeova. Yumi mas bos long gladtaem mo ol pleplei long laef blong yumi. Mo tu, yumi no mas letem wok we yumi mekem blong kasem mane i pulum yumi tumas. Yumi mas folem advaes blong Jisas long Matyu 6:​22, 23. Ale, bambae yumi save traehad moa long saed blong speret, mo bambae yumi kasem plante blesing from.

¹⁶ Oltaem bambae yumi traehad blong soemaot ol nyufala fasin blong laef blong yumi. Bambae yumi glad blong mekem ol wok blong yumi mo blong folem ol advaes mo ol rul we yumi kasem long ol miting, long ol asembli, mo long ol buk blong Sosaete. Yumi wanwan i mas stadi gud, yumi mas strong blong givim ansa long ol miting, mo yumi mas mekem prapa wok blong yumi blong ol man oli save kam disaepol, olsem we yumi naf blong mekem. Sipos yumi stap soemaot tangkyu olsemia from lav blong God, yumi save kasem plante blesing long saed blong speret naoia, mo yumi save hop strong se bambae yumi laef blong olwe long nyufala wol we Jeova i promes long hem.