?Yu Yu Stap Kasem Gudfala Frut?
1 Plante milian man tede, oli wantem save olsem wanem blong winim ol problem mo harem gud long laef blong olgeta. Oli ridim plante buk mo oli go luk ol grup no ogenaesesen we oli givim advaes blong mekem laef blong olgeta i kam gud moa. Ating sam oli faenem se ol advaes oli givhan smol long olgeta. Be, taem yumi luk fasin blong laef blong plante man tede, ?yu ting se ol program we ol man oli stanemap, oli tijim ol man blong faenem pis, mo haremgud long laef blong olgeta? Yumi save talem se, !nogat!—1 Kor. 3:18-20.
2 Long defren fasin, Man we i wokem yumi i givim nambawan advaes long olgeta we oli wantem harem hem, mo yumi no pem hem from. Jeova i wantem se yumi evriwan i kasem gudfala frut from tijing blong hem. Hem i givim Tok blong hem blong lidim ol man long rod we i stret, mo hem i mekem se ol man blong hem oli talemaot gud nius blong Kingdom long olgeta ples long wol. (Sam 19:7, 8; Mat. 24:14; 2 Tim. 3:16) Blong harem gud long laef, man i mas lesingud long ol loa blong Jeova.—Aes. 48:17, 18
3 Jeova i stap lidim yumi long wan fasin we i moa gud bitim olgeta buk no program blong advaes we yumi save faenem long wol. Yumi save kasem nambawan advaes we i rili wok mo we frut blong hem i stap longtaem, sipos yumi yusumgud rod we Jeova i givim olsem we Tok blong hem i talem mo ogenaesesen blong hem i tijim.—1 Pita 3:10-12.
4 Kasem Gudfala Frut Long Ol Miting Blong Kongregesen: Tede, Jeova i soem trufala intres long yumi, taem hem i tijim yumi long ol rod blong hem, mo yumi save kasem gudfala frut sipos yumi lesingud long ol tijing blong hem. Ol faef miting blong yumi evri wik oli soemaot se Jeova i lavem yumi tumas, mo hem i tingbaot nid blong yumi. Taem yumi go long olgeta miting blong kongregesen, save blong yumi long saed blong God i kam bigwan moa. Yumi lanem blong kam klosap long Jeova mo blong no letem rabis fasin i spolem yumi. Ol miting ya, oli rili leftemap tingting blong yumi.
5 Be i no hemia nomo. Long ol miting blong kongregesen, yumi lanem blong “mekem moa fren.” (2 Kor. 6:13, NW ) Hemia i minim se yumi mas traem save moa ol narafala long kongregesen. Olsem aposol Pol i tokbaot long leta we hem i raetem i go long ol Kristin long Rom, yumi save kasem gudfala frut taem yumi talem ol gudfala toktok blong leftemap tingting blong yumi. (Rom 1:11, 12) Taem hem i raet long ol man Hibru, hem i givim strong advaes long olgeta we oli stap lego ol Kristin miting.—Hib. 10:24, 25.
6 Sipos yumi wantem harem gud long laef blong yumi, yumi mas tingbaot nid blong ol narafala. Baebol i leftemap tingting blong yumi blong lukaot ol rod blong mekem ol narafala oli glad. Taswe, ol Kristin miting blong yumi, oli rili blong givhan long yumi wanwan mo olgeta ya tu we oli joen wetem yumi long gudfala kampani ya. Yumi nidim blong joen long ol miting ya wetem fulhat blong yumi.
7 Aposol Pol i makem sem poen ya long advaes blong hem long Timoti, taem hem i talem se: “Yu mas traehad oltaem blong mekem ol fasin we God i wantem.” (1 Tim. 4:7) Yumi save askem yumi wan se, ‘?Mi mi traehad oltaem? ?Mi mi traehad blong kasem gudfala frut from ol samting we mi lanem long ol Kristin miting?’ Ansa blong yumi bambae i ‘yes,’ sipos yumi lesingud long ol samting we yumi harem long ol miting mo yumi traehad blong mekem ol samting ya i wok long laef blong yumi. Wetem ae blong bilif, yumi mas lukluk se Jeova nao hem i Bigfala Tija blong ol man blong hem.—Aes. 30:20.
8 Tiokratik Skul Mo Miting Blong Kingdom Wok: Tufala miting ya i blong givhan long yumi blong kam gud moa long Kristin minista wok. Tiokratik Skul i olsem ya. Long skul ya, ol studen oli kasem tijing mo advaes evri wik. Mo oli kasem jans blong soemaot se oli gohed gud long fasin blong toktok long fored blong ol man mo blong tijim Tok blong God. Be blong kasem beswan frut from skul ya, yu mas putum nem blong yu long skul, go long miting ya, joen oltaem, mo mekem ol tok blong yu wetem fulhat blong yu. Taem yu lesin long ol advaes mo traehad blong mekem i wok, samting ya bambae i givhan long yu blong gohed gud.
9 Miting blong Kingdom Wok i tijim yumi se Kristin minista wok i impoten tumas, mo hem i soem long yumi olsem wanem yumi save joen long wok ya blong mekem disaepol. ?Yu mo famle blong yu, yufala i stap kasem gudfala frut from ol samting we yumi lanem long tufala miting ya? Wan Kristin hasban mo waef, tufala i talem se: “Long wan miting blong Kingdom Wok, mifala i harem se mifala, olsem wan famle i mas mekem vas blong dei tugeta. Bifo long taem ya, mifala i no mekem vas blong dei, be naoia mifala i mekem.” ?Olsem wanem oli kasem gudfala frut from samting we oli mekem? Oli talem se: “Mifala i haremgud moa long ol storian blong mifala long taem blong kakae. Mifala i no moa stap rao long taem ya.” Ol smol pikinini, ?olgeta tu oli kasem gudfala frut from ol miting? Yes. Mama i talem se: “I klia nomo se ol miting oli tajem hat blong ol pikinini blong mifala. Wan dei mifala i faenemaot se smol boe blong mifala we i gat sikis yia nomo i bin giaman long mifala. Be long sem wik ya, fasfala tok long Tiokratik Skul i tokbaot fasin blong giaman. Fes blong hem i soemaot klia se tingting blong hem i jajem hem. Hem i luk papa blong hem mo i traem haedem hem long jea blong hem. Hem i kasemgud poen blong tok ya, mo mifala i no moa gat problem wetem hem bakegen.”
10 Wan sista we i paenia i talem se hem i glad long ol advaes long miting blong Kingdom Wok, we i blong mekem minista wok blong yumi i kam gud moa. ?From wanem? Hem i eksplenem se: “Mi faenem se mi stap talem sem toktok ya bakegen mo bakegen. Samtaem mi harem se ol advaes blong Kingdom Wok oli no save wokgud. Be long miting blong Kingdom Wok, oli leftemap tingting blong yumi blong traem folem advaes ya. Ale wetem strong tingting mi traehad blong mekem ol advaes i wok. !Ol advaes ya i mekem se Minista Wok blong mi i gud tumas!” Afta we hem i traehad sam wik blong statem wan stadi long faswan doa, hem i faenem wan gel we i bin prea long God blong givhan long hem, mo hem i statem wan stadi wetem hem.
11 Taem yu harem wan tok we i tokbaot advaes long Baebol long saed blong ol prapa disisen we yu wan i mas mekem, ?yu harem se Jeova nao i givim advaes ya i go stret long yu? Wan brata i harem olsem. Hem i talem se: “I no longtaem i pas, long wan miting, wan brata i givim wan tok mo i tokbaot ol defren kaen pleplei we oli stret mo we oli no stret long ol Kristin. Bifo, mi laekem wajem boksing long televisin. Be afta long miting ya, mi mekemap tingting blong mi se spot ya i wan long ol pleplei we oli no stret blong ol Kristin. From samting ya, mi no moa luk spot ya bakegen.” Yes, nating se brata ya i bin laekem tumas blong lukluk boksing, wetem tingting daon hem i letem Jeova i lidim hem.—Sam 11:5.
12 Pablik Tok, Wajtaoa Stadi, mo Buk Stadi: Ol pablik tok we yumi harem evri wik oli tokbaot ol defren poen long Baebol. ?Olsem wanem ol tok ya oli givhan long yu? Wan Kristin hasban i tokbaot ol gudfala frut we hem i kasem se: “Wan pablik tok i tokbaot ol frut blong tabu spirit. Brata we i givim tok ya, i tokbaot wanem we hem i mekem se, hem i jusum wan defren fasin evri wik, mo i wok long hem long ful wik ya. Long en blong wik, hem i tingtingbak olsem wanem hem i save soemaot fasin ya long ol samting we hem i mekem long wik ya. Long wik we i kam biaen, hem i traehad long wan narafala fasin bakegen. Mi laekem tumas samting we brata ya i mekem, ale mi tu mi traem blong mekem olsem.” !Hemia wan nambawan eksampel long wan we i mekem advaes long miting i wok long laef blong hem!
13 Wajtaoa Stadi i tijim yumi blong mekem ol rul blong Baebol i wok long ol defren haf blong laef blong yumi. Samting ya i givhan long yumi blong gat wan tingting mo hat we i kwaet, nating se laef i fulap long ol wari. Wajtaoa Stadi i givhan long yumi tu blong savegud long ol laswan save long trutok we sloslou oli kamaot. Eksampel, yumi harem gud long Wajtaoa stadi blong Mei 1, 1999, long ol atikol ya: “Ol Samting Ya Oli Mas Kamtru,” “Man We i Ridim Tok Ya i Mas Traem Luksave,” mo “!Yufala i Stap Lukaot Gud Mo i Wok Strong!” ?Ol stadi ya oli gat wanem paoa long yu? ?Yu soemaot long ol samting we yu mekem se yu tingting dip long woning blong Jisas long saed blong fiuja? ?Yu stap reregud long ol traem we bambae yu fesem taem yumi luk “rabis samting ya we i spolem evri samting . . . i stap stanap long wan tabu ples”? (Mat. 24:15-22, NW ) ?Ol mak we yu wantem kasem mo ol fasin blong yu oli soemaot we, impoten samting long laef blong yu i no hemia blong hivimap ol sas samting, be blong mekem nem blong Jeova i tabu? !Ol Wajtaoa Stadi, oli tijim yumi blong kasem gudfala frut naoia long ol samting we yumi mekem!
14 Tingbaot ol samting we yumi lanem long ol Buk Stadi evri wik. Naoia yumi stap stadi long buk ya Man We i Hae Moa Long Olgeta Man. Long ol fo manis we yumi stadi long buk ya, yumi luk se evri wik bilif blong yumi i stap gru moa. Olsem pikinini blong Jeova, we hem i laekem tumas, yumi tu i mas mekem bilif blong yumi i kam strong moa blong yumi save stanap strong.
15 Jeova i Tijim Yumi Blong Yumi Stap Glad Oltaem: Yumi save blokem plante trabol taem yumi lesingud long ol loa blong God. Antap long samting ya, yumi faenem trufala glad long laef blong yumi. Taem yumi letem Jeova i lidim yumi, yumi kam man we i joen long wok blong hem, be i no jes man we i lukluk wok ya nomo. Mo olgeta we oli stap mekem wok blong God, oli ol hapi man.—Kor. 3:9; Jem. 1:25
16 Tingbaot olsem wanem yu save mekem ol samting we yu lanem long ol miting blong kongregesen oli wok long laef blong yu. (Jon 13:17) Soemaot se yu glad blong joen long wok blong God wetem ful hat blong yu. Bambae yu harem gud tumas. Laef blong yu bambae i kam gud moa, i gat moa mining. Yes, bambae yu kasem gudfala frut.