Stap Strong Long Saed Blong Speret, Stap Klin Blong Mekem Wok Blong Jeova
1 Long Aesea 60:22, Jeova i mekem wan promes we yumi luk se hem i stap kamtru: “Man ya we i smolwan bambae i kam taosen man, mo hemia we i olsem nating nomo bambae i kam wan strongfala nesen. Mi, Jeova, mi mekem wok ya i spid moa long stret taem blong hem.” Taem yumi tingbaot wan nesen, yumi tingbaot wan bigfala hif blong ol man we oli kam hivap wan ples from oli gat sem intres mo oli stap wok aninit long paoa blong wan gavman nomo.
2 Ripot blong prij long 1991 i soemaot nyufala namba blong 4,278,820 man blong talemaot gud nyus long olgeta ples long wol, hem i gru olsem 6.5% antap moa long las yia. I tru we Jeova i stap hivimap wan bigfala hif blong ol gudfala man we oli wantem stap seraot long ol rabis fasin blong wol ya mo stap aninit long Kingdom gavman blong Pikinini blong hem, Jisas Kraes. Long evri yia namba blong olgeta we oli stap hivap wanples i stap gru nomo. Yumi glad blong kam haf blong nesen ya we yumi save tokbaot olsem wan sosaete blong nyufala wol. Long 1991, i gat 10,650,158 man oli kam long taem blong Memoriol, hemia i 7% antap moa long 1990. Samting ya i soemaot se i gat bigfala namba blong ol man bambae oli save joen wetem yumi olsem man blong stap aninit long Kingdom.
3 Yumi save se, i no evri man we oli kam long Memoriol oli bin stap seraot olgeta long wol ya blong kasem mak we Jeova i save akseptem olgeta olsem oli man blong hem. Ol man long olgeta nesen oli ‘kam long haos blong Jeova,’ be olgeta oli mas lanem ‘ol fasin blong Jeova’ blong oli “wokbaot long ol rod blong hem.” (Aes. 2:2-4) I gat bitim fo milyan man we oli kam long Memoriol oli bin akseptem tijing blong God, oli strong long saed blong speret blong oli stap gat klin fasin mo kasem mak blong joen long wok blong talemaot Kingdom. (Mat. 24:14) Jeova i glad long olgeta mo oli haremgud long ol gudfala samting we hem i givim long olgeta. ?Olsem wanem long sikis milyan man we oli bin kam long Memoriol, oli mas mekem wanem blong oli kam strong long saed blong speret mo blong oli kam klin blong mekem wok blong Jeova?
4 Olgeta oli mas ‘faet strong blong holem trutok ya we oli bilif long hem.’ (Jud 3) Taem oli jusum blong wokbaot long rod blong Jeova, Devel Setan i yusum ol traem, ol samting blong pulum olgeta, mo ol rabis fasin blong fosem olgeta blong mekem samting we i no stret. Olsem Pol, oli mas lukluk i go long Jeova blong givim paoa long olgeta blong oli winim ol samting ya. (Fil. 4:13) Jeova i yusum olgeta we oli strong long bilif blong givim paoa long ol man olsem. Pol i talem se “yumi ya we yumi strong long fasin ya blong bilif, yumi mas givhangud long olgeta we bilif blong olgeta i no strong.” (Rom 15:1, 2) Taem wan man we i strong mo wan man we i no strong tufala i joengud tugeta, olgeta oli gat paoa blong stanap strong. “Tufala man i moa gud i bitim wan man nomo, . . . [from we] sipos i gat man blong spolem man i save winim man we i stap hem wan nomo, be taem i gat tu man tufala tugeta i save stanap agensem hem.”—Ekles. 4:9, 12.
5 Hemia i min se i stret we ol nyuwan oli dipen long yumi ya we Jeova i stap yusum blong givim paoa long olgeta. Yumi ol Kristin we yumi givim laef blong yumi long Jeova finis yumi mas stap strong long saed blong speret sipos yumi wantem givhan long ol nyuwan. Ol Kristin we oli strong oli save ‘givhan long ol man blong oli kasem paoa ya we Tabu Speret i stap givim blong mekem ol man oli strong,’ from samting ya oli stap ‘givgivhan long olgeta blong mekem bilif blong olgeta i strong.’ (Rom 1:11, 12) Hemia i wan nambawan rod we Jeova i stap yusum blong joenem yumi mo mekem se ‘yumi mas stanap strong long bilif blong yumi.’—1 Pita 5:9-11.
6 Yumi mas traem blong givhan long ol nyuwan mo long semtaem yumi mas tingbaot ol samting we yumi nidim long saed blong speret. (Mat. 5:3) Sipos yumi stap strong long saed blong speret yumi save gat paoa. Hemia samting we yumi mas lukaotgud long hem mo mekem i strong sipos oltaem yumi tekem kakae long saed blong speret. Jeova i yusum ogenaesesen blong hem blong givim ol gudfala program blong stadi long Tok blong hem. Ol faef miting blong kongregesen long evri wik oli impoten tumas, “blong mekem yumi strong blong laekem ol man, mo blong mekem ol gudfala fasin.”—Hib. 10:24.
7 Ol miting ya oli givhan moa long yumi taem yumi stap mekem prapa stadi blong yumi wanwan mo famle stadi. I isi blong yumi ridim mo tingbaot vas blong dei, folem program blong Tiokratik Skul blong ridim Baebol, mo mekemrere Buk Stadi mo Wajtaoa Stadi. Ol famle oli mas tingbaot wan plan blong mekem samting ya, mo oli mas mekem evritaem. Mo tu, hed blong famle i mas luk se program blong stadi i blong givhan long famle blong kasem ol mak we famle i nidim long saed blong speret. Long rod ya, “wan famle i save kam strong moa, . . . hem i save stanap strong.” (Prov. 24:3) Sipos yumi stap tingbaot prapa stadi blong yumi wanwan mo famle stadi, yumi save sua se Jeova bambae i blesem yumi mo speret blong hem bambae i givhan long yumi blong winim ol defren traem.—Jem. 1:2, 3; 1 Pita 4:11.
8 Stap Klin mo No Gat Poen: Jeova i invaetem yumi blong kam kolosap long hem, mo long semtaem, hem i mekem i klia se samting ya i kamaot from we yumi soemaot bilif long blad blong Jisas we i ron, blong “mekem yumi klin long olgeta sin blong yumi.” (1 Jon 1:7; mo lukluk Hibrus 9:14.) Yumi save gohed blong mekem bilif blong yumi i strong sipos yumi stap mekem prapa stadi blong yumi wanwan long Tok blong God mo mekem ol samting we yumi lanem i wok long laef blong yumi. Sam man oli foldaon from we oli no moa tekem kakae long saed blong speret no oli no traehad blong mekem ol samting we oli lanem i wok long laef blong olgeta. Samting ya i mekem se i isi nomo blong Setan i winim olgeta. Sam oli kam slak long saed blong speret, nao oli no moa prij. I gat sam narafala we oli foldaon long ol rabis fasin, nao oli aot long kongregesen. Pol i givim woning ya se: “Man we i ting se i stap stanap strong, hem i mas lukaot gud blong bambae i no foldaon bakegen.” (1 Kor. 10:12) Sipos yumi no wantem mekem stadi, kam long ol miting, mo prij, ol rabis fasin mo ol traem oli save kasem yumi olsem wan trap nomo.—Hib. 2:1; 2 Pita 2:20-22.
9 I impoten blong yumi stap klin long evri samting: olsem long saed blong bodi blong yumi, tingting blong yumi, speret, mo long fasin blong yumi. (2 Kor. 7:1) Ol fasin blong wol raonabaot long yumi oli kam moa nogud evri dei. Oltaem Devel Setan i stap traehad moa blong trikim yumi blong kasem yumi long trap blong hem. Taem yumi stap strong long saed blong speret, samting ya i mekem se yumi no save foldaon from ‘yumi savegud ol plan blong Setan’ finis. (2 Kor. 2:11) Ol samting we yumi lanem mo ol advaes we yumi kasem long ogenaesesen blong Jeova oli givhan long yumi blong luksave mo blokem ol rabis fasin.
10 Olgeta we oli stap lidim ol man insaed long kongregesen oli gat responsabiliti blong soem gudfala eksampel long ol narafala man long saed blong fasin blong stap strong mo stap klin. Pol i tokbaot responsabiliti ya taem hem i se: “Yufala i no fogetem ol man ya we bifo oli stap lidim yufala, . . . yufala i mas stap tingbaot fasin blong olgeta, we laef blong olgeta i olsem wanem, mo olgeta oli ded olsem wanem. Nao yufala i mas biaen long olgeta, long fasin blong bilif blong olgeta.” (Hib. 13:7) I impoten long ol elda mo ol man blong givhan blong oli gat gudfala fasin olsem eksampel mo tu taem oli mekem responsabiliti blong olgeta olsem ol hed blong famle. Oli mas traehad blong kam olsem yangfala Timote, we oli talem long hem se, “long ol tok mo wok blong yu, yu mas soemaot stret fasin long fes blong ol Kristin man . . . blong laekem tumas ol man, mo blong bilif, mo blong mekem laef blong yu i klin gud.” (1 Tim. 4:12; 1 Pita 5:3) Yumi joen long responsabiliti ya tu blong gat gud eksampel taem yumi holem ol gudfala fasin. Ol man we oli nyuwan long trutok samtaem oli save jajem trutok, mo ogenaesesen blong Jeova, taem oli lukluk fasin blong yumi. Yumi wantem mekem se ol fasin blong yumi oli leftemap tingting blong olgeta blong oli kam haf long klin ogenaesesen blong Jeova.
11 Wok blong hivimap ol man blong kasem sef long taem blong “bigfala trabol” i stap spid moa. (Rev. 7:14) Olgeta ya nomo we oli strong long saed blong speret mo oli stap klin oli save kasem sef long taem ya. Hem i dipen long ol impoten poen ya se: (1) gohed blong mekem prapa stadi wanwan mo tingting dip long Tok blong God, (2) soemaot trufala intres long ol man mo traehad blong leftemap tingting blong olgeta, mo (3) joen blong wok tugeta blong holem klin fasin we bambae i givim ona long nem blong Jeova. Sipos yumi mekem ol samting ya, bambae Jeova i blesem yumi mo lukaot long yumi taem wol ya i finis. Bambae yumi sua se yumi save stap long medel blong olgeta we “[Hae God] i stap sevem olgeta.”—Sam 31:23.