Statem Baebol Stadi Long Buk Ya Man We i Hae Moa
1 Bambae yu mo man blong haos yutufala i haremgud moa mo kasem ol gudfala samting long wan Baebol stadi. I no gat wan samting we yu save skelem wetem glad ya we yu kasem taem yu serem save blong Baebol wetem ol narafala.—Prov. 11:25.
2 Saen Blong Ol Lasdei: Sipos yu yusum tingting we i stap long haf antap mo statem storeyan wetem traket ya ?Wol Bambae i Lus No i Stap?, ?olsem wanem nao yu save statem Baebol stadi taem yu yusum japta 111 blong buk ya Man We i Hae Moa? Openem buk long japta 111, mo ridim ol tri fas haf. Maet yu save askem faswan kwestin we i stap long en blong japta: “?From wanem ol aposol oli askem kwestin long Jisas? ?Be oli stap tingbaot wanem narafala samting tu?” Halpem man blong haos blong tingtinggud long ansa, mo yusum pija taem yu tij. Afta yu ridim haf fo kasem sikis, askem namba tu kwestin: “?Wanem haf blong profet blong Jisas i kamtru long 70 K.T.? ?Be wanem samting i no kamaot long taem ya?” Sipos i luk olsem se man blong haos i intres mo i gat taem, yu save gohed long storeyan blong yu.
3 Sipos i luk olsem se wan narafala taem i moa stret long man blong haos, yu save askem: “?Yu wantem save moa wetaem bambae en blong fasin blong naoia i kamtru? Yu save mekem plan blong gobak blong ansa long kwestin ya.”
4 ?Wan Wol We i Gat Pis Long Hem Bambae i Save Kamtru? Sipos yu yusum traket ya Laef Long Pis Blong Nyufala Wol blong lidim i go long buk ya Man We i Hae Moa, ?olsem wanem japta 133 i save halpem yu blong statem Baebol stadi?
Afta we yu ridim 2 Pita 3:13, yu save ridim no yu save talem sam poen long namba tu haf long pej 3 blong traket mo talem se:
◼ “Jisas Kraes, Pikinini blong God, bambae i King long Kingdom blong Jeova. Makem olsem wanem buk ya Man We i Hae Moa Long Olgeta Man, i tokbaot Jisas mo mekem yumi save long wanem we Jisas bambae i mekem long fyuja.” Nao ridim ful japta. Askem faswan kwestin we i stap long en blong japta long man blong haos: “ ‘?Olgeta we oli pastru long Amageden wetem ol pikinini blong olgeta, oli save mekem wanem gudfala samting biaen?’ [Letem man i ansa. Yu save askem ol narafala kwestin long sem fasin.] ?Yu wantem kam haf blong nyufala wol ya we King Jisas bambae i rul long hem? Mi glad blong tekem jans evri wik blong yusum Baebol blong halpem yu blong luksave olsem wanem yu save kasem samting ya.”
5 Maet sam man oli intres tu blong storeyan moa long Jisas taem yu mekem visit ya.
Yu save talem se:
◼ “Oli traehad blong wokem buk ya blong tokbaot laef blong Jisas long wol olsem we ol fo Gospel oli tokbaot. ?Yu wantem save moa long laef blong Jisas long wol?” Sipos man blong haos i agri, maet yu wantem tokbaot faswan merikel blong Jisas long japta 15.
6 I gat plante moa man yet we hat blong olgeta i stret we oli laekem stret fasin mo oli stap lukaot ansa blong ol trabol we oli stap kasem. Tru ya, fasin traehad blong yusum Baebol stadi blong tijim ol tijing blong Jisas Kraes, hem i wan nambawan samting.