Yusum Traket Blong Seremaot Buk Ya Man We i Hae Moa
1 Long Jun, plante pablisa bambae oli yusum traket blong pulum intres long buk ya Man We i Hae Moa Long Olgeta Man. Samting ya bambae i halpem olgeta blong luksave intres blong man mo luk sipos i stret blong seremaot buk long man blong haos long taem ya we oli visitim hem fastaem.
2 ?Wol Bambae I Lus No I Stap? Ol traket oli halpem yumi bigwan blong statem ol storeyan. Oli halpem yumi blong pulum tingting blong man blong haos from we ol traket oli stap tokbaot sam gudfala poen we i stret long olgeta.
Eksampel, maet yu save talem wan samting olsem ya:
◼ “Taem mifala i toktok wetem ol man, mifala i faenemaot se plante oli wari long . . . [jusum wan samting we i jes kamaot nomo long nyus]. I luk olsem se laef blong wol i stap go nogud moa. Samfala oli wantem save sipos wol ya bambae i stap no i lus. ?Wanem tingting blong yu long samting ya? [Letem man blong haos i ansa. Plante man oli wantem wan samting we i gud.] Mi bin ridim wan samting we i save leftemap tingting mo mi wantem serem wetem yu. [Givim traket ya ?Wol Bambae i Lus No i Stap? long man blong haos. Yu mas gat sem traket long han blong yu tu.] Makem olsem wanem Jisas i talem profet tok se. . . ” Ridim wan haf long pej 4 no 5 we i stret wetem samting we yu tokbaot long fastok blong yu. Sipos man blong haos i soem trufala intres, maet yu wantem soem buk ya Man We i Hae Moa, long hem. Sipos i stret, yu openem i go long sam moa profet tok blong Jisas we japta 111 i tokbaot. Bifo yu lego man blong haos, mekem sua se yu askem kwestin long wan poen we bambae yu tokbaot taem yu gobak.
3 Laef Long Pis Blong Nyufala Wol: ?Laef Long Pis Blong Wan Nyufala Wol i minim wanem long yu? Plante taem, ol man oli tingbaot ol naesfala ples blong luk, ol naes bigfala reva mo ol naes vali we i no gat samting i spolem, wetem ol naesfala anamol we oli laef long pis wetem ol narafala. Olgeta we oli harem nogud from fasin blong laef blong wol tede oli haremgud long promes blong wan nyufala wol.
4 ?Yu rere blong givim wan samting we ol man raonabaot long yu, ol fren blong yu long wok, mo olgeta we yu faenem long wok blong prij long ol haos wanwan oli laekem mo haremgud long hem?
Taem yu yusum traket ya “Laef Long Pis Long Nyufala Wol,” yu save talem wan samting olsemia:
◼ “?Yu ting se bambae ol man oli save laef long pis olsem we i stap long traket ya, no no gat? [Letem man blong haos i ansa.] Plis yu luk long laswan tok blong faswan haf long pej 2. Hem i askem se: ‘?Be yu yu ting se hemia wan drim nomo? ?Yu Yu ting se yumi save bilif we bambae ol samting ya oli kamtru?’ [Nao ridim nekis haf long traket.] Tok ya long saed blong nyufala heven mo nyufala wol i kamaot long Baebol long 2 Pita 3:13. Sipos i oraet long yu, yu save karem Baebol blong yu mo yumi save ridim Ol Sam 104:5 blong save moa long fyuja blong wol.” No yu save ridim vas ya long Baebol blong yu nomo. Sipos man ya i soem intres, pulum i go long buk ya Man We i Hae Moa, japta 133.
5 Ol narafala visit biaen we bambae yu mekem i blong putum ‘wora’ long sid we yu planem finis. (1 Korin 3:6, 7) Haf we i kam biaen i givim sam tingting olsem wanem blong statem stadi wetem buk ya Man We i Hae Moa, maet long fastaem we yu toktok wetem man no long taem we yu mekem visit bakegen.