Yusum Ol Traket Blong Statem Storeyan
1 ?Yu yu agri se toktok we i gat paoa i dipen bigwan long strong tingting we yumi gat blong statem storeyan? Samting we i hadwok blong mekem hemia blong talem wan samting we i save pulum intres blong man mo mekem hem i joen insaed long storeyan. ?Be olsem wanem nao yumi save mekem samting ya long wan rod we i wok gud?
2 Plante pablisa oli faenem se fasin blong jusum sam gudfala tok mo blong soem wan long ol traket we oli stap tokbaot Baebol, oli save statem storeyan wetem ol man. Ol taetel oli pulum tingting blong man, mo ol pija oli gat naesfala kala mo oli pulum ae. Wan traket i no daonem tingting blong wan man, mekem se hem i ting se i gat fulap samting blong ridim. Nating se i olsem, ol sotfala mesej insaed long ol traket oli kasem fulwan intres blong man mo yumi save yusum olgeta blong statem ol Baebol stadi.
3 Hemia nao filing blong wan Witnes sista: “Long wan wol we i bisi tumas, ol man oli no wantem tekem tumas taem blong rid. Ol traket oli jes longwan inaf blong givim wan impoten mesej be oli no longwan tumas we i mekem se ol man oli gowe long hem bifo we oli tekem taem blong lukluk gud. Mi mi ridim plante long ol traket ya, mo biaen mi kasem trutok.” Yumi neva mas ting nating long paoa blong Tok blong God olsem we oli eksplenem insaed long ol smol pepa ya.—Hib. 4:12; skelem wetem Sekaraea 4:10; Jemes 3:4, 5.
4 Fo Rod We Oli Isi: Plante pablisa oli kasem gudfala frut taem oli yusum wan rod we i isi. (1) Soem sam long ol traket ya long wan man, mo askem weswan nao hem i intres long hem. (2) Afta we hem i jusum wan traket, askem wan kwestin we yu rerem finis, we bambae i makem klia wan stamba poen insaed long traket ya. (3) Ridim wan wan paragraf no wan vas insaed long traket ya blong givim ansa long kwestin blong yu. (4) Sipos man ya i laekem blong lesin long yu, gohed blong tokbaot ol haf blong traket ya no lukluk i go long buklet ya Wanem no wan japta insaed long Save buk we i givim moa save. Long rod ya, maet yu save statem wan Baebol stadi stret long taem ya. Ol tingting we oli kamaot biaen, bambae oli save halpem yu blong rere blong tokbaot fo long ol traket ya.
5 Taetel blong traket “?Hu i Rili Rulum Wol?” i wan kwestin we i mekem man i tingting: Sipos man ya we yu stap toktok wetem hem, i ansa long kwestin ya mo i talem se “God” no “Mi no save,” ridim tufala sentens we oli stap long stat blong pej 2 mo faswan paragraf long pej 3. Tokbaot ol impoten poen blong 1 Jon 5:19 mo Revelesen 12:9. Nating sipos tingting blong man ya i hafhaf se Devel Setan i stap no hem i luksave paoa blong Setan long wol ya, yu save gohed blong mekem hem i tingting wetem haf we i kam biaen long smol stamba tok ya “Ol Samting We Oli Stap Hapen Long Wol Oli Soemaot” blong gohed long storeyan ya. Sipos hem i soem intres, askem hem sipos hem i wantem we yu eksplenem se Devel Setan i kamaot long wea, mo yusum ol poen long pej 3 mo 4 blong traket ya.
6 Traket ya: “?Olsem Wanem Long Ol Fren Blong Yumi We Oli Ded?” i save pulum intres blong man kwiktaem: Maet yu statem wan storeyan taem yu askem se:
◼ “?Yu yu ting se bae yumi save luk bakegen olgeta fren mo famle blong yu we oli ded?” Afta we man ya i ansa, yu save go long seken paragraf long pej 4 blong traket ya mo ridim Jon 5: 28,29. Biaen eksplenem se i givhan bigwan blong kasem save “Ded, Mo Wanem Samting i Kamaot Long Ded,” we hem i faswan smol stamba tok long traket ya. Askem hem blong yutufala i tokbaot haf ya tugeta.
7 “Harem Gud Long Famle Laef” i wan traket we i pulum intres blong plante famle: Taem yu yusum, yu save talem se:
◼ “Ating bambae yu agri se famle i fesem plante hadtaem tede. ?Wanem samting nao yu ting se i save mekem famle i joengud?” Afta we man ya i ansa, pulum tingting blong hem i go long ol poen we oli stap long fas paragraf long pej 6. Tekem wan vas we i stap long pej 4 mo 5 blong traket ya, mo eksplenem se i minim wanem. Biaen statem wan fri Baebol stadi wetem hem.
8 Traket ya: “From Wanem Yu Save Trastem Baebol”, maet yumi save yusum wetem fastok ya:
◼ “Plante man oli harem finis stori blong Ken mo Ebel, we i stap long faswan buk blong Baebol. Stori we i stap long Jenesis i tokbaot waef blong Ken tu. ?Yu bin tingbaot samtaem se hem i kam long wea?” Yusum laswan paragraf long pej 2 blong traket ya blong givim ansa. Eksplenem se traket ya tu i eksplenem ol impoten save blong Baebol we i tokbaot wanem nao bambae i kamaot long fiuja blong yumi. Stat wetem namba tri paragraf long pej 5, gohed long storeyan, mo yusum ol vas we oli stap.
9 Wok blong seraotem ol traket ya we oli tokbaot Baebol, i bin wokgud longtaem finis i kam, mo hem i wan gudfala rod blong talemaot gud nius. From we oli isi blong karem i go long eni ples we yumi go long hem, yumi save yusum gud olgeta long wok blong prij long ol haos wanwan mo taem yu tekem jans blong givim witnes. Ol traket oli impoten blong halpem yumi blong mekem minista wok blong yumi fulwan. Meksua se yu karem ol defren kaen traket ya, mo yusum olgeta oltaem blong statem storeyan wetem ol man.—Kol. 4:17.