From Wanem Ol Traket Oli Nambawan Long Minista Wok Blong Yumi Tede
1 Long Wajtaoa blong Janewari 1, 1991, pej 30 (Engglis no Franis), i gat wan ekspiryens we stampa tok blong hem se: “Hem i Faenem Wan Traket Long Rod Blong Tren.” Hem i tokbaot wan man we i bos long wok blong fiksimap rod blong tren we i faenem wan traket aninit long aean we tren i stap ron antap long hem. Kwik taem nomo hem i ridim traket ya mo hem i talem long man blong gel blong hem se: “!Tede mi faenem tru tok!” Tufala i mekem oda long sam moa buk mo stadi long olgeta. Naoia i gat bitim wan handred memba blong famle blong olgeta we oli stap strong long trutok. Samting ya i soem wanem i save kamaot sipos man i ridim wan traket nomo.
2 Yusum Ol Jans Blong Yu: Long olgeta ples ol brata oli stap yusum oltaem ol jans blong givimaot ol traket. Wan yangfala Wetnes i luksave se skul tija blong hem i harem nogud from ded blong mama blong hasban blong hem. Yangfala sista ya i raetem wan leta i go long tija blong hem blong leftemap tingting blong hem mo hem i putum insaed long leta traket ya ?Olsem Wanem Long Ol Fren Blong Yumi We Oli Ded? Tija ya i raetem wan not blong talem tangkyu long hem mo afta hem i toktok wetem yangfala sista ya. Naoia tija ya i stap karem ol magasin oltaem long sista ya.
3 Sam pablisa we oli stap prij long wan rod we i go long wan beregraon oli luk sam man we oli stap pentem ol gref. Ol pablisa ya oli yusum jans ya blong givim sam traket long olgeta. Long nekis dei blong hem, hem i wan holede mo plante man oli go visitim beregraon, nao ol pablisa ya oli wantem blong go stanap long get blong beregraon ya mo givimaot ol traket. Oli seremaot bitim faef handred traket. I gat tri man nomo we oli no akseptem ol traket. Long nekis yia blong hem, ol pablisa oli gobak mo oli seremaot bitim wan taosen traket. I gat sikis man nomo we oli no akseptem. Plante man oli talem tangkyu from. Wan man i stat ridim traket taem hem i lego ples ya, mo smol taem biaen hem i kambak blong toktok wetem sista we i givim traket long hem. Hem i talem se: “I gat wan man we mi wantem se bambae hem i ridim mesej ya. Yu save givim wan moa.”
4 Saes blong ol traket oli stret mo isi blong karem wetem yumi long olgeta ples we yumi go long hem. Taem yumi holem jans blong storeyan wetem ol narafala, maet oli strenja no oli fren blong yumi, yumi mas traehad blong talem wan smol tok we i save lidim yumi i go blong tokbaot wan long ol eit traket we yumi gat finis. Yumi save mekem olsem taem yumi toktok wetem ol man we oli stap laef kolosap long yumi, taem yumi go shoping no wet long wan apoenmen, taem yumi visitim ol famle, no long plante narafala taem tu.
5 From Wanem I Wokgud: Ol traket oli gat kala we i pulum ae. Oli gat ol toktok we oli sot nomo. Ol man blong haos mo olgeta we yumi holem jans blong prij long olgeta oli no save harem se i gat plante samting tumas blong ridim. Ol toktok insaed oli pulum man blong ridim moa mo oli tijim man. Man we i ridim i kasem stret tingting blong Baebol we traket ya i tokbaot. Afta we wan yangfala i kasem traket ya Laef Long Pis Blong Nyufala Wol mo wan i stadi wetem hem, hem i talem se: “!Mi neva harem wan tok olsem long fasin blong wol tede we i leftemap tingting blong man!”
6 Yumi wantem yusum ol traket ya long ol stret taem. Plante pablisa oli faenem se ol traket ya oli givhan blong statem storeyan long wok blong prij long ol haos wanwan. Plante stadi we naoia oli stap mekem oli statem wetem wan traket. Long pej 4 blong haf ya blong Kingdom Wok Blong Yumi, i gat sam advaes we oli save wok long fasin blong yusumgud ol traket. Yes, ol traket oli smol be oli nambawan tul long minista wok blong yumi.