Yu Yusum Ol Traket Blong Talemaot Gud Nius
1. ?Ol man blong God oli yusum ol traket olsem wanem?
1 Longtaem finis i kam, ol man blong Jehova oli yusum ol traket we oli stanap long Baebol, blong talemaot gud nius. Long yia 1880, C.T. Russell mo ol fren blong hem oli wokem ol traket we nem blong olgeta Bible Students’ Tracts. Oli givim ol traket ya long ol man we oli ridim Wajtaoa, blong oli givimaot long eni man we oli faenem. Long taem ya, ol man blong God oli tinghae long ol traket. Ale long yia 1884, C.T. Russell i rejistarem nem blong wan kampani we i no blong winim mane, be i blong givhan blong mekem wok blong Kingdom i go moa. Long taem ya nao, hem i ademap toktok ya “traket” (Tract) long nem blong kampani ya. Ful nem blong kampani ya, hemia Zion’s Watch Tower Tract Society, we tede i kam Watch Tower Bible and Tract Society of Pennsylvania. Bifo long yia 1918, ol Baebol studen oli seremaot bitim 300 milian traket. Tede yet, ol traket oli ol gudfala tul we yumi save yusum blong talemaot gud nius.
2. ?From wanem ol traket oli wok gud?
2 ?From Wanem Oli Wok Gud?: Ol traket oli gat plante kala long olgeta mo oli pulum ae blong ol man isi nomo. Ol toktok insaed oli sot nomo, oli pulum tingting blong man, mo oli givim save long man. Man we i fraet blong ridim magasin no buk, i glad moa blong ridim traket. I isi nomo long ol niufala pablisa mo ol pikinini blong seremaot ol traket. Mo tu, i isi blong yumi karem ol traket ya from we oli smol nomo.
3. Yu tokbaot stori blong yu, no stori we i stap long haf ya, we i soemaot se ol traket oli wok gud.
3 Plante brata mo sista oli kasem save long trutok taem oli ridim wan traket. Wan woman long Haiti i luk wan long ol traket blong yumi long rod. Hem i pikimap traket ya, i ridim, mo i talem se: “!Mi faenem trutok!” Biaen, hem i go long ol miting long Haos Kingdom, i stadi Baebol, mo i tekem baptaes. Samting ya i hapen from paoa blong Tok blong God we i stap insaed long traket ya.
4. ?Long manis blong seremaot ol traket, yumi wantem blong mekem wanem?
4 Long Ol Haos Wanwan: Yumi save yusum ol traket blong talemaot gud nius, from we oli wok gud. Taswe bambae yumi seremaot olgeta long manis Novemba, mo long sam narafala manis bakegen. Yumi wantem givimaot long ol man. Be i no hemia nomo, yumi wantem yusum olgeta tu blong statem storian wetem ol man. Sipos man we yumi prij long hem no we yumi visitim i wantem save moa, yumi save soemaot long hem olsem wanem yumi mekem Baebol stadi wetem buk ya Baebol Tijim, no wan narafala buk we yumi yusum blong stadi wetem ol man. ?Yumi save seremaot traket long ol haos wanwan olsem wanem? I gat plante defdefren traket, taswe yumi mas save gud olgeta we yumi wantem seremaot long ol man.
5. ?Yumi save seremaot ol traket long ol haos wanwan olsem wanem?
5 Fastok mo storian blong yumi i mas laenap wetem ol man long ples blong yumi mo wetem traket we yumi wantem seremaot. Long stat, yumi givim traket long man blong haos. Maet naesfala pija long fas pej i pulum tingting blong hem. Sipos no, yumi save soemaot plante defren traket long hem, mo yumi talem long hem blong i jusum wan we hem i laekem. Taem yumi prij long ol ples we ol man oli fraet blong openem doa long ol strenja, yumi save leftemap traket ya blong man i luk fas pej blong hem. Maet yumi askem long hem sipos yumi save pusum traket ya i go aninit long doa, mo biaen yumi askem long hem blong i talem tingting blong hem long traket ya. Sipos stamba tok blong traket ya i wan kwestin, yumi save askem long hem blong i talem tingting blong hem long kwestin ya. Sipos no, yumi nomo yumi askem wan kwestin we i save pulum tingting blong hem, blong hem i storian wetem yumi. Biaen, yumi save ridim wan haf blong traket ya, mo taem i gat sam kwestin, yumi save spel smol mo yumi askem long man blong i talem tingting blong hem. Yumi save ridim ol stamba vas stret long Baebol blong yumi. Afta we yumi tokbaot sam haf blong traket ya finis, yumi save finisim storian ya mo yumi mekem plan blong gobak luk hem. Sipos long kongregesen blong yumi, yumi stap lego ol buk long ol haos we i no gat man long olgeta, yumi save lego wan traket. Be yumi putum traket ya long wan ples we ol man long rod oli no save luk.
6. ?Yumi save seremaot ol traket long ol man long rod olsem wanem?
6 Yumi Prij Long Ol Man Long Rod: ?Olsem wanem? ?Yu yu yusum ol traket finis blong prij long ol man long rod? Sam man oli hareap tumas, mo oli no wantem stop blong storian wetem yumi. Maet i no isi blong yumi luksave sipos oli intres. Long taem olsem, yumi no givimaot ol niufala magasin long olgeta, from we yumi no save se bambae oli ridim olgeta no nogat, be i gud blong givim wan traket nomo. Pija we i stap long fas pej blong traket i save pulum tingting blong man, mo toktok insaed i sot nomo, taswe maet ol man oli glad blong ridim taem oli gat smol taem. Be sipos yumi luk se ol man we oli wokbaot long rod oli no hareap, yumi save tokbaot sam haf blong traket wetem olgeta.
7. Yu talem sam stori we i soemaot rod blong seremaot ol traket taem yumi tekem janis blong prij.
7 Yumi Tekem Janis Blong Prij: I isi blong yumi seremaot traket taem yumi tekem janis blong prij. Taem wan brata i goaot long haos blong hem, hem i tekem sam traket mo i fulumap olgeta long poket blong sot blong hem. Sipos hem i mitim wan man, olsem man we i wok long stoa, hem i talem long man ya se hem i wantem givim wan samting long hem blong i ridim, ale i givim traket long hem. Wan man mo woman blong hem, tufala i go long New York City blong spel. Tufala i kasem save se bambae tufala i mitim plante man we oli kam long ol defdefren kantri. Ale tufala i tekem smol buk ya Good News for All Nations, wetem plante traket we oli stap long defdefren lanwis. Biaen, taem tufala i harem wan man we i stap salem samting long saed blong rod, i toktok narafala lanwis, tufala i givim wan traket long hem long lanwis blong hem. Tufala i mekem sem mak long man we i sidaon klosap long tufala long ples blong spel, mo long restoron.
8. ?Long wanem rod ol traket oli sem mak long ol sid?
8 Yu Sakem Sid Long Garen Blong Yu: Ol traket oli sem mak long ol sid. Wan man blong mekem garen i sakem ol sid olbaot long garen blong hem, from we hem i no save weswan bambae i gru. Prija 11:6 i talem se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.” Taswe, i gud yumi gohed blong givimaot save we i “tijim ol narafala man,” taem yumi yusum tul ya we i wok gud long wok blong prij.—Prov. 15:7.
[Tok blong makem poen long pej 3]
Yumi save yusum ol traket blong talemaot gud nius, from we oli wok gud. Taswe bambae yumi seremaot olgeta long manis Novemba, mo long sam narafala manis bakegen