Yusum Ol Traket Blong Karem Frut From

¹ Ogenaesesen blong Jeova long taem blong yumi i yusumgud ol traket longtaem finis i kam. Nem blong kampani blong yumi we loa i agri long hem, Watch Tower Bible and Tract Society, i soemaot tru se traket i gat bigfala ples long wok blong talemaot gud nyus. Stat long 1881 kasem 1918, ol man blong Jeova oli seremaot bitim 300 milyan traket. Plante long olgeta we oli kam haf blong ol haf brata blong Kraes long taem blong yumi, oli kasem trutok fastaem tru long ol traket ya bifo.

² Long 1987 oli wokem fo nyufala traket long kala blong pusum ol man blong yusum ol smol traket ya long wok blong prij. Oli bin talemaot long Distrik Asembli blong 1992 “Ol Man Blong Karem Laet” se ol traket ya bambae oli kam plante wetem fo narafala traket we oli wokem long kala we i wekemap intres blong man. I gat Help Blong Olgeta We Tingting Blong Olgeta i Foldaon, Mekem Laef Blong Famle i Glad, ?Hu i Stap Rulum Wol Ya?, mo ?Wol Ya Bambae i Lus No i Stap? ?Yu yu stap yusum olgeta eit traket ya blong karem frut long minista wok blong yu?

³ Gudfala frut i save kamaot sipos yumi yusumgud ol traket ya. I gud we yumi savegud wanwan long ol traket ya. Eksampel, ?yu ridimgud olgeta blong kasem save long wanem samting wanwan long olgeta i tokbaot? ?Yu yu tingbaot wanem kaen man wanwan traket i stret long hem? Fasin blong yu savegud wanwan long ol traket ya bambae i mekem se yu no fraet blong yusum olgeta long wok blong prij long ol haos wanwan mo tu long plante taem we yu gat jans blong prij.

⁴ Yusum Long Minista Wok Long Ol Haos Wanwan: Wan seket elda i raetem se: “Mi mi karem frut taem mi statem bighaf blong storeyan blong mi wetem traket.” ?Yu yu traem rod ya finis? ?From wanem yu no yusum traket blong statem storeyan blong yu? Wetem eit traket, naoia yumi gat eit fastok we oli pulum man we yumi save jusum. Wanwan traket i givim jans long yumi blong statem wan Baebol stadi long fastaem we yumi toktok wetem man no taem yumi mekem visit bakegen.

⁵ I gat ol narafala jans tu blong yusum traket. Taem yu stap storeyan wetem man blong haos, yu lanem se man ya i bin lusum wan man we hem i laekem tumas long ded, no wan long famle i sik. Ol man we oli harem nogud bigwan olsem no we oli traem blong winim wan trabol, oltaem oli kam slak long tingting mo tingting blong olgeta i foldaon. !Yumi save soem lav long olgeta sipos yumi tokbaot ol tok we oli stap long traket ya Help Blong Olgeta We Tingting Blong Olgeta i Foldaon! Maet yu lanem se man ya i jes divos nomo no hem i lusum wok blong hem. Ekspiryens olsem i save spolem man mo sloslou i save spolem famle. Yusum kwestin long pej 2 blong traket Mekem Laef Blong Famle i Glad: “?From wanem ol famle tede oli kasem plante bigfala trabol olsem?” Maet hemia wan kwestin we man i gat long tingting blong hem oltaem. Nating se hem i no soem intres kwiktaem, be bambae hem i ridim traket samtaem afta.​—⁠Ekles. 11⁠:⁠6.

⁶ Long sam kongregesen oli wokem teritori oltaem, mo plante man oli gat sam long ol buk blong yumi finis. Taem yumi yusum traket, bambae yumi gat jans blong tokbaot sam samting we i save intres long ol man blong haos, pulum olgeta blong oli talemaot tingting blong olgeta, mo pulum olgeta blong tingbaot hop blong Kingdom. Putum wan kwestin long tingting blong olgeta we yu save tokbaot samtaem biaen. Mekem visit bakegen, mo mekem intres ya i gru. Long stret taem yumi save yusum wan buklet no wan buk we oli gat finis blong statem Baebol stadi wetem olgeta.

⁷ Holem Ol Jans Blong Yusum Traket: Sipos yumi holem ol traket long wan ples we i isi blong tekemaot​—⁠long poket blong sot blong yu, long paos mane, long basket blong prij​—⁠yumi save yusum olgeta long plante defren taem, long ol ples we yumi save faenem ol man long olgeta. Yusum olgeta taem yu go pem ol samting long stoa, taem yu stap go long wan narafala ples no taem yu toktok wetem ol famle no taem wan man i kam visitim yu. Traket i halpem yumi blong givim wan sot wetnes. Traket i no wan samting we i fulumap hed blong man long plante samting wantaem be hem i go stret long poen. Hem i moa isi blong man i karem bitim wan buk no magasin, from i no gat plante samting insaed blong ridim.

⁸ Yu mas rere blong holem jans blong seremaot traket long ples blong wok, long restorong, ples blong fulumap bensin, mo ol narafala ples olsem. Taem hem i stap mekemrere blong karem bubu blong hem i go long dokta, wan sista i mekem sua se hem i karem sam traket wetem hem. Taem hem i stap long ofis blong dokta, hem i statem storeyan wetem wan woman we i gat bel. Afta we hem i soem traket Laef Long Pis Long Nyufala Wol long woman ya, sista i askem se: “?Yu yu laekem blong lukaot long pikinini blong yu long wan wol olsem we i stap long pija ya?” Hem i gohed long storeyan ya taem hem i visitim woman ya long haos blong hem. Samting ya i lidim hem long plante visit bakegen long woman ya.

⁹ Yu Save Statem Baebol Stadi Wetem Traket: Wan seket elda i talem se wan kongregesen we hem i visitim i statem 64 Baebol stadi long wik ya wetem traket taem oli tok long man blong haos long fastaem.

¹⁰ ?Yu yu traem askem Baebol stadi taem yu storeyan fastaem long ol man long ol haos wanwan? Taem yu yusum traket yu save soem kwiktaem nomo olsem wanem blong mekem wan stadi. Wan sista i mekem olsem taem hem i yusum traket ya Laef Long Pis Long Nyufala Wol. Hem i soem pija, mo askem man blong haos sipos hem i ting se wol blong yumi i save kam olsem wan dei. Afta we man blong haos i ansa, sista i invaetem hem blong ridim 2 Pita 3:13 mo Aesea 65:​17, we oli stap long traket. Nao sista blong yumi i talem se: “Ol promes ya oli no wan drim no wan store nomo be oli stap long Baebol, Tok blong God.” Nao hem i mekem plan blong gohed long storeyan long wik we i kam biaen. Long nekis visit, hem i ansa long sam kwestin blong woman ya mo hem i livim wan buk Yu Save Laef Foreva Long Paradaes Long Wol. Wan Baebol stadi i kamaot from.

¹¹ ?Yu yu wan nyuwan we yu jes baptaes no maet wan pablisa we i no baptaes yet we yu stap lanem moa long minista wok blong yu? Sipos i olsem, yu save lukaotem olgeta we oli gat ekspiryens mo askem tingting blong olgeta long fasin blong yusum traket long teritori blong kongregesen. Yumi gat plante eksampel long Baebol long olgeta we oli kasem tok blong leftemap tingting mo fasin blong wok we olgeta we oli strong long bilif oli halpem olgeta long hem.​—⁠Wok 18:24-27; 1 Kor. 4: 17.

¹² Brata we i lukaot long Buk Stadi i save halpem yu taem hem i mekem plan blong ol narafala oli halpem yu blong yusumgud traket. Ol papa mama oli gat responsabiliti blong halpem ol pikinini blong olgeta blong gohed long wok blong prij. Wan yangfala Wetnes i bin kasem trening long papa mama blong hem blong seremaot traket ya Laef Long Pis Long Nyufala Wol. Wantaem hem i stap wetem mama blong hem long wan Baebol stadi, hem i seremaot wan traket long hasban blong woman ya. Hasban ya i sapraes tumas blong luk wan yangfala olsem we i gat strong bilif long skul. Hem i glad blong ridim traket ya. Evritaem we yangfala ya i go wetem mama blong hem, hem i ridim wan vas blong Baebol we hem i mekemrere blong man ya. Naoia man ya i stap ridim magasin oltaem, hem i soem intres long Revelesen buk, mo i kam long sam miting finis. Ol samting ya oli kamaot from papa mama oli tekem taem blong mekem responsabiliti blong olgeta blong tijim gel blong olgeta blong yusumgud traket.

¹³ Yusumgud Ol Nyufala Traket Blong Yumi: Taem yumi yusum traket ya ?Wol Ya Bambae i Lus No i Stap?, yu save talem nem blong yu mo statem storeyan blong yu olsem: “Gud moning. Mifala i stap tokbaot long ol man fasin blong laef tede. ?Yu ting se fasin blong laef bambae i kamgud moa no i stap godaon? [Letem hem i ansa.] Samfala oli ting se ol samting we oli stap hapen long wol tede i stap mekem ol profet tok blong Baebol oli kamtru mo we en blong wol i kolosap nao. ?Wanem tingting blong yu?” Afta we man blong haos i ansa, soem traket mo pulum tingting i go long ol trifala kwestin long namba tu haf blong hem. Nao, folem rod blong traket blong soemaot olsem wanem wan wol i bin lus bifo mo hemia we i stap naoia bambae i lus tu. Taem yu finisim tok blong yu long visit ya, mekem plan blong nekis visit bakegen blong luk pruf blong Baebol we i soem se en blong wol i kolosap nao.

¹⁴ Plante taem yumi faenem se yumi stap long ples we yumi mas talemaot gud nyus blong Kingdom long ol narafala kwiktaem nomo, olsem long skul no long wok. Long ples blong wok blong yu, storeyan i save stanap long wan nyus we i jes kamaot long saed long gavman. Yu save agri se nating se plante gudfala lida oli wok strong, be wol i kasem plante trabol long histri blong man. Nao yu save luk long haf we i stap daon long pej 2 blong traket ya ?Hu i Stap Rulum Wol? Ridim ol trifala kwestin. Sipos i no gat naf taem blong storeyan, givim traket long man mo mekem plan blong yufala i save storeyan long ol kwestin ya long wan narafala taem no ples.

¹⁵ Wanwan man mo famle, oli mas tekem taem blong luk olsem wanem oli save seremaot ol defren traket ya. Tekem sam taem blong lanem. ?Olsem wanem yu save yusum traket wetem narafala buk we yumi seremaot long manis? ?Wanem apoenmen yu gat we yu save tekem sam traket i go wetem yu long hem? ?Bambae yu toktok wetem wan man long wik we i kam we bambae i save haremgud from mesej we i stap insaed long ol traket ya?

¹⁶ Dip lav we yumi gat long Jeova mo fasin blong tingbaot narafala bambae i pusum yumi blong mekem evri samting we yumi save mekem blong mekem ol man oli harem gud nyus. Fasin blong yusum traket oltaem bambae i halpem yumi blong mekem samting ya. Wan yang boe we i gat seven yia, i wantem halpem man we i stap nekis doa long hem blong go insaed long nyufala wol, ale hem i givim wan traket long woman ya, mo statem wan Baebol stadi wetem hem. !Hem i isi nomo! ?Be yumi glad long isi fasin ya blong toktok wetem man long teritori blong yumi? Nekis taem we yumi livim traket long wan man, samting ya i save lidim yumi long wan Baebol stadi tu. Sipos yumi waes blong yusumgud ol traket long wok blong talemaot gud nyus, bambae yumi sua blong kasem gud frut from.