Ol Fastok Blong Wekemap Intres
1 Jisas i nambawan long fasin blong yusum ol fastok blong hem. Nating se hem i toktok long wan kampani blong man no long ol man wanwan, Jisas i pulum ol man blong oli lesin long hem from we hem i kasem tingting blong olgeta wanwan. Hem i soem long olgeta man we oli stap lesin long hem, olsem wanem ol tok blong hem oli impoten.—Mat. 5:3-12; Luk 20:25-37; Jon 4:7-30.
2 I Nidim Blong Mekemrere Fastaem: Blong wekemap intres long mesej blong yumi, yumi mas mekem fastok blong yumi i laenap wetem man, i joen long ol samting we hem i stap wari long hem, mo soem se mesej blong Kingdom bambae i save givhan long hem.
3 Taem yumi mekemrere minista wok blong yumi, i gud blong luk bakegen long sam samting we ol manples oli stap tingbaot. ?Olsem wanem wan nyus we i jes kamaot i pulum tingting blong evriwan? ?Wanem ol intres blong wan yangfala? ?Blong wan olfala? ?Long ol hasban, waef no ol papa mama? I nogud blong yusum sem fastok nomo long olgeta doa, i gud moa blong mekemrere defren fastok mo rere blong jenisim olgeta taem yumi kasem save tingting blong man blong haos. Sam pablisa oli kasem gudfala frut taem oli mekemrere mo yusum olgeta defren fastok we i stap long Reasoning buk taem oli go prij long ol haos wanwan. (rs pej 9-15) Samting ya i mekem se tok blong olgeta i gud mo man i intres long hem.
4 Long manis Ogis, ating yu wantem yusum wan toktok olsem:
◼ “Gud moning. Mifala i stap toktok wetem olgeta man long saed long wanem fasin nao oli wantem luk se wan man we i stap rul long ol narafala i mas gat. ?Wanem tufala fasin we yu ting se oli impoten moa? [Letem man i ansa. Lesingud long ol poen. Agri sipos oli stret.] ?Yu yu save se Baebol i talem ol mak we Wan we God i agri long hem blong hem i rul long olgeta man i kasem? I stap long ples ya long Aesea 9:6, 7. [Ridim.] ?Yu ting se laef bambae i olsem wanem aninit long rul blong wan man olsem?” Letem man i ansa mo pulum tingting blong hem i go long Ol Sam 146:3, 4 mo poen we i stap long Reasoning buk long pej 153 kasem 154 (173-174) we i tokbaot nambawan rul blong Jisas. No yu save yusum Laef Foreva buk pej 112 mo 113 blong pulum intres blong man blong storeyan moa. Sipos yu luk se man ya hem i intres tru, ating yu wantem livim buk ya long hem.
5 Sipos yu stap toktok wetem ol man we oli wari long saed blong famle, toktok we i kam biaen i save wokgud taem yu soemaot Laef Foreva buk.
Afta we yu talem halo, yu save talem se:
◼ “?Yu yu luksave se evri dei famle i mas faet agensem olgeta problem we i stap kasem olgeta? [Letem man i ansa.] ?Yu tingbaot samtaem, weples famle i mas luk long hem blong kasem sam advaes we i waes? [Letem man i ansa.] Mifala i stap pulum tingting blong man long wanem Baebol i talem long poen ya. Makem wanem samting Man we i Stampa blong mared i talem long fas man mo woman.” Ridim Jenesis 1:28 mo luk long pej 238 long Laef Foreva buk mo gohed blong storeyan, mo yusum ol poen we yu jusum long japta 29.
6 Taem yumi folem fasin blong Jisas blong kasem intres mo pulum ol man we oli stap lesin blong storeyan, yumi stap soem long olgeta man we hat blong olgeta i stret, olsem wanem ol samting long saed blong speret oli impoten tumas.