Laef Wetem Klia Tingting Mo Stret Fasin
1 Yumi stap laef long wan wol we i gat bigfala paoa blong pulum ol man blong mekem ol fasin we oli agensem ol loa blong God. Fasin blong laef blong naoia i stap go nogud moa. (2 Tim. 3:3) Olsem ol Kristin, yumi mas holemstrong fasin we i stret mo kasem save from wanem yumi mas gohed blong mekem olsem. ?Be wanem rod i gud blong yumi folem? ?Wanem fasin yumi mas folem? “Laef Wetem Klia Tingting Mo Stret Fasin.” Hemia nao stampa tok blong program blong wan dei asembli blong yumi blong sevis yia 1993.—Taet. 2:12.
2 Wetem ol tok, ol pleplei, mo ol ekspiryens, bambae yumi lanem olsem wanem blong gat paoa blong stanap strong agens long fasin blong man we i no folem loa blong God mo sakemaot tingting blong wantem ol samting blong wol. Bambae yumi luk tu olsem wanem yumi save laef wetem klia tingting mo stret fasin insaed long rabis fasin ya blong naoia. Bambae hem i makem ol samting we oli save halpem yumi blong lukaotgud long tingting blong yumi. (1 Pita 4:7) Ol papa mama mo ol yangfala bambae oli wantem moa blong lesingud long ol tok mo ol tok we oli askem kwestin long sam man long program blong aftenun. Bambae program ya i soem from wanem yumi nidim blong gat waes blong God, ekspiryens, mo wok tugeta blong bildim wan hapi tiokratik fyuja.
3 From we i gat plante man we oli no folem ol loa blong God oli stap raonabaot long yumi, ol advaes blong Baebol oli nambawan blong folem. Fasin blong haremgud from we yumi folem ol advaes blong Baebol bambae i kamaot long tok ya we i talem se: “Tinghae Long Ol Blesing Blong Yufala Long Medel blong Wan Wol We i No Gat Glad Long Hem.” Taem yumi stap mekemrere blong go, yumi wantem tingbaot oltaem se, fasin blong lesingud long ol program mo mekem ol advaes oli wok, bambae i givhan long yumi blong kamgud moa long wok blong yumi long Jeova.—Fil. 3:15, 16.