Taem Yumi Wok Long Teritori We Yumi Wok Long Hem Plante Taem Finis
1 !Yumi glad blong kasem ol ripot se plante kongregesen oli stap wok plante taem long teritori blong olgeta! (Mat. 24:14; 1 Tim. 2:3, 4) Nating se samting ya i olsem wan traem we i nidim plante paoa, ol ekspiryens oli bin soem se yumi save winim sipos yumi reregud mo gat tul blong winim ol defren samting we i save kamaot.
2 Ol Gudfala Fastok Oli Impoten Tumas: Hem i impoten tumas blong rere blong yusum wan no moa fastok we yumi tingtinggud long hem finis. Oli mas tokbaot ol stret poen we oli soemaot klia ol impoten risen from wanem yumi stap visitim olgeta plante taem.
3 Reasoning buk i givim plante gudfala eksampel blong ol fastok we oli stret blong yusum. I gat tri we oli raetem i stap long pej 15 aninit long stampa tok ya “In Territory Often Worked” (Long Teritori We Oli Wok Long Hem Plante Taem). Traem lanem sam we yufala i wantem yusum long teritori blong yufala.
4 Sam pablisa oli karem frut taem oli yusum ol samting we oli stap long lokol nyuspepa blong statem ol storeyan blong olgeta long teritori we oli wok long hem plante taem. Reasoning buk i givim tri eksampel olsem wanem blong mekem samting ya. Tingbaot namba tu fastok aninit long stampa tok ya “Crime/Safety” (Fasin Blong Brekem Loa/ Fasin Sef) long pej 10 (F. p. 11) mo tufala faswan fastok aninit long stampa tok ya “Current Events” (Ol Samting We Oli Stap Hapen Naoia) long pej 10 mo 11 (F. p. 9-10).
5 Ol Fastok We Yu Save Rere Long Olgeta: Yu mas harem se yu fri blong wokem mo yusum ol stret tok long fastok folem olgeta we oli stap long Reasoning buk. Talem olgeta long prapa fasin blong yu mo long prapa tok blong yu. Yu save lanem olgeta wetem wan pablisa we i gat ekspiryens, bifo yu yusum olgeta long wok blong prij.
6 Eksampel, maet yu save talem wan samting olsem:
◼ “Afta we mifala i visitim yu lastaem, [talem samting we i jes kamaot we ol man long komuniti oli stap tokbaot]. From we yumi evriwan i kasem trabol long wan rod no long wan narafala, plante long ol man we oli stap raonabaot long yumi oli tingting bigwan long samting ya. Maet yu tu yu gat sam tingting long samting ya. [Spel smol blong letem man i save ansa.] Yumi hop se bambae oli mekem wan samting blong winim ol samting we oli stap kamaot naoia. Be, taem yumi traem tingbaot samting we i save winim trabol ya blong olwe, ?yu agri long wanem we profet Jeremaea i bin raetem long japta 10 vas 23?” Afta we yu ridim vas, traem kasem tingting blong man blong haos, afta pulum tingting blong hem long wan stret tok blong Baebol we i soemaot olsem wanem Jeova bambae i finisim problem ya we yufala i stap storeyan long hem.
7 No yu save talem se:
◼ “Maet yu bin harem long nyus tede [talem stret wanem i hapen]. Ating bambae yu agri se samting ya i mekem yumi evriwan i harem nogud. [Spel smol blong man i save ansa.] Yumi hop se ol gavman bambae oli faenem wan ansa long samting ya blong smol taem; be, Baebol i soemaot olsem wanem problem ya bambae i finisim blong olwe.” Pulum tingting i go long wan stret tok blong Baebol we i soemaot wanem God bambae i mekem.
8 “?From Wanem Yufala i Stap Kam Plante Taem?” Ol stret ansa blong ol tok olsem we ol man oli talem blong blokem tok blong yumi oli stap long Reasoning buk long pej 20 aninit long stampa tok ya “Why Do You People Call So Often?” (?From Wanem Yufala i Stap Kam Plante Taem?) Nating se man i no askem, yumi save givim wan gudfala wetnes sipos yumi yusum olgeta jans blong halpem ol narafala blong luksave se trufala lav blong yumi long God mo ol man raonabaot long yumi i pusum yumi blong go long haos blong olgeta plante taem sipos yumi save mekem. Storeyan long tok blong Jisas long Jon 21:15-17 i save givhan bigwan long saed ya.
9 Go kasem taem Jeova i talem se i naf, yumi mas gohed blong faet agensem traem ya blong wok long teritori we yumi wok long hem plante taem finis. Wetem strong tingting ya, yumi save sua se Jeova bambae i lidim yumi, protektem yumi, mo blesem yumi gogo kasem en.—Mat. 28:19, 20.