Go Long Ol Miting—Wan Impoten Responsabiliti
1 ?Yu yu tingbaot fasin blong go long ol miting se i impoten olsem wanem? Hemia wan kwestin we yumi mas tingtinggud long hem. Ating plante long yumi oli harem se oli laekem ol miting. Be, ol ripot oli soem sam taem i jes pas, se namba blong ol man we oli go long miting long plante kongregesen i godaon. ?Wanem i stampa blong hem? ?Sam long yumi oli letem sam wok blong kasem mane we oli no nidim blong mekem, fasin taed, hom wok, smol sik long bodi, no weta we i nogud smol nomo i blokem fasin blong yumi blong mas go long ol miting oltaem? (Dut. 31:12) From we Baebol i askem yumi blong mekem samting ya, evriwan long yumi i mas tingbaot kwestin ya long prea se, ?Mi mi tingbaot fasin blong go long ol miting se i impoten olsem wanem?
2 Sam long ol brata blong yumi oli stap wokbaot plante haoa long ol rod we i gat das long olgeta mo oli krosem ol reva we i gat ol krokodael long olgeta blong go long ol miting. Long kongregesen blong yufala, maet i gat sam we oli holem strong oltaem we oli “neva mestem” miting nating se oli gat strong helt problem, handikap, plante wok blong mekem long ples blong wok blong olgeta, no oli mekem plante homwok from skul. (Luk 2:37) ?From wanem oli traehad blong go long ol miting? From oli save se wetem prapa paoa blong olgeta, oli no save winim ol trabol blong wol ya we oli stap mekem ol man oli harem nogud. Oli mas stanap long paoa we God i givim.—2 Kor. 12:9, 10.
3 Tede yumi stap folem eksampel blong ol faswan Kristin, we oli joen oltaem blong prea, talem ol ekspiryens, mo stadi long Tok blong God. (Ol Wok 4:23-30; 11:4-18; Kol. 4:16) Yumi kasem ol advaes long profet tok blong Baebol mo stampa tijing blong Baebol, ol fasin we oli laenap wetem tingting blong God mo fasin blong ol Kristin, mo tu ol advaes we oli stret long taem blong yumi olsem wanem blong mekem laef blong yumi i kamgud moa naoia taem yumi lukaotgud blong mekem ol rul blong Baebol oli wok long laef blong yumi. (1 Tim. 4:8) Antap moa, yumi gat hop ya se wan dei bambae i gat en long ol problem mo fasin we man i stap harem nogud. I impoten tumas blong mekem hop ya i stap strong.—Hib. 6:19.
4 ?Famle blong yu i tingbaot fasin blong go long ol miting se i impoten olsem wanem? ?Hem i kam haf blong program blong yufala olsem taem blong kakae no wok blong kasem mane? Long ol naet we i gat ol miting, ?samtaem yufala i faenem se yufala i stap toktok blong save sipos yufala i go long miting no no gat, no long famle blong yu, yufala i tingbaot blong no mestem jans blong joen oltaem wetem ol brata blong yufala? Plante pablisa oli glad blong tingbaot eksampel blong papa mama blong olgeta taem oli stap gruap we oli gat strong tingting blong go long ol miting. “Wan samting long saed blong Papa,” wan elda i tingbaot wetem fasin lav, “hemia se hem i mekem sua oltaem se famle i go long ol miting. Sipos wan i sik, wan i mas stap long haos wetem hem, !be ol narafala oli go long miting!”
5 Long ol Kingdom Wok Blong Yumi we bambae oli kam biaen, bambae yumi tokbaot olsem wanem ol wanwan miting blong kongregesen oli impoten blong halpem blong bildim fasin tangkyu long ol samting ya long saed blong speret. Sipos fasin blong yu blong go long ol miting i save kam gud moa, mifala i sua se ol haf ya bambae oli givhan long yu blong luksave wanem samting yu stap mestem. Bambae oli talem bakegen ol tok blong givhan long olgeta we oli stap lidim ol miting, mo tu bambae i gat sam advaes we yumi evriwan i save folem taem yumi stap mekem rere mo givim ansa long ol miting ya. Maet i gud blong famle i sidaon mo mekem prea blong skelem fasin blong yufala blong go long ol miting. Afta, mekem ol jenis we i nidim blong mekem long program blong yufala. Go oltaem long miting i wan haf blong tiokratik edukesen blong yumi we yumi nidim mo yumi mas tingbaot se i wan samting we i impoten tumas.