Kam Long Miting Oltaem—Wan Samting We i Impoten Tumas
1 Ol Kristin famle oli tinghevi long ol miting blong kongregesen, oli putum olgeta long fasples long laef blong olgeta. Be long laef blong yumi tede, samting ya i no isi. ?Olsem wanem? ?Ol wok long haos, wok blong winim mane, mo skul wok, oli stat blong kakae taem blong yu we i blong mekem wosip long Jeova? Sipos yumi traehad blong gat tingting olsem Jeova, samting ya bambae i halpem yumi blong putum ol stret samting long fasples long laef blong yumi.—1 Saml. 24:6; 26:11.
2 Wan man Isrel bifo i no folem tok blong Jeova, hem i girap i go pikimap faeawud long Sabat dei. Maet hem i ting se hem i stap lukaotgud long famle blong hem, no maet hem i ting se hemia wan smol samting nomo. Be, Jeova i panisim man ya. Samting ya i soemaot klia se i no stret nating we yumi mekem ol narafala wok long taem ya we yumi mas mekem wosip long Jeova.—Nam. 15:32-36.
3 Winim Traem Ya: Plante brata mo sista oli faenem se wok blong olgeta blong kasem mane i stap blokem olgeta blong kam long ol miting. Oli faenem i had blong winim samting ya. Be sam long olgeta oli winim traem ya taem oli toktok wetem bos blong olgeta, samfala oli jenisim taem blong wok blong olgeta wetem wan narafala wokman, samfala oli faenem wan narafala wok, mo samfala oli mekem sam jenis long laef blong olgeta blong i kam moa isi. Yumi save se taem yumi jenisim sam samting blong gat moa taem blong mekem trufala wosip, God i glad tumas long yumi.—Hib. 13:16.
4 Skulwok tu i save mekem i had blong kam long olgeta miting. Wan yangfala i talem se: “Mi mekem sam skulwok bifo we mi go long miting mo mi mekem narafala haf blong hem afta long miting.” Taem pikinini i no save finisim olgeta homwok blong hem long naet blong miting, sam papa mama oli go luk tija blong hem blong eksplenem se ol Kristin miting oli impoten tumas long famle blong olgeta.
5 Blong finisim ol wok long haos bifo long stret taem we famle i mas rere blong go long miting, i nidim wan gudfala plan mo i nidim we olgeta evriwan long famle oli wok tugeta. (Prov. 20:18) Maet ol pikinini blong yu oli smol yet, be nating, yu save tijim olgeta blong swim mo jenis eli, blong yufala i save kasem ples blong miting long stret taem blong hem. Sipos ol papa mama oli givim gudfala eksampol, bambae ol pikinini blong olgeta oli luksave se ol miting oli impoten tumas.—Prov. 20:7.
6 Ol trabol blong laef long wol ya bambae oli kam antap moa yet, taswe yumi nidim tumas ol miting. I gud we yu gohed blong holem tingting blong Jeova long saed ya, mo mekem ol miting oli kam wan samting we oli impoten tumas long laef blong yu.—Hib. 10:24, 25.