Yusum Reasoning Buk Long Ol Visit
1 Aposol Pol i talem se: “Mi mi planem sid, Apolos i wasem.” (1 Kor. 3:6, NW) Ol tok ya oli givim stampa blong tu faswan samting blong mekem taem yumi mekem disaepol. Samtaem yumi tokbaot visit olsem wok blong “wasem” sid. Hemia samting we yumi mas mekem afta we yumi toktok wetem wan man fastaem, blong hem i save kam wan disaepol mo tekem baptaes. Wok blong visit i givhan long yumi blong ‘givim save i go long olgeta ples’ mo mekem sid we yumi sakem long ol man we oli intres i gru go kasem taem we hem i gat ol rus mo hem i statem Baebol stadi.—Prov. 15:7.
2 Sam man oli slou blong mekem visit long olgeta we oli soem intres from we oli no save wanem samting oli mas talem. Buk ya Reasoning From the Scriptures i wan gudfala buk blong givhan long yumi blong mekem wok blong wasem sid. Plante taem, bifo we wan man blong haos i agri blong hem i stadi Baebol, yumi mas visitim hem. Reasoning buk i tokbaot ol stampa tok blong Baebol we yumi save tokbaot long ol man blong haos. Mekemrere visit blong yu, maet yu save yusum wan no moa long olgeta tok ya.
3 Sipos yu givim “Wajtaoa” blong Epril 15, 1992, long saed blong prea, taem yu gobak maet yu save askem kwestin ya se:
◼ “?Wanem samting i mekem se God i no save harem prea blong wan man?” Afta we yu letem taem blong man i ansa, tekemaot Reasoning buk blong yu mo openem long pej 293 (287). Yusum ol vas blong Baebol we oli tokbaot poen ya, pulum hem blong ridim ol vas long pej ya blong buk. Sipos man blong haos i no akseptem sabskripsen taem yu mitim hem fastaem, maet yu save traem blong askem hem bakegen.
4 Long wan narafala visit, afta we yu askem man blong haos sipos hem i save wanem ya Kingdom blong God, we Prea blong Masta i stap tokbaot, yusum ol tok long pej 226 kasem 232 (335-342). Sipos i gat taem, tokbaot ol vas we oli stap long haf ya, “?Kingdom Blong God i Wan Trufala Gavman?” (Is God’s Kingdom a Real Government?) mo “?Kingdom Blong God Bambae i Mekem Wanem?” (What Will God’s Kingdom Accomplish?) Soemaot klia ol bilif we oli no stret, olsem se Kingdom blong God i stap long hat blong ol man. !Kingdom hem i wan trufala gavman! Be yu no mas talemaot evri samting long hem wantaem, stanemap sam kwestin we yu save givim ansa long hem nekis taem.
5 Narafala samting blong mekem, maet man blong haos i tekem Wekap! blong Epril 22, 1992, long saed blong “?Wanem Mining Blong Laef?” (Life—What Is Its Purpose?)
Yu save askem se:
◼ “I gat samting long bodi blong man we i soemaot se God i wokem hem blong laef blong olwe long wol?” No, “?Yu ting se ol dedman oli save ol samting we ol man we oli laef yet oli stap mekem?” Ol kwestin olsem maet oli save pulum intres blong man from we oli stret long hem wan. Mekem plan blong gobak bakegen blong ansa long ol kwestin ya. Yusum Reasoning buk pej 247 (437) blong ansa long faswan kwestin mo pej 100 (255) blong ansa long namba tu kwestin.
6 Sipos yu toktok wetem man long saed blong fyuja blong wol, yu save askem se:
◼ “?God i save letem ol man blong bambae oli spolem wol ya?” Nao yusum Reasoning buk pej 44 kasem 45 (182) blong tokbaot ol ansa blong Baebol. No maet man blong haos i save askem se: “Sipos plante milyan man bambae oli laef bakegen long ded, ?bambae oli laef long weples?” Yu save faenem ansa long Reasoning buk, pej 340 (328).
7 Yu no traem blong talemaot evri trutok long man blong haos wantaem. Livim sam kwestin blong yu talem ansa long olgeta taem yu visitim hem bakegen. Yumi olsem ol man blong wok wetem God, bambae yumi gohed blong gat gudhan blong planem mo wasem sid blong trutok taem yumi stap yusumgud Reasoning buk. Yumi savegud se God bambae i mekem i gru.