Traem Mekem Se Ol Visit Oli Karem Frut
1 Visit i wan impoten haf long wok olsem we yumi “stap joen wetem God blong mekem wok blong hem.” (1 Kor. 3:6-9) Yumi no mas fraet long tingting we ol man blong haos oli save gat, from we yumi stap visitim man we i bin intres finis long trutok. Taem yumi reregud, samting ya i soemaot se yumi rili intres long man we yumi visitim hem from we yumi stap storeyan gud long Baebol wetem hem.
2 Yu mas talem tok we i klia. Askem ol gudfala kwestin.
Yusum ol poen we yu makemdaon taem yu faenem man ya fastaem, maet yu save askem se:
◼ “?Yu stap tingting moa long promes ya blong God blong rulum wol long stret fasin?”
Narafala kwestin maet yu save askem se:
◼ “?Afta long storeyan blong yumitu las wik, naoia yu yu harem se prea from Kingdom blong God i gat mining long yu?”
Taem yumi smael mo yusum voes we i kaen samting ya i soemaot se yumi intres long man taem yumi stap askem ol kwestin olsem.
3 Yu No Mas Hareap. Lesingud Long Man Blong Haos. Sipos yumi lesin long man blong haos mo yumi tingtinggud long tok blong hem bifo we yumi ansa, samting ya bambae i soemaot klia se yumi intres long hem. Stret long ol tok blong hem, yu save yusum wan vas long Baebol we i laenap wetem tok blong yu long faswan visit. Yu mas rere se evritaem yu visitim man ya yu save tijim hem long wan samting. Sipos hem i askem wan kwestin we i no laenap wetem storeyan blong yutufala, tekem jans ya blong yusum Reasoning buk blong yu blong faenemaot ol stret ansa.
4 Sipos yu seremaot “Wajtaoa” Mei 1, 1992 long hem, maet yu save talem se:
◼ “Lastaem, yumitu tokbaot yia 1914. Faet we i kamaot long taem ya i jenisim sam samting long plante gavman. Kam kasem tede plante jenis i stap gohed yet long ol gavman. ?Be olsem wanem, ol jenis ya oli rili givim ol samting we man i nidim, no ol jenis ya oli save givim pis blong olwe? [Letem hem i toktok.] Tingbaot olsem wanem Jisas i tijim ol man blong hem blong oli prea from wan gavman we bambae i save finisim ol bigfala trabol we yumi stap kasem tede. [Ridim Matyu 6:9, 10.] ?Yu save se Kingdom blong God bambae i mekem wanem? [Letem hem i ansa.] Baebol i eksplenem samting ya tu.” Nao ridim Daniel 2:44. Maet yu wantem yusum pijatok we i stap long pej 12 mo 13 long Laef Foreva buk blong soemaot wanem blesing ol man oli save kasem aninit long Kingdom blong God.
5 Sipos yu seremaot, “Wekap!” Mei 8, 1992 long hem, yu save talem se:
◼ “Lastaem mi kam yumitu stap tokbaot ol man we oli ronwe long kantri blong olgeta from ol kruked fasin mo ol trabol. ?Yu ting se God i tingbaot ol trabol we ol man oli mas winim taem oli stap aninit long rul blong narafala man?” I dipen long ansa blong hem, yu save yusum Eklesiastis 4:1 no yu save yusum Ol Sam 72:12-14. Nao yu save tanem i go long pej 15 long buklet ya “Look!” mo ridim no tokbaot ol tri haf we oli stap long pej ya, mo askem ol kwestin blong ol haf ya.
6 I gud yumi gohed blong soemaot intres long ol man mo yumi tingbaot gudfala samting blong Baebol blong storeyan wetem ol man long hem blong mekem se yumi save karem frut long ol visit blong yumi.