Gobak Blong Bildimap Fasin Tangkyu
1 Ol gudfala visit bakegen sloslou oli wekemap mo oli pulum man blong haos blong gru blong kam wan man blong bilif. ?Wanem sam gudfala poen we yumi save tingbaot taem yumi visitim bakegen ol man we oli bin soem intres?
2 Faswan samting, reregud. Samting ya i stat long fastaem we yumi toktok wetem man. ?Olsem wanem? Taem yumi raetemdaon stret intres we man i soemaot. Raetemdaon nem blong man blong haos, poen we yu bin tokbaot, ansa blong man ya, mo eni buk we yu bin seremaot. Afta, luk bakegen pepa blong prij bifo yu gobak, mo prea blong tingbaot wanem bambae yu talem.
3 Nao yu rere. ?Bambae yu save talem wanem? Sipos long fastaem we yu toktok wetem man yu livim wan kwestin wetem hem, yu save bildim tok blong yu long poen ya taem yu gobak. Eksampel, sipos long fastaem storeyan blong yufala i tokbaot ol blesing blong Kingdom blong God, yu save askem kwestin ya se “?From wanem God i lego fasin nogud i stap?”
Taem yu gobak, afta we yu talem halo yu save talem se:
◼ “Lastaem we yumi bin storeyan, yumi bin tokbaot from wanem wan God blong lav i lego fasin nogud i stap tede? ?Yu bin tingting long samting ya? [Wet long ansa.] ?Yu ting se God i rili kea long ol man? [Wet long ansa.] Traem tingbaot wanem Baebol i talem long Jon 3:16.” Afta we yu ridim vas finis, yu save soemaot sam stret poen long japta 8 long Trutok blong soemaot rod blong Itenel Laef buk we i soemaot ol risen from wanem God i letem fasin nogud i stap tede.
4 Maet hemia wan nara gudfala kwestin we yu save livim long fastaem we yu toktok wetem man: “Sipos stampa tingting blong God se man i save laef foreva, ?from wanem ol man oli stap ded?” Taem yu gobak, yu save soemaot ansa blong kwestin ya long Baebol, we yumi save faenem long Rom 5:12. Afta we yu ridim vas ya, pulum tingting i go long japta 4 blong Trutok Blong Soemaot Rod Blong Itenel Laef buk we i tokbaot stampa risen from wanem man i kam olfala mo i ded.
5 Sipos long fastaem we yu toktok wetem man yu tokbaot ol rod blong makemaot trufala skul mo livim Trutok Blong Soemaot Rod Blong Itenel Laef buk, yu save stanemap visit blong yu long stampa kwestin ya: “?From wanem i gud blong jekemap skul blong yumi?” Taem yu gobak yu save tokbaot sam stret poen long japta 2 blong buk.
6 Hemia sam advaes we yumi save tingbaot. Lukaotgud long wanem kwestin bambae yu askem taem yu gobak. Ol kwestin olsem “?Yu bin ridim buk we mi livim wetem yu?” “?Yu rimemba mi?” mo “?Yu rimemba wanem yumi bin tokbaot lastaem mi kam long ples ya?” i save mekem se man blong haos i sem. Ol kwestin olsem oli no save karem ol gudfala frut. Be, yu mas gat fasin fren, yu mas rere blong jenisim tok blong yu blong mekem i stret long man blong haos, mo stap smol taem nomo. Ol fasin ya bambae oli mekem se mesej ya i gat moa paoa.
7 Yu save yusum ol fastok ya mo sam narafala blong wokem fasin tangkyu long hat blong ol man we oli intres. I gud blong putum wan mak blong traem mekem wan visit bakegen evri wik. Mekem ol tingting we oli talem antap i wok, mo lukaot sam pablisa we oli gat ekspiryens blong halpem yu blong kamgud moa. Bambae glad blong yu i kam antap taem yu stap mekem faswan intres i kam bigwan from yu mekem ol gudfala visit bakegen.