Halpem Ol Narafala Blong Gat Fasin Tangkyu From Ol Gudfala Samting Long Ol Buk Blong Yumi
1 “Tok blong God i wan samting we i laef, mo we i stap wok.” (Hib. 4:12) From ol buk blong yumi we oli stanap long Baebol oli halpem ol man blong kasem help from paoa blong Tok blong God, yumi yusum olgeta blong wekemap intres blong Baebol taem yumi stap holem ol jans blong prij no taem yumi go long ol haos wanwan.
2 Long Janewari bambae yumi seremaot buklet ya “Speret Blong Ol Dedman” mo Trutok buk. Mekem rere ol storeyan blong yu long saed blong Kingdom mesej long wan fasin we bambae i lidim yu i go long stret poen long buklet no buk we yu yusum. ?Olsem wanem blong mekem samting ya?
3 ?Olsem Wanem Blong Rere?: Blong statem, jusum wan tok insaed long buklet we yu stap yusum we bambae i pulum tingting blong ol man we hat blong olgeta i stret we oli stap long teritori blong yufala. Nekis samting, tingbaot sam samting we oli stap hapen naoia no wan poen we olgeta man oli intres long hem we maet yu save storeyan smol long hem wetem man blong haos bifo yu pulum tingting blong hem i go long toktok we yu bin jusum long buk. Ating i gat wan vas blong Baebol we oli raetem i stap we yu save ridim, maet stret long Baebol no stret long buklet, blong sapotem ol tok blong yu. Yu no fraet blong askem man blong karem buk long stret praes blong hem. Taem yu lego hem, no fogetem blong putum wan kwestin no wan tingting we yu save yusum olsem fandesen blong visit bakegen.
4 I gat ol narafala buklet tu long lanwis we kongregesen i stap yusum. Sipos i gat ol buklet ya, i gud blong rere long sam storeyan we yu save mekem wetem ol man long teritori. Leftemap tingting blong olgeta blong ridim wan long olgeta gudfala buk ya.
5 Seremaot Trutok Blong Soemaot Rod Blong Itenel Laef: Maet yu save statem wan storeyan taem yu pulum tingting long wan samting long nyus we i tokbaot fasin joen blong skul long ol bisnes blong wol no maet i soemaot paoa we skul i gat long laef blong ol man.
Afta, askem wan kwestin, olsem hemia:
◼ “?Yu ting se wanem tingting blong God long fasin blong ol skul we i gat paoa long ol bisnes blong wol tede? [Wet long ansa.] ?Bambae i wan sapraes long yu sipos yu lanem se stampa blong ol tijing blong ol skul ya oli lelebet sem mak mo se oli defren long hemia blong Baebol?” Ale yu save soem long man blong haos nem blong ol japta, mo eksplenem kwiktaem nomo se nating se wan man i gat skul no no gat, paoa blong ol skul we oli strong i stap kasem laef blong hem tu. Poenemaot se hem i save haremgud sipos hem i lanem olsem wanem blong makemaot trufala skul.
6 Samtaem i moa stret blong givimaot sam magasin no traket. Yumi gat olgeta risen blong glad mo wok strong blong leftemap tingting blong ol narafala blong oli ridim ol buk ya blong mekem se oli save gat ol samting blong haremsave paoa blong Tok blong God long laef blong olgeta taem oli folem rod we hem i soemaot.