Givim Wetnes Long “Ol Kaen Man”
1 Taem yumi mitim ol man blong ol defren kastom mo skul, yumi rimemba se Jeova i wantem “we ol kaen man oli sef, mo we oli kasem stret save long trutok.” (1 Tim. 2:4, NW) Antap long ol spesel traket mo buklet, yumi gat ol nambawan buk tu we yumi save yusum oltaem blong givhan long ol man we skul blong olgeta i no tijim olgeta long trutok long saed blong God mo Kraes.
2 Wan long olgeta buk ya, hemia Man We i Hae Moa Long Olgeta Man. Buk ya we i tokbaot laef blong Jisas Kraes, i save givhan long man blong save moa long Pikinini blong God mo kam kolosap moa long hem, olsem i hapen long plante man long faswan handred yia. (Jon 12:32) Maet yu save folem ol advaes we oli stap biaen, taem yu luk se i stret blong soemaot buk ya.
3 Maet yu save stat wetem wan kwestin olsem:
◼ “?Yu yu tingbaot wanem samting, taem yu harem nem ya Jisas Kraes? [Letem man i ansa.] Plante man blong histri oli luksave we Jisas i hae moa long ol narafala man. [Tekem wan eksampel long fastok blong buk ya Man We i Hae Moa.] Baebol i talem se Jisas i soemaot rod long yumi.” Ridim 1 Pita 2:21 mo fashaf blong laswan pej long fastok blong buk ya Man We i Hae Moa. Sipos man blong haos i intres blong save moa long saed blong Jisas, askem long hem blong karem buk. Bifo we yu lego man ya, ridim Jon 17:3 mo askem long hem se, “?Olsem wanem blong kasem save ya we bambae i lidim yumi long laef we i no save finis?” Putum wan stret taem blong gobak mo ansarem kwestin ya.
4 Taem yu gobak blong eksplenem olsem wanem blong kasem save ya we i givim laef, yu save talem se:
◼ “Mi mi promes finis blong kambak bakegen mo soem long yu olsem wanem blong kasem save ya we bambae i lidim yumi long laef blong olwe.” Soem buklet ya Samting We God i Wantem, mo yusum faswan stadi blong soem olsem wanem yumi stadi.
5 Yumi save yusum ol traket tu, blong soemaot buk ya Man We i Hae Moa. Fasin ya i givhan long yumi blong skelem intres we man blong haos i gat long faswan taem we yumi toktok wetem hem. Ale, bambae yumi naf blong luksave sipos i moa gud blong soemaot buk ya no wan narafala buk long hem.
6 Sipos yu yusum traket ya “Laef Long Pis Long Nyufala Wol,” yu save talem samting olsem:
◼ “?Yu yu ting se bambae i gat wan taem we yumi save laef long pis, olsem pija long fored blong traket ya i soem? [Letem man blong haos i ansa.] Plis lukluk lastok blong fashaf long pej 2. I askem se: ‘?Be yu yu ting se hemia wan drim nomo? ?Yu yu ting se yumi save bilif we bambae ol samting ya oli kamtru?’ [Nao ridim nekis haf long traket.] Tok ya long saed long nyufala heven mo nyufala wol i wan tok blong Baebol, we i stap long 2 Pita 3:13. Sipos yu wantem, yu save tekem prapa Baebol blong yu, mo bambae yumi ridim Ol Sam 104:5, blong lanem moa long saed long fyuja blong wol.” Sipos no, yu save ridim vas ya long prapa Baebol blong yu. Sipos man i intres, yu save tokbaot japta 133 blong buk ya Man We i Hae Moa.
7 From we yumi tingbaot blong statem wan Baebol stadi wetem man ya, yumi mas reregud taem yumi gobak. ?Olsem wanem japta 133 i save givhan long yumi blong statem wan Baebol stadi?
8 Afta we yu ridim 2 Pita 3:13, yu save ridim no tokbaot haf 2 long pej 3 blong traket ya mo talem se:
◼ “Jisas Kraes, pikinini blong God, bambae hem i King blong Kingdom blong Jeova. Makem olsem wanem buk ya Man We i Hae Moa Long Olgeta Man i tokbaot Jisas, mo i givim save long yumi long saed long wanem bambae hem i mekem long fyuja.” Nao ridim ful japta. Askem faswan kwestin we i stap long en blong japta ya: “ ‘?Olgeta we oli pastru long Amageden wetem ol pikinini blong olgeta, oli save mekem wanem gudfala samting biaen?’ [Letem man i ansa. Yu save mekem sem samting long ol narafala kwestin.] ?Yu yu wantem joen long nyufala wol we bambae Jisas i rul long hem olsem King? Mi mi glad sipos mi save kam evri wik blong givhan long yu, blong kasem save blong Baebol long saed blong olsem wanem yu yu save gat jans ya.” Nao askem long hem blong karem buklet ya Samting We God i Wantem, mo blong jusum wan stadi we bambae yutufala i save lukluk long hem long nekis visit blong yu.
9 Ol kaen man we hat blong olgeta i stret oli stap traehad blong faenem trutok long saed long God mo Kraes. Yumi save givhan long olgeta tru long wok blong yumi blong givim wetnes. Yes, yumi mas gohed blong ‘putum tingting blong yumi long God ya we i laef, we i no save ded, mo we i stap sevem olgeta man. . . . From samting ya, yumi stap traehad tumas, mo yumi stap hadwok long ol wok blong hem.’—1 Tim. 4:10.