Save Blong God i Ansarem Plante Kwestin

¹ Bifo we yu kasem stret save blong trutok, ating yu yu gat plante kwestin we yu no save ansarem, long saed blong laef. !Yu yu glad tumas blong kasem ansa blong Baebol long ol kwestin ya! Naoia, yu save givhan long ol narafala blong faenem ol ansa ya tu. (Skelem wetem 2 Timote 2:2.) Yu save serem save blong God wetem olgeta, we bambae i lidim olgeta long laef we i no save finis. (Jon 17:⁠3) ?Be olsem wanem blong givhan long wan man blong luksave se save ya i impoten tumas? Yu save tingbaot ol kwestin we trutok i bin givim ansa blong olgeta long yu. ?Wanem ol samting we ol man blong lukaot trutok oli wantem save? Sipos yu tingting long rod ya, samting ya i save givhan long yu blong seremaot buk ya, Save Blong Lidim Yu Long Laef We i No Save Finis. Ol advaes we i kam biaen, i save halpem yu blong reregud blong prij long Jun.

² Plante man oli wantem save from wanem ol man oli stap safa, taswe maet tok ya i pulum olgeta blong lesin:

◼ “Taem i gat wan disasta no fasin blong brekem loa no raf fasin i kamaot, plante man oli wantem save from wanem ol nogud samting ya oli hapen. ?Wanem ansa blong yu long kwestin ya?” Wet long ansa mo talem sam tok blong soem se yu kasem save long tingting blong hem. Nao openem Save buk i go long japta 8, mo soem tok blong haf 2. Eksplenem se buk ya i talemaot ansa blong Baebol long kwestin ya, from wanem ol nogud samting oli hapen. Askem man blong haos blong karem buk ya blong stret praes blong hem.

³ Taem yu gobak long wan man we yu bin livim buk ya “Save” wetem hem, yu save talem se:

◼ “Mi mi glad blong save tingting blong yu naoia long saed blong kwestin ya se, from wanem ol man oli stap safa. ?Yu yu agri wetem ansa blong Baebol we buk ya i givim?” Wet long ansa. Ridim haf 17 long pej 77 blong Save buk, mo talem long hem se yu glad blong ridim Rom 9:​14 long prapa Baebol blong hem. Nao yu save talem se: “Gud nyus ya, hemia se God i no mekem we yumi safa mo harem i soa. Hem i promes blong givim laef blong olwe wetem pis mo glad. Faswan japta blong buk ya i tokbaot, ‘!Yu Save Haremgud Long Fyuja!’ Mi glad blong eksplenem olsem wanem yu mo famle blong yu i save kasem wan fyuja olsem.” Openem buk i go long japta 1, mo soem olsem wanem yumi stadi. Storeyan long namba blong paragraf we yu luk se i stret long man ya.

⁴ Maet yu wantem yusum fastok long pej 14 blong “Reasoning” buk, aninit long stampa tok ya “Olfala/Ded”:

◼ “?Samtaem yu bin askem kwestin ya, ‘Ded i finisim evri samting, no i gat wan narafala laef afta ded’? [Wet long ansa.] Baebol i ansarem olgeta kwestin long saed blong ded. [Ridim ­Eklesiastis 9:​5, 10.] Hem i soem tu se olgeta we oli bilif, oli gat wan trufala hop. [Openem Save buk i go long pej 84, haf 13. Ridim mo eksplenem tok blong Jisas long Jon 11:25.] Fulwan japta ya i ansa long kwestin ya, ?Olsem wanem long olgeta we yumi laekem tumas we oli ded? Mi mi glad blong livim buk ya wetem yu blong ­130 VT.”

⁵ Taem yu visitim man ya bakegen, yu save talem halo mo se:

◼ “Lastaem, yumitu i bin tokbaot wanem i hapen long man taem hem i ded. Plante man oli bilif se afta ded, yumi laef long heven no long hel. ?Be yu bin tingbaot sipos ol dedman oli gat jans blong laef bakegen long wol ya nomo? [Wet long ansa.] Baebol i talem se olgeta we oli laef bakegen, bambae oli stap wetem olgeta we oli gat tingtingdaon, we oli kasem laef long wol ya. [Ridim Ol Sam 37:​11, 29, mo tokbaot haf 20 long pej 88 blong buk ya Save.] Hop ya i bin leftemap tingting blong plante milyan man we bifo oli fraet long ded. Buk ya bambae i givhan long yu blong kasem moa save long kwestin ya. ?Yu yu glad sipos mi soem long yu olsem wanem blong yusum buk ya?”

⁶ Sipos yu laekem moa blong yusum wan rod blong storeyan we i isi nomo, yu save traem hemia:

◼ “Mi wantem soem long yu wan pija long buk ya, Save Blong Lidim Yu Long Laef We i No Save Finis. ?Yu ting se pija ya i naes?” Openem buk i go long pej 4 mo 5. Wet long ansa. Nao ridim ol tok long pej 5. Finisim tok blong yu olsem: “Yu save karem buk ya blong ridim yu wan. Mifala i askem 130 VT nomo olsem praes blong wokem buk ya.” Faenemaot wanem taem i gud blong gobak, blong mekem intres i gru moa.

⁷ Yumi gat save blong God we i ansarem ol impoten kwestin long laef. Mekemrere gud, mo Jeova bambae i blesem traehad blong yu blong serem save ya we i givim laef, long olgeta we oli stap lukaot trutok.