Kipim Gud Pepa Ya
Sam Fastok Blong Yusum Long Wok Blong Prij
Ol fastok we oli kam biaen oli blong givhan long yumi blong reregud taem yumi seremaot ol buk.
Draw Close to Jehovah (Franis/Inglis)
“Plante man we oli bilif long God oli wantem kam klosap moa long hem. ?Yu yu save se God i singaot yumi blong kam klosap long hem? [Ridim Jemes 4:8.] Buk ya i givhan long ol man blong oli yusum prapa Baebol blong olgeta blong oli kam klosap moa long God.” Ridim haf 1 long pej 16.
“Tede fasin blong mekem i no stret long ol narafala i stap kam bigwan tumas. I sem mak olsem Baebol i talem long ples ya. [Ridim Prija 8:9.] Plante man oli stap askem sipos God i rili kea long yumi. [Ridim ol faswan tok blong haf 4 long pej 119.] Japta ya i eksplenem from wanem God i no tekemaot yet fasin ya blong mekem i no stret long narafala.”
Is There a Creator Who Cares About You? (Franis/Inglis)
“?Weples yumi save faenem ol beswan advaes we i save givhan long yumi blong stretem ol bigbigfala problem blong yumi? [Letem man i ansa. Ridim Matiu 7:28, 29.] Vas ya i soemaot samting we ol man oli mekem taem oli harem tok blong Jisas antap Hil. Makem tok we ol narafala man oli talem long saed ya. [Tokbaot ol tok we oli stap long pej 152.] Japta ya i tokbaot laef blong Jisas mo ol tijing blong hem.”
“?Samtaem yu yu stap askem se: ‘?Sipos i gat wan God, bambae wan dei hem i tekemaot ol trabol we oli stap mekem yumi safa mo ol fasin we i no stret long wol?’ [Letem man i ansa. Ridim Revelesen 21:3, 4.] Buk ya i eksplenem wanem samting we bambae God i mekem blong tekemaot fasin safa mo stamba blong hem.” Soemaot japta 10.
Keep on the Watch! (Franis/Inglis)
“Plante man oli wari long saed blong ol bigfala problem we oli kamaot tede mo ol trabol we oli mekem man i sek. [Tokbaot wan trabol no problem we i kamaot long ples blong yu.] ?Yu yu save se Baebol i bin tokbaot ol trabol ya, se oli haf blong wan bigfala saen we i soemaot se klosap nao gavman blong God bambae i stretem ol trabol blong wol? [Letem man i ansa. Ridim wan vas we i laenap wetem stori blong yu, olsem Matiu 24:3, 7, 8; Luk 21:7, 10, 11; no 2 Timoti 3:1-5.] Buklet ya i eksplenem from wanem i impoten we naoia nomo yumi wekap gud mo kasem save mining blong ol saen ya.”
“Plante man tede oli harem nogud tumas long ol bigfala trabol we i stap kamaot long wol mo ol trabol we olgeta wanwan oli kasem. Samfala oli stap tingting se from wanem God i no blokem ol samting olsem. Baebol i promes se i no longtaem God bambae i tekemaot ol trabol we oli stap mekem ol man oli safa. [Ridim Revelesen 14:6, 7.] Makem gud wanem gudfala samting we bambae God i mekem long ol man. [Ridim 2 Pita 3:10, 13.] Buklet ya i givim sam moa impoten save long saed ya.”
Save Blong Lidim Yu Long Laef We i No Save Finis
“?Sipos oli askem yu blong go laef long wan naesfala ples olsem, bambae yu yu agri blong go? [Soem pija long pej 4-5, mo letem man i ansa.] Makem gud wanem samting Tok blong God i talem, we i olsem impoten rod blong givhan long yumi blong kasem laef olsem blong olwe. [Ridim Jon 17:3.] Buk ya bambae i givhan long yu blong kasem save ya we i lidim yu i go long laef we i no save finis.” Mekem plan blong gobak, blong tokbaot haf wan kasem faef long japta 1.
Openem buk i go long pej 188-189, soem pija, mo yusum tok we oli raetem i stap blong askem long man blong haos se: “?Yu yu wantem laef long Paradaes, taem wol i fulap long save blong God? [Letem man i ansa. Nao ridim Aesea 11:9.] Buk ya bambae i givhan long yu blong yu kasem save long wanem samting Baebol i talem long saed blong Paradaes, mo olsem wanem yumi save stap long hem.” Mekem rod blong gobak blong tokbaot haf 11-16 blong japta 1.
Learn From the Great Teacher (Franis/Inglis)
“?Yu yu ting se wol bambae i kam moa gud sipos ol man oli folem tok ya? [Ridim Matiu 7:12a. Letem man i ansa.] I gat plante lesen insaed long buk ya, we oli kamaot long tija ya we i hae moa long olgeta man long wol.” Tokbaot ol pija long japta 17, mo ol tok we i joen wetem ol pija ya.
“Bighaf blong ol papa mama tede oli traem blong givim ol gudfala tijing long ol pikinini blong olgeta. ?Yu yu ting se samting ya i impoten? [Letem man i ansa. Ridim Ol Proveb 22:6.] Makem gud se ol papa mama oli mas stat blong trenem ol pikinini blong olgeta taem oli smol nomo. Oli wokem buk ya blong givhan long ol papa mama blong mekem olsem.” Tokbaot ol pija long japta 15 no 18, mo ol tok we i joen wetem ol pija ya.
“Plante taem ol papa mama oli sapraes long ol kwestin we ol pikinini blong olgeta oli askem. Sam long ol kwestin ya oli had blong yumi ansarem. ?I tru? [Letem man i ansa. Nao ridim Efesas 6:4.] Buk ya i save givhan long ol papa mama blong ansarem ol kwestin blong ol pikinini blong olgeta tede.” Tokbaot sam pija long japta 11 mo 12 no japta 34 kasem 36, mo ol tok we i joen wetem ol pija ya.
Life—How Did It Get Here? By Evolution or by Creation? (Franis/Inglis)
“Yumi evriwan i wari from raf fasin mo fasin blong brekem loa we oli kamaot long ples blong yumi. ?Yu yu ting se i gat wan man we i save rod blong stretem ol problem ya? [Letem man i ansa.] God i gat wan rod blong stretem ol trabol ya.” Tanem i go long pej 196; ridim mo eksplenem Ol Proveb 2:21, 22 we i stap long haf 19. Soemaot nem blong japta 16, mo askem man sipos hem i glad blong ridim buk ya.
Mankind’s Search for God (Franis/Inglis)
“?From we tede i gat plante defren kaen skul, samtaem yu yu stap askem se olsem wanem yumi save luksave skul we God i agri long hem?” Afta we man ya i ansa, openem buk i go long pej 377. Tokbaot poen namba 7, mo askem sipos man blong haos i agri se trufala skul i mas joenem ol man blong ol defdefren laen, oli kam wan nomo. Ridim wan vas we i stap long buk, mo sipos i gat taem, tokbaot sam moa poen we oli stap long lis. Sipos man i rili soemaot intres, givimaot buk long hem. Taem yu rere blong livim hem, yu save aksem se: “?Trufala skul i mas gat paoa olsem wanem long fasin blong man?” Mekem plan blong gobak blong ansa long kwestin ya.
My Book of Bible Stories (Franis/Inglis)
Yu save talem se: “Halo, mifala i kam tede blong givhan long ol man blong oli kasem save from wanem God i raetem Baebol. ?Samtaem yu tu yu stap askem kwestin olsem? [Letem man i ansa.] Wan risen we samfala man oli no kasem save long hem, hemia se God i raetem Baebol blong givim woning. Tingting ya i stap long 1 Korin 10:11. [Ridim.] Ol woning blong God oli no blong mekem man i fraet be blong wekemap tingting blong ol man blong oli lukaot rod blong kasem laef. Hemia hem i nambatu risen from wanem Baebol i stap. Seken Timoti 3:15 i halpem yumi blong luksave se ol yangfala wetem ol olfala, olgeta evriwan oli mas savegud Tabu Buk ya, nao God bambae i sevem olgeta. [Ridim.] Bambae mi soemaot long yu wan eksampol blong hapi taem ya we God bambae i sevem ol man blong hem. Wan man blong raetem Baebol, Aesea, i bin talemaot taem ya, olsem yu save luk long wan stori long buk ya, My Book of Bible Stories.” Tanem buk i go long Stori 71 mo ridim faswan mo laswan haf. Askem man blong haos sipos hem i glad blong ridim buk ya.
?Afta we yu talem halo, yu save talem se: “I gat plante samting tede we oli mekem se yumi rili wari long saed blong fiuja, i tru? [Givim janis blong man i ansa, nao talem sam eksampol.] ?Yu yu ting se ol samting bambae oli kam moa gud samtaem, mo se ol man bambae oli laef long wan wol we i gat pis mo seftaem? [Letem man i ansa.] Makem gud promes blong Baebol se ol samting bambae oli kam gud, olsem i stap long 2 Pita 3:13. [Ridim, mo storian long vas ya.] God i promes long wan ‘niufala wol.’ ?Long tingting blong yu, God i minim wanem taem hem i tokbaot wan ‘niufala wol’? ?Samting ya i minim se bambae hem i wokem wan narafala wol bakegen, wetem niufala graon blong yumi wokbaot long hem, nao bambae i putum nem blong hem se ‘niufala wol’? ?Yumi, yumi rili nidim niufala graon, ol niufala hil, wetem ol reva mo tri? Makem gud se vas ya i talem se ‘stret fasin nomo bambae i stap’ long ‘niufala wol.’ Stret fasin i min se ol man oli mekem ol samting we i stret nomo, taswe i luk olsem se ‘niufala wol’ ya i minim ol man we fasin blong olgeta i kamgud, no ol stret man we oli laef long pis mo oli joengud wetem ol narafala man. Yumi no rili nidim blong God i wokem wan narafala wol bakegen. Yumi nidim nomo we wol i fulap long ol man we oli jenisim fasin blong olgeta i kamgud.” Sipos yu wantem mekem tok blong yu i isi nomo, we yu yusum wan vas nomo long storian blong yu, yu save finisim storian blong yu long ples ya, mo yu save openem buk ya My Book of Bible Stories i go long Stori 115. Soemaot pija we i stap long saed blong laef long “niufala wol.” Askem man blong haos sipos hem i glad blong ridim buk ya.
Revelesen—Kolosap i Kasem Nambawan En Blong Hem!
“Ating yu harem nius ya finis [talem wan nius we i jes kamaot]. Taem wan aksiden no wan narafala samting i kilim wan man i ded wantaem nomo, plante man oli traem tingbaot wan rod blong leftemap tingting blong famle blong hem. ?Wanem tingting blong yu long saed ya?” Wet long ansa. Nao openem Revelesen buk i go long pej 299, mo soem pija blong laef bakegen long ded. Gohed olsem: “Plante man oli sapraes taem oli kasem save se ol stret man mo ol man we oli no stret tu bambae oli laef bakegen long Paradaes long wol ya. [Ridim Ol Wok 24:15 long haf 9 long pej 297, mo yusum ol tok blong haf 10 blong eksplenem.] Buk ya i talem plante narafala samting tu long saed blong stamba tingting blong God long fiuja.”
The Bible—God’s Word or Man’s? (Franis/Inglis)
“Yumi laef long wan taem we klosap olgeta man oli kasem wan bigfala problem long laef blong olgeta. Plante man oli traem faenem advaes blong lidim olgeta. Samfala oli go luk kleva blong kasem help. ?Yu yu ting se weples nao yumi save faenem ol gudfala advaes we i rili givhan long yumi? [Letem man i ansa.] Baebol i tokbaot wan impoten samting we yumi evriwan i mas kasem save long hem. [Ridim 2 Timoti 3:16. Nao openem buk i go long pej 187, mo ridim haf 9.] Buk ya bambae i givhan long yu blong kasem save se, taem yumi folem ol tijing blong Baebol, oltaem hemia beswan rod.”
Man We i Hae Moa Long Olgeta Man
“Long taem blong Krismas, ol man oli stap tingbaot Jisas. Be, from we plante nogud samting oli stap hapen long olgeta ples long wol, ating samfala oli stap askem sipos Jisas i rili kea long yumi. ?Wanem tingting blong yu?” Wet long ansa. Go long japta 24, mo storian smoltaem long risen from wanem Jisas i kamdaon long wol. Ridim Jon 15:13, mo tokbaot bigfala lav we Jisas i gat long ol narafala.
“Taem wan man i tokbaot Jisas, plante oli tingbaot hem olsem wan bebi, no olsem wan man we i harem i soa long pos, klosap i ded. Oli save nomo long saed blong taem we Jisas i bon mo taem we hem i ded. Oli no tingting gud long ol nambawan samting we hem i talem mo we hem i mekem long laef blong hem. Samting we hem i mekem i gat paoa long laef blong evri man long wol. Taswe i impoten tumas blong kasem save ol nambawan samting we hem i mekem long bighaf blong yumi.” Ridim Jon 17:3. Openem buk i go long fastok, mo ridim haf 4.
?Wanem Samting We God i Wantem Yumi Blong Mekem?
“?Yu yu ting se God i wantem we yumi mas kasem ol bigfala trabol long laef, olsem olgeta we yumi fesem tede? [Letem man i ansa. Biaen ridim Matiu 6:10.] ?Yu yu bin tingbaot samtaem se Kingdom blong God i olsem wanem?” Openem buklet i go long stadi 6, mo ridim ol kwestin we oli stap long fas haf blong stadi ya. Storian long stadi ya, no mekem plan blong storian long nekis visit.
“Nating se tede ol man oli kasem plante moa save, be sik mo ded i mekem ol man long wol oli safa mo oli sore yet. ?Yu yu save wanem samting bambae Jisas i mekem long ol sikman, ol olfala, mo long ol dedman tu?” Letem man i ansa. Sipos man i wantem save ansa blong kwestin ya, openem buklet i go long stadi 5, mo ridim ol kwestin blong haf 5-6. Storian long saed blong tufala haf ya, no mekem plan blong storian long nekis visit.
Wosipim Trufala God
“?Long tingting blong yu, yumi mas lukluk i go wea blong kasem help blong yumi save winim ol trabol blong laef tede? [Letem man i ansa. Biaen ridim Rom 15:4.] Makem gud se Baebol i tijim yumi, i mekem tingting blong yumi i strong, i mekem yumi harem gud, nao ol samting ya oli givhan long yumi blong mekem tingting blong yumi i longfala long taem blong trabol. Buk ya i givim gudfala advaes we yumi save folem blong kasem help from Baebol riding blong yumi.” Tokbaot fo poen we oli stap long pej 30.
“Stat long taem we Jisas i stap long wol, plante man oli bin prea blong Kingdom blong God i kam. ?Samtaem yu yu stap tingting se sipos Kingdom ya i kam, wanem bambae i hapen long ol man? [Letem man i ansa. Biaen ridim Daniel 2:44.] Buk ya i eksplenem wanem ya Kingdom blong God, wanem samting bambae hem i mekem, mo olsem wanem gudfala rul blong hem bambae i halpem yumi.” Tokbaot pija we i stap long pej 92-93.