No Lusum
Sam Fastok Blong Yusum Long Wok Blong Prij
?Olsem Wanem Blong Yusum Pepa Ya?
Plante long ol fastok ya oli bin kamaot finis long ol Kingdom Wok. Traem yusum plante defren fastok long wok blong prij, mo luk wanem frut i kamaot. Holem pepa ya oltaem, mo ridim bakegen taem yu rere blong go prij.
Maet yu pulum man blong intres long Tok blong God sipos tok blong yu i sot mo i klia. Askem wan kwestin, nao ridim ansa we i stap long Baebol. Maet yu save traem wan long ol toktok olsem:
“?Wanem tingting blong yu long saed blong fiuja? ?Yu ting se bambae fiuja i gud no yu ting se bambae fiuja i nogud? [Letem man i ansa.] Baebol i bin talemaot ol samting we i stap hapen long laef tede we i mekem tingting blong man i trabol, mo hem i talem tu, wanem bambae i hapen biaen.”—2 Tim. 3:1, 2, 5; Prov. 2:21, 22.
“Tede plante man oli wari from helt blong olgeta. ?Yu save se God i promes blong winim olgeta problem long saed blong helt mo finisim olgeta blong olwe?”—Aes. 33:24; Rev. 21:3, 4.
“?Yu yu save se Baebol i talemaot se bambae i gat wan gavman nomo we i rulum ful wol?”—Dan. 2:44; Mat. 6:9, 10.
“?Yu ting se bambae laef i olsem wanem sipos Jisas Kraes i rulum wol ya?”—Sam 72:7, 8.
“Plante man oli harem nogud from fasin seraot we i stap bitwin ol man mo woman, ol defren kaen skul no kala blong skin. ?Yu ting se God i harem olsem wanem long fasin ya?”—Wok 10:34, 35.
“Yumi save se taem Jisas Kraes i stap long wol, hem i bin mekem plante merikel. ?Sipos yu save askem hem blong mekem wan moa merikel, bambae yu askem hem blong mekem wanem?”—Sam 72:12-14, 16.
“Plante man oli les blong harem ol nius long saed blong ol problem. Oli wantem save olsem wanem blong winim ol problem ya. ?Be long weples nao, yumi save faenem ol stret ansa long ol problem blong yumi?”—2 Tim. 3:16, 17.
“?Yu save wanem ya Kingdom we yumi prea from long Prea blong Masta?”—Rev. 11:15.
Rod Blong Statem Toktok
Ol kwestin we i stap daon oli kamaot long Reasoning buk, mo i soem namba blong pej long Reasoning buk (Inglis) we yu save faenem ansa long olgeta:
?From wanem yumi stap kam olfala mo yumi ded? (98)
?Wanem i hapen long ol dedman? (100)
?I gat ol gudfala risen blong bilif long God? (145)
?God i rili kea long wanem we i stap hapen long ol man? (147)
?God hem i wan trufala man? (147)
?Olgeta man we oli gat gudfala fasin bambae oli go long heven? (162)
?Man i mas go long heven blong gat wan hapi fiuja? (163)
?From wanem i impoten blong save mo yusum prapa nem blong God? (196)
?I tru se Jisas Kraes hem i God? (212)
?Kingdom blong God bambae i mekem wanem? (227)
?From wanem man i laef? (243)
?Wanem i save mekem mared i kam moagud? (253)
?God i agri long evri skul? (322)
?Olsem wanem man i save makemaot trufala skul? (328)
?Setan i gat wanem paoa long ol man long wol tede? (364)
?From wanem God i letem man i safa? (393)
?From wanem i gat fulap fasin nogud long wol? (427)
?Hu i rulum wol—God no Setan? (436)
Sam Rod Blong Seremaot Buklet Ya Wanem
“Ating yu agri se plante man oli bilif long God. Ol man we oli bilif long hem oli agri se God i wantem yumi blong mekem sam samting. Be, i gat wan samting we ol man oli no save agri tugeta long hem, hemia se: ?Wanem samting nao we God i wantem yumi blong mekem?” Ale, soem buklet ya Wanem, openem long stadi 1, mo storian long hem.
“Ol famle oli stap fesem fulap problem tede. ?Be samtaem yu bin tingbaot wanem nao spesel rod blong mekem famle i hapi?” Letem man i ansa, nao talem se insaed long Baebol, God i soemaot spesel rod blong mekem famle i hapi. Ridim Aesea 48:17. Openem buklet Wanem long stadi 8, mo soem sam vas blong Baebol we oli givim stret advaes i go long ol wanwan memba blong famle. Ridim lis blong ol kwestin we oli stap long stat blong stadi ya. Askem man sipos hem i glad blong ridim ol ansa.
“Insaed long buklet ya i gat wan nambawan program blong stadi long saed blong ol stamba tijing blong Baebol. Long evri pej, bambae yu faenem ol ansa long ol kwestin we oli bin mekem tingting blong man i trabol long ol handred yia we i pas. Eksampol, ?Wanem Stamba Tingting Blong God Long Saed Blong Wol Ya?” Openem buklet ya long stadi 5, mo ridim ol kwestin long stat blong hem. Askem man we i lesin blong jusum wan kwestin we hem i intres moa long hem. Nao ridim paragraf we i stret long kwestin ya, mo ridim ol vas blong Baebol we oli laenap wetem. Talem long hem se i isi nomo blong faenem stret ansa long ol narafala kwestin ya tu, olsem we yutufala i bin faenem long kwestin we hem i bin jusum. Talem se yu glad blong kambak bakegen blong tokbaot wan narafala kwestin.
“?From wanem plante pikinini oli gat raf fasin long skul? ?Yu ting se hemia i kamaot from we ol papa mama oli no tijim gud ol pikinini blong olgeta? ?No yu ting se i gat wan narafala risen, olsem we Setan i gat paoa long tingting blong man?” Letem man i ansa. Sipos hem i talem se i from we Setan i gat paoa long tingting blong man, ridim Revelesen 12:9, 12. Makem se Setan nao i biaenem ol trabol we oli kam antap bigwan long wol. Biaen, openem buklet ya Wanem long stadi 4, mo askem sipos hem i bin tingbaot samtaem se Devel i kam long weples. Nao yu save gohed blong ridim mo storebaot tufala faswan paragraf. Sipos man i talem risen blong raf fasin long skul se “ol papa mama oli no trenem gud pikinini blong olgeta,” ridim 2 Timoti 3:1-3 mo soemaot ol fasin we oli mekem problem ya i stap kam antap. Biaen, openem buklet ya Wanem long stadi 8, ridim paragraf 5, mo gohed long storian.
“?Yu ting se prea i save halpem yumi long olgeta problem blong laef tede? [Letem man i ansa.] Plante man oli talem se prea i givim pis long tingting blong olgeta. [Ridim Filipae 4:6, 7.] Nating se i olsem, maet oli harem se God i no stap ansarem prea blong olgeta. [Openem buklet ya Wanem long stadi 7.] Buklet ya i eksplenem olsem wanem prea i save karem moa frut long laef blong yumi.”
“Mifala i stap toktok wetem ol man long saed blong kwestin ya se, ?I gat wan Baebol nomo, be from wanem i gat plante skul long wol? ?Long tingting blong yu, from wanem i gat plante defren skul tede? [Letem man i ansa. Openem buklet ya Wanem long stadi 13, mo ridim ol faswan kwestin.] Sipos yu ridim haf ya, bambae yu kasem ansa long ol kwestin ya.”
Afta we yu givim Wajtaoa no Wekap! magasin long wan man, askem sipos yu save ridim wan smol haf blong buklet Wanem long hem. Sipos hem i agri, openem buklet ya long stadi 5. Soem ol kwestin long stat blong stadi ya, mo talem long hem blong lesin mo traem faenem ansa long faswan kwestin taem yu ridim faswan paragraf. Afta we yu ridim paragraf ya, askem kwestin mo letem hem i ansa. Askem sipos hem i wantem karem buklet ya, mo sipos hem i agri, mekem plan blong visitim hem bakegen, blong hem i save ansarem tufala nekis kwestin we oli stap long lis.
Sam Rod Blong Seremaot Save Buk
Holem Baebol long han blong yu, mo statem toktok blong yu olsem: “Mifala i wantem serem wan vas wetem evriwan long eria blong yu. Vas ya i talem . . . ” Ridim Jon 17:3, mo askem: “?Yu yu makem wanem promes we bambae yumi gat sipos yumi kasem stret save? [Letem man i ansa.] ?Weples yu save faenem stret save olsem?” Afta we hem i ansa, soem Save buk, mo talem: “Buk ya i soemaot save ya blong lidim yumi long laef we i no save finis. Hem i givim ansa long ol kwestin we bighaf blong ol man oli askem long saed blong Baebol.” Soem nem blong ol japta, mo askem sipos i gat wan long ol japta ya we i stret long samting we maet hem i bin tingbaot samtaem.
“?Samtaem yu bin tingbaot sipos God i rili kea se i gat fasin i no stret mo fasin safa we i stap hapen long ol man mo long yumi tu tede? [Letem man i ansa.] Baebol i talem se God i lavem yumi mo hem i promes se bambae hem i halpem yumi long ol taem blong trabol.” Ridim sam haf blong Ol Sam 72:12-17. Openem Save buk long japta 8, mo talem se japta ya i givim gudfala ansa long kwestin ya we plante milian man oli bin askem se, ?From wanem God i letem ol man blong oli harem nogud? Sipos i gat taem, tokbaot sam poen long sam vas we i stap long paragraf 3 kasem 5, sipos no, yu save mekem olsem taem yu visitim hem bakegen.
“Plante long yumi i bin lusum wan famle no fren long ded. ?Samtaem, yu tingbaot sipos wan dei bambae yumi save luk olgeta bakegen? [Letem man i ansa.] Jisas i bin pruvum se olgeta we yumi laekem tumas bambae oli save girap bakegen long ded. [Ridim Jon 11:11, 25, 44.] Nating se samting ya i bin hapen sam handred yia bifo, hem i soemaot wanem we God i promes blong mekem long yumi.” Openem Save buk long pija we i stap long pej 85, mo ridim smol tok blong hem. Biaen, soem pija we i stap long pej 86, mo storian long saed blong hem. Blong mekem rod blong visitim hem bakegen, askem se: “?Yu yu wantem save from wanem yumi stap kam olfala mo yumi ded?” Mekem visit bakegen blong tokbaot japta 6.
“?Samtaem yu bin tingbaot from wanem ol man oli wantem laef longtaem moa?” Afta we man i ansa, openem Save buk long japta 6, mo ridim paragraf 3. Mekem man i tingting gud long ol vas we oli raetem i stap long haf ya. Soem tufala kwestin we i stap long en blong paragraf, mo askem sipos hem i wantem faenem ansa blong olgeta. Sipos hem i glad, i gud yu gohed blong tokbaot sam long ol paragraf we oli kam biaen.
“Mifala i stap askem long ol man sipos oli bilivim tok ya . . . ” Ridim Jenesis 1:1, mo askem se: “?Yu yu agri wetem tok ya?” Sipos hem i agri, ale talem: “Mi tu mi bilivim tok ya. ?Be, sipos God i wokem olgeta samting, yu ting se hem i stamba blong ol nogud fasin tu?” Wet long man blong i ansa, mo ridim Prija 7:29. Openem buk Save long japta 8, mo ridim paragraf 2. Sipos hem i no agri long tok blong Jenesis 1:1, leftemap tingting blong hem blong skelem ol pruf we i soemaot se i gat wan Man we i Wokem olgeta samting.—Lukluk Reasoning buk, pej 84 kasem 86.
“Long taem blong yumi, tingting we man i gat long saed blong ol gudfala fasin, i jenis kwiktaem. ?Yu yu agri se nidim wan samting we yumi save trastem blong lidim yumi? [Letem man i ansa.] Nating we Baebol i olfala moa i bitim ol narafala buk, hem i givim ol advaes we i stret long laef blong yumi tede mo hem i givhan blong gat wan famle laef we i hapi.” Openem Save buk long japta 2, mo ridim paragraf 10 mo fas haf blong paragraf 11. Ridim 2 Timoti 3:16, 17.
“?Yu yu wantem save wanem fiuja blong yumi ol man, mo blong wol tu? [Letem man i ansa.] !Baebol i yusum wan tok nomo blong soem se fiuja mbae i olsem wanem—!hemia Paradaes! Ples ya nao we God i putum faswan man mo woman long hem, taem hem i wokem tufala. Traem luk sam tok we oli talem se Paradaes ya i olsem wanem.” Openem Save buk long pej 8, mo ridim paragraf 9, aninit long smol stamba tok ya “Laef Long Paradaes.” Biaen, tokbaot ol poen long paragraf 10, mo ridim vas we oli raetem i stap long haf ya, Aesea 55:10, 11. Askem sipos hem i glad blong gohed blong tokbaot se laef long Paradaes bambae i olsem wanem, mo tokbaot paragraf 11-16.
Taem yu visitim bakegen olgeta we yu bin givim Wajtaoa no Wekap! long olgeta, maet yu talem tok ya:
“Lastaem we mi kam, mi glad blong givim Wajtaoa long yu. Maet yu luksave se fulwan nem blong magasin ya, hemia Wajtaoa I Talemaot Kingdom Blong Jeova. Tede mi wantem eksplenem se Kingdom ya i wanem, mo wanem we Kingdom ya i save mekem long yu mo famle blong yu.” Openem buklet ya Wanem long stadi 6, ale ridim mo storian long hamas we man i gat taem blong lesin.
“I no longtaem i pas, mi bin givim Wajtaoa mo Wekap! long yu. Tufala magasin ya oli pulum man blong tinghae long Baebol mo oli givim gudfala advaes blong lidim laef blong man. Long tingting blong mi, i impoten we olgeta man oli kasem save long Tok blong God. Taswe mi kambak blong soem wan samting we i save halpem yu blong mekem olsem.” Soem buklet ya Wanem, no Save buk, mo askem sipos hem i wantem stadi Baebol.
Taem yu seremaot wan long ol buk we i gat 192 pej, yu save yusum tok ya:
“Plante man oli talem se i impoten blong kasem gudfala edukesen ?Long tingting blong yu, wanem kaen edukesen i save givhan long man blong kasem glad mo laef we i ron gud? [Letem man i ansa. Ridim Ol Proveb 9:10, 11.] Smol buk ya [talem taetel blong buk we yu seremaot] i stanap long Baebol. Hem i soem stamba save ya we hem nomo i naf blong lidim man long laef ya we i no save finis.” Soemaot wan eksampol blong samting ya insaed long buk, mo leftemap tingting blong hem blong ridim buk ya.
!Sipos yu stap yusum wan fastok we yu luk se i karem gudfala frut mo i pulum man blong soem intres, i stret blong yu gohed blong yusum! Bambae yu jenisim toktok blong yu smol nomo blong i laenap wetem buk we yu seremaot long manis ya.
Ol Narafala Buk
Yu save faenem advaes olsem wanem blong seremaot ol narafala buk mo buklet long Watch Tower Publications Indeks aninit long stamba tok ya:
Ol Fastok
Lis blong ol Buk
Askem Stret Long Man
Blong statem wan Baebol stadi, traem yusum wan fastok olsem:
“?Yu yu save se long sam menet nomo, yu save kasem ansa blong wan impoten kwestin long Baebol? Eksampol, . . . ” Ale, askem wan kwestin we i stap long fas haf blong wan long ol stadi blong buklet ya Wanem we yu ting se man ya bambae i intres long hem.
“Mi mi kam smoltaem nomo blong soem long yu program blong mifala blong stadi Baebol. Bambae i tekem faef menet nomo blong soem samting ya long yu. ?Yu yu gat faef menet naoia?” Sipos hem i talem yes, yusum stadi 1 long buklet ya Wanem blong soem rod blong stadi, mo ridim wan no tu vas nomo we i stret. Biaen, yu save askem se: “?Wetaem bambae yu gat 15 menet blong yumitu save lukluk nekiswan stadi?”
“Plante man oli gat wan Baebol, be oli no luksave se buk ya i ansa long ol impoten kwestin we yumi gat long saed blong fiuja. Sipos yu yusum buk ya [buklet Wanem no Save buk] blong stadi wan aoa evri wik, yu save kasem ol stamba tijing blong Baebol long sam manis nomo. Mi mi glad blong soem long yu olsem wanem blong mekem stadi ya.”
“Mi stap askem long ol man sipos oli wantem stadi Baebol long haos blong olgeta, we oli no pem. Sipos yu glad, bambae mi tekem smol taem naoia blong soem long yu olsem wanem ol man long bitim 200 kantri oli stap storebaot Baebol long haos blong olgeta. Yumi save yusum eni long ol stamba tok ya blong storian. [Soem nem blong ol japta long Save buk.] ?Wanem japta we yu intres moa long hem?” Wet se man i jusum wan japta. Openem buk long japta we hem i jusum, mo statem stadi long faswan paragraf.
“Mi mi stap givim fri Baebol stadi long man, mo mi gat taem long program blong mi blong halpem sam moa studen. Mifala i yusum buk ya we i givhan blong stadi long Baebol. [Soem Save buk.] Program ya i gohed blong sam manis nomo, mo i givim ansa long ol kwestin olsem: ‘?From wanem God i letem ol man blong oli harem nogud? ?From wanem yumi kam olfala mo yumi ded? ?Olsem wanem long olgeta we yumi laekem tumas we oli ded? ?Mo olsem wanem yumi save kam klosap long God?’ ?Yu yu wantem we mi soem long yu olsem wanem mifala i mekem stadi ya?”