Talemaot Gud Nyus Blong Kingdom Wetem Ol Buklet
1 !Yumi glad tumas blong save trutok mo blong stap long medel blong olgeta we oli stap wok strong blong talemaot gud nyus! Ol man afsaed long ogenaesesen blong God oli nidim tumas blong harem gud nyus blong Kingdom. Ol buklet olsem !Yu Yu Save Harem Gud Blong Olwe Long Wol!, “Look! I Am Making All Things New,” mo Gavman Ya We Bambae i Mekem Paradaes, oli eksplenem trutok long saed blong Kingdom long isi fasin. Oli soemaot klia olsem wanem blong laef long wol ya aninit long rul blong Kingdom blong God. Mo oli pulum ol man we oli ridim olgeta blong tingbaot ol trufala samting long saed blong Kingdom we Tok blong God i eksplenem. I tru, taem yumi livim wan buklet wetem man we i intres, hemia stat blong wok blong yumi nomo. (1 Kor. 9:23) Yumi mas kwik blong gobak long ol man we yumi livim buklet wetem olgeta, blong askem olgeta blong stadi wetem yumi long buk ya Save Blong Lidim Yu Long Laef We i No Save Finis. ?Olsem wanem yumi save mekem samting ya long Ogis?
2 Yumi save talem smol toktok nomo blong seremaot buklet ya “!Yu Yu Save Harem Gud Blong Olwe Long Wol!” Yu save soem buklet ya nao yu talem se:
◼ “Mi laekem blong soem long yu samting we i gat wan nambawan mesej insaed long hem.” Openem buklet ya Harem Gud Long Wol!, nao ridim faswan haf blong fastok. Nao yu save gohed olsem: “Buklet ya i ansarem kwestin ya tu [soem smol stampa tok antap long pija namba 8]: ‘?From wanem man i stap ded?’ Bambae yu glad blong stadi long ol pija mo ridim ol vas long buklet ya. Sipos yu glad blong mekem samting ya, yu save karem hemia blong 40 VT.”
3 ?Bambae yu talem wanem taem yu gobak long wan man we yu bin livim buklet ya “Harem Gud Long Wol!” wetem hem? Maet yu talem olsem:
◼ Soem pija namba 49 long buklet ya Harem Gud Long Wol!, nao askem se: “?Ating bambae yu agri se pija ya i naes tumas? [Letem man i ansa.] Hem i stap insaed long buk ya we mi bin livim wetem yu lastaem. Mi wantem askem long yu kwestin ya we i stap long nekis pej.” Tanem pej i go long pija namba 50 mo ridim kwestin ya: “ ‘?Yu yu wantem laef foreva long nambawan paradaes ya?’ [Wet long ansa.] Sipos yu wantem, traem lukluk samting we buklet i talem se yu mas mekem: ‘Yu mas kasem moa save long ol samting we God i talem.’ [Ridim Jon 17:3.] Mi mi glad blong stadi Baebol wetem yu we yu no pem. ?Yu yu glad blong mekem samting ya?” Putum wan stret dei mo taem blong kambak.
4 Mo tu, taem yu stap seremaot buklet ya “Harem Gud Long Wol!” maet yu soem pija long fored fastaem, mo askem se:
◼ “?Yu ting se i nidim wanem blong mekem ful wol i kam olsem hemia?” Wet long ansa. Tokbaot sam samting insaed long pija. Nao yu save talem se: “Bighaf blong ol man oli harem se i no save gat wan wol olsemia. Be God hem i naf blong mekem samting ya. [Tokbaot sam poen long haf 41. Nao ridim Aesea 9:6.] God i promes blong mekem wan nyufala wol we ol man blong olgeta nesen bambae oli haremgud long wan nambawan paradaes. Mi glad sipos yu ridim buklet ya. Bambae hem i soem long yu mo famle blong yu olsem wanem yufala i save haremgud long nambawan fyuja we bambae God i mekem.”
5 Taem yu gobak bakegen, yu save yusum buklet ya “Harem Gud Long Wol!” blong eksplenem from wanem yumi nidim moa save long saed blong Baebol. Maet yu soem buklet ya bakegen mo talem se:
◼ “Fastaem we mi bin soem pija ya long yu, yu agri se i gud tumas sipos yumi save laef long wan naesfala wol olsem. Blong kasem wan laef olsem, i gat wan samting we yumi evriwan i mas mekem.” Openem buklet long haf 50. Ridim kwestin mo vas long Jon 17:3. Nao eksplenem se ol Wetnes blong Jeova oli tijim ol man long saed blong Baebol long haos blong olgeta mo ol man oli no pem. Talem se bambae yu soem olsem wanem yumi mekem stadi long buk ya Save.
6 Taem yu seremaot buklet ya “Gavman Ya We Bambae i Mekem Paradaes,” maet yu talem olsem:
◼ “Plante man oli bin talem long mi se bambae oli glad sipos oli stap laef aninit long wan gavman we i save winim ol bigfala trabol we yumi fesem tede. [Tokbaot ol problem long ples blong yu, olsem no gat wok, fasin blong kilim man i kam antap mo ol drag.] Ol samting ya oli mekem yumi harem se yumi no stap sefgud mo yumi no sua long saed blong fyuja blong yumi mo famle blong yumi. ?Yu ting se wan dei bambae i gat wan gavman we i save winim ol problem ya? [Wet long ansa.] Ating yu bin talem Prea blong Masta samtaem. Sipos yes, ?yu yu save se yu stap prea from wan stret gavman?” Openem Gavman buklet i go long pej 3, mo ridim haf wan mo tu. Askem man blong haos blong karem buklet.
7 Sipos man blong haos i bin karem buklet ya “Gavman Ya We Bambae i Mekem Paradaes” lastaem, yu save talem olsem taem yu gobak:
◼ “Lastaem yumi bin tokbaot nid blong wan stret gavman we i save winim ol trabol blong man. Buklet we mi bin livim wetem yu i poen i go long Kingdom blong God olsem wan hop nomo blong yumi. Samfala oli wantem save wanem we gavman ya i save mekem, blong givim long yumi wan laef we i moa gud. Baebol i soem se Kraes i pruvum finis we hem i save winim ol trabol we ol lida blong wol oli no naf blong winim.” Openem buklet ya Gavman i go long pej 29, mo ridim ol fo laswan haf. Nao yu save talem se: “?Fyuja ya i nambawan, no? ?Bambae yu yu glad blong stap laef long taem ya?” Wet long ansa. Ridim Jon 17:3. Pulum man blong kasem moa save tru long stadi blong Baebol.
8 Sipos yu stap seremaot sam narafala buklet, yu save mekemrere wan rod blong storeyan, folem ol eksampel we oli stap antap. Mekem reregud mo askem blesing blong Jeova long wok blong yu blong talemaot gud nyus blong Kingdom.