Folem Jeova, Soem Trufala Fasin Kea Long Ol Narafala
1 Jeova i beswan eksampel blong fasin blong rili kea long narafala. From we hem i King blong heven mo wol, hem i save mo i tingbaot nid blong ol man we hem i wokem olgeta. (1 Pita 5:7) Jisas i pulum ol man blong hem blong folem fasin blong Papa blong hem, we i stap mekem san i saen mo ren i foldaon long ol gudfala man mo long ol man nogud tu. (Mat. 5:45) Yu save folem Jeova taem yu soem se yu rili kea long ol narafala—hemia se yu rere blong serem mesej blong Kingdom wetem olgeta man we yu mitim olgeta. Sipos yu savegud ol samting we i stap insaed long ol buklet we yumi seremaot long Julae, bambae yu yu naf blong halpem ol narafala long saed blong speret. Advaes we i kam biaen i save givhan long yu blong reregud blong go prij, mo blong mekem ol gudfala visit bakegen long olgeta we oli soem intres.
2 Blong seremaot buklet ya “?God i Rili Kea Long Yumi?” yu save talem se:
◼ “Maet yu bin tingbaot: Sipos God i rili kea long yumi, ?from wanem hem i letem ol man oli safa? [Letem man i ansa.] Buklet ya i givim stret ansa long kwestin ya. Antap long hemia, hem i soem se God i promes blong tekemaot ol trabol we ol man oli mekem blong spolem olgeta bakegen mo blong spolem wol ya.” Ridim haf 23 long pej 27. Soem pija we i stap daon long sem pej, mo ridim Ol Sam 145:16 long haf 22. Askem man blong haos blong karem buklet. Sipos hem i karem, stanemap wan kwestin we yu save ansarem long nekis visit, olsem: “Maet yu wantem save: ?Olsem wanem God bambae i mekem tingting blong hem i kamtru, karem ol blesing ya oli kam long ol man, mo mekem wol ya i kam wan paradaes?”
3 Taem yu gobak long olgeta we yu bin livim buklet ya “?God i Rili Kea Long Yumi?” wetem olgeta, maet yu save stat storeyan long rod ya:
◼ “Lastaem yumitu bin storeyan, yumi tokbaot se God i rili kea long yumi, mo se hem i gat tingting blong tekemaot ol trabol we ol man oli mekem blong spolem olgeta mo blong spolem wol ya.” Openem buklet long pej 2 mo 3, soem pija, mo talem se: “Long en blong storeyan blong yumitu lastaem, mi bin stanemap wan kwestin: “?Olsem wanem God bambae i mekem tingting blong hem i kamtru, karem ol blesing ya oli kam long ol man, mo mekem wol ya i kam wan paradaes? ?Wanem tingting blong yu long kwestin ya?” Wet long ansa. Openem buklet i go long pej 17, ridim haf 2 mo Daniel 2:44. Nao ridim haf 12 long pej 18. Askem man blong haos sipos hem i glad blong tokbaot haf 9 blong buklet ya wetem yu. Sipos hem i glad, stadi long haf ya wetem hem.
4 Hemia wan rod blong storeyan we yu save yusum blong seremaot buklet ya “When Someone You Love Dies.” Soem buklet, nao talem se:
◼ “Tede mifala i stap seremaot buk ya we i karem hop mo i leftemap tingting blong plante milyan man we oli bin lusum wan we oli laekem tumas long ded. ?Yu bin tingbaot sipos ol dedman oli gat wan hop blong fyuja? [Wet long ansa.] Baebol i talem klia, promes blong God blong mekem ol dedman oli laef bakegen.” Ridim Jon 5:28, 29. Openem buklet mo tokbaot ol poen long laswan haf long pej 28 mo long faswan haf long pej 31. Soem ol pija we oli joen wetem ol haf ya. Askem man blong haos blong karem buklet ya. Blong mekem rod blong visitim man ya bakegen, yu save askem se: “?Olsem wanem yumi save sua se ded bambae i finis olgeta?”
5 Taem yu gobak long olgeta we yu bin livim buklet ya “When Someone You Love Dies” wetem olgeta, maet yu save storeyan olsem:
◼ “Taem yumitu storeyan lastaem, yumi bin tokbaot nambawan hop blong laef bakegen long ded. Buklet we mi bin livim wetem yu i eksplenem from wanem yumi save sua se bambae ded i finis olgeta. ?Yu yu faenem se ol promes blong God oli leftemap tingting blong yu mo mekem yu yu haremgud?” Wet long ansa. Nao openem buklet long pej 31, mo ridim haf 2 mo 3 wetem Revelesen 21:1-4. Makemgud we yumi gat hop blong neva ded, be blong stap laef gogo i no save finis. Sipos man blong haos i intres, askem long hem blong mekem wan Baebol stadi long buk ya Save, sipos yu luk se i stret blong mekem olsem. Sipos no, stanemap wan narafala kwestin blong mekem rod blong kambak bakegen.
6 Blong seremaot buklet ya “What Is the Purpose of Life—How Can You Find It?” maet yu talem samting olsem:
◼ “Plante man oli wantem save wanem ya mining blong laef. Oli stap tingbaot se: ‘?From wanem mi mi stap long wol ya? ?Mi mi stap go wea? ?Wanem fyuja blong mi?’ ?Yu ting se yumi save faenem ansa long ol kwestin ya weples? [Wet long ansa.] Traem luk wanem we Baebol i talem. [Ridim Sam 36:9.] ?Yu ting se Man we i Wokem olgeta man i beswan blong eksplenem from wanem yumi stap long wol ya? [Wet long ansa.] Buklet ya i soem nambawan tingting we God i gat long saed blong fyuja blong yumi.” Openem i go long pej 20 mo 21, ridim smol stampa tok, mo tokbaot pija. Nao askem man blong haos blong karem buklet ya. Sipos hem i glad, askem long hem: “?Olsem wanem yumi save sua se God i gat tingting yet blong mekem ol man oli laef foreva long Paradaes long wol ya?” Putum wan stret taem blong kambak.
7 Sipos yu bin livim buklet ya “What Is the Purpose of Life—How Can You Find It?”, yu save talem samting olsemia taem yu gobak:
◼ “Long laswan visit blong mi, mi glad tumas blong storeyan wetem yu long poen ya we Baebol i tokbaot, se laef i gat wan mining.” Soem pija long pej 31 mo askem se: “?Olsem wanem yumi save sua se God i gat tingting ya yet blong mekem ol man oli laef foreva long Paradaes long wol ya?” Ridim haf 3 long pej 20. Tokbaot ol poen aninit long smol stampa tok ya “Still God’s Purpose” (“Tingting Blong God Yet”) long pej 21. Tanem buklet i go long laswan pej, mo ridim haf we i tokbaot wan Baebol stadi we oli no pem. Soem buk ya Save, mo talem se yu glad blong soem olsem wanem yumi yusum buk ya blong stadi Baebol.
8 Long wok blong prij, yumi mas soem se yumi rili wantem halpem ol man we hat blong olgeta i stret, blong oli faenem ‘stret save blong trutok.’ (1 Tim. 2:4) Taswe, makemaot taem long program blong yu blong gobak bakegen long evriwan we oli karem wan buklet. Fasin blong yu blong soem se yu rili kea long olgeta, i save mekem se yu halpem samfala we oli stap krae mo harem nogud long ol rabis samting we ol gyaman skul oli stap mekem. Nao olgeta tu oli save kasem mak we bambae i sevem olgeta. (Esik. 9:4, 6) Mo tu, bambae yu kasem glad mo yu haremgud from we yu save se yu stap folem Jeova, taem yu soem trufala fasin kea long ol narafala.—Skelem wetem Filipae 2:20.