Yusum Ol Defren Buklet Long Wok Blong Prij
1 Ol man tede oli intres long plante defren samting. Taem yu prij long Julae, yu save karem ol defren buklet, mo yusum hemia we i stret long ol man we yu stap prij long olgeta. Maet bambae yu glad blong traem wan long ol rod ya blong storeyan:
2 Blong seremaot buklet ya “Gavman Ya We Bambae i Mekem Paradaes,” yu save askem se:
◼ “?Yu ting se wol ya bambae i olsem wanem sipos God nomo i stap rul long hem? [Wet long ansa.] Taem yumi talem Prea blong Masta, no Papa blong Yumi, we Jisas Kraes i bin tijim yumi long hem, yumi stap askem God blong hem i rul antap long wol ya. [Openem buklet long pej 3, mo ridim faswan haf, we i talem tok blong Matyu 6:10.] Sipos yu wantem stap long wan wol olsem, i gud we yu ridim buklet ya.” Askem man blong karem.
3 Yu save yusum buklet ya “When Someone You Love Dies” long rod ya:
◼ “?Yu ting se bambae i gat wan dei we neva yumi lusum wan we yumi laekem tumas long ded? [Wet long ansa.] Buklet ya we oli raetem long nambawan fasin, i mekem plante milyan man oli haremgud, from trufala promes blong Baebol se dei ya bambae i kam i no longtaem. [Openem long pej 5, mo ridim haf 5, wetem 1 Korin 15:21, 22. Nao tanem i go long pija long pej 30.] Long ples ya, man we i mekem pija ya i soemaot glad we yumi save gat, taem yumi welkamem olgeta we yumi laekem tumas, we bambae oli laef bakegen long ded. ?Be hapi taem ya bambae i kamaot weples? Buklet ya i givim ansa we i kamaot long Baebol.” Sipos man blong haos i tekem buklet, maet yu save ademap se: “Mi glad blong kambak bakegen mo tokbaot samting ya moa.”
4 Maet yu soemaot buklet ya “?God i Rili Kea Long Yumi?” mo yusum ol tok ya blong statem wan Baebol stadi:
◼ “Plante man oli askem plante kwestin long saed blong Baebol. Maet yu bin tingbaot wan kwestin we plante man oli intres long hem: ‘?God i Rili Kea Long Yumi?’ ” Nao sipos yu storeyan long ol haf long pej 3 mo 4, mo ridim Aesea 14:24, yu yu putum faondesen blong wan Baebol stadi. Finis wetem ol tok blong askem man blong karem buklet, mo mekem plan blong visitim hem bakegen blong tokbaot sam narafala kwestin.
5 Maet yu laekem blong traem isi rod ya blong storeyan wetem buklet ya “!Yu Yu Save Haremgud Blong Olwe Long Wol!”:
◼ “Wan long ol faswan samting we mi mi lanem long Baebol, hemia nem blong God. ?Yu yu save nem blong God? [Wet long ansa.] Bambae mi soem long yu. Hem i stap long Baebol long Sam 83:18. [Ridim.] Buklet ya i eksplenem olsem wanem blong wosip long God folem wil blong hem. Sipos yu wantem lanem moa long saed blong Jeova mo ol stampa tingting blong hem, i gud yu ridim buklet ya.” Givim buklet ya long man blong haos.
6 Wetem plante gudfala buklet blong yusum, yumi rili gat plante tul blong “talemaot gud nyus long ol kwaet man.”—Aes. 61:1.