Dipen Long Jeova Blong Mekem Trutok i Gru
1 “Hemia fastaem we mi kasem spesel glad ya blong givhan blong stanemap wan nyufala kongregesen. I tekem bitim tu yia blong hadwok, prea oltaem, mo fasin blong dipen long Jeova we hem i stap ‘mekem trutok i gru.’ ” Hemia wan leta blong wan gudfala paenia we i luksave se yumi nidim blong dipen long Jeova blong mekem trutok i gru. (1 Kor. 3:5-9) Taem yumi lukaot ol man we oli laekem ol samting long saed blong speret, yumi nidim tu we God i sapotem yumi, nao minista wok blong yumi i save karem frut.—Prov. 3:5, 6.
2 Mas Lukaotgud Long Sid Blong i Gru: Yumi mas lukaotgud long sid blong trutok blong i gru. Sipos yumi gobak wan no tu dei afta we yumi mitim wan man, plante taem fasin ya i karem gudfala frut. Yumi mas frengud wetem ol man mo soem kaen fasin. Mekem se oli no fraet blong toktok wetem yumi. Yumi no mas toktok tumas we yumi no givim jans long olgeta blong toktok. Halpem olgeta blong savegud yu, mo soem se yu yu intres long laef blong olgeta wanwan.
3 Long Julae mo Ogis, yumi stap seremaot ol defren buklet. Be, yumi nidim tu blong gobak long olgeta we oli soem intres mo we oli karem ol buklet ya. Ale, yumi mekem ol visit mo askem olgeta blong stadi Baebol wetem yumi. (Mat. 28:19, 20) Blong givhan long yumi blong statem ol stadi, yumi gat buklet ya Samting we God i Wantem. Maet yu faenem se ol advaes biaen bambae i givhan long yu.
4 Sipos yu bin toktok wetem wan man we i wari long ol problem long wol we oli stap kam moa nogud, maet yu save storeyan olsem:
◼ “Mi ting se yu yu wari olsem mi, long saed blong ol nogud fasin we oli stap kam antap long medel blong ol man. Yumi harem ol nogud nyus long saed blong raf fasin insaed long famle, we ol papa mama oli kilim nogud ol pikinini blong olgeta, ol pikinini oli mekem nogud long papa mama blong olgeta, mo ol hasban mo waef oli faet. Mo i luk olsem se plante man oli ting se fasin blong gyaman mo stil blong kasem samting we olgeta oli wantem, i olsem nating nomo, ?i tru? [Wet long ansa.] God i putumap sam rul blong man i folem long laef blong hem, mo oli no hevi tumas long yumi.” Ridim 1 Jon 5:3. Nao askem man blong haos blong karem buklet ya Samting we God i Wantem. Openem buklet i go long stadi 10. Ridim faswan haf. Soem ol tok we oli raetem long italik long stat blong haf 2-6, mo askem man blong haos weswan fasin hem i ting se i spolem laef blong ol man moa. Ridim haf we i joen wetem kwestin ya, mo wan no tu vas sipos i gat taem. Ridim haf 7, nao mekem plan blong gobak bakegen blong storeyan moa.
5 Taem yu gobak long olgeta we oli bin soem se oli intres long famle, yu save talem samting olsemia:
◼ “?I stret blong tingting se Man we i Wokem Yumi bambae i givim ol samting we yumi nidim blong wokem wan gudfala famle?” Wet long ansa. Soem buklet ya Samting We God i Wantem. Openem i go long stadi 8, mo eksplenem se hem i tokbaot ol rul blong Baebol we oli stret long evri memba blong famle. Talem se yu glad blong soem olsem wanem blong yusum buklet ya wetem Baebol blong i givhan long hem. Folem ol advaes we i stap long pej 2 blong buklet. Mekem plan blong gobak blong go moa long haf ya, no sipos yufala i finisim hem, stadi long wan narafala haf blong buklet ya we man blong haos i jusum.
6 Hemia wan rod blong askem stret long man blong haos blong stadi Baebol wetem yu. Soem buklet ya “Samting We God i Wantem,” mo se:
◼ “Buklet ya i soem wan gudfala kos blong stadi long olgeta stampa tijing blong Baebol. Long ol wanwan pej, bambae yu faenem ansa long ol kwestin we oli bin mekem tingting blong ol man i trabol blong plante handred yia. Wan long olgeta se, ?Wanem stampa tingting blong God long saed blong wol ya?” Openem buklet i go long stadi 5, mo ridim ol kwestin long stat blong stadi ya. Askem man blong haos weswan kwestin hem i intres moa long hem, nao ridim haf we i joen wetem kwestin ya, mo sam vas tu. Eksplenem se yumi save faenem ol gudfala ansa long ol narafala kwestin long semkaen isi fasin. Talem se yu glad blong kambak bakegen blong tokbaot wan narafala kwestin mo ansa.
7 Maet yu laekem moa blong yusum wan isi rod blong statem Baebol stadi. Yu save talem se:
◼ “?Yu yu save se sipos yu tekem jes sam menet nomo, yu save faenem ansa long wan impoten kwestin long Baebol? Eksampel, . . .” Nao askem wan kwestin we i stap long stat blong wan stadi long buklet, wan we yu ting se maet man ya i intres long hem. Sam kwestin we yu save yusum oli stap long haf 15 mo 16 long pepa we i stap insaed long Kingdom Wok Blong Yumi long Maj 1997, nem blong hem se: “Mekem Tingting i Strong Blong Visitim Ol Man Bakegen.”
8 Hadwok blong visitim ol man bakegen mo mekem Baebol stadi wetem olgeta long glad fasin, hem i samting we yumi mas mekem blong “joen wetem God blong mekem wok blong hem.” (1 Kor. 3:9) Taem yumi wokhad blong pulum ol man blong intres moa mo yumi dipen long Jeova blong mekem trutok i gru, yumi kasem trufala fasin blong haremgud we i no save kamaot long wan narafala wok.