Putum Ol Samting We Oli Moa Impoten Long Fasples
1 ?Wanem sam impoten samting we yumi nidim blong haremgud long saed blong speret? Sam long olgeta, hemia stadi wanwan, go long ol miting, prea oltaem, joen wetem ol gudfala fren, mo Kristin wok blong prij. Yumi no save stap strong long saed blong speret sipos yumi no putum ol impoten samting ya oli stap long fasples long laef blong yumi.
2 Be, yumi evriwan i stap faet agensem ol samting we bodi blong yumi i wantem, mo yumi evriwan i nidim fasin stretem. (Gal. 5:17) Yumi neva mas ting se sipos yumi ronem ol samting we yumi nomo i wantem, samting ya bambae i givhan moa long yumi. No gat. (Jer. 17:9) Taswe, blong lukaotgud long hat blong yumi mo blong no letem narafala i pulum yumi i go krangke, i impoten tumas we oltaem yumi luklukgud long laef blong yumi wanwan.—Prov. 4:23; 2 Kor. 13:5.
3 Jekemgud Hat Blong Yu: Yu save mekem samting ya sipos yu traem ansa long ol kwestin ya: ?Mi mi wantem tumas blong ridim Tok blong God? (1 Pita 2:2) ?Mi mi luksave se i impoten tumas blong go long olgeta miting blong kongregesen? (Hib. 10:24, 25) ?Mi mi stap prea oltaem? (Rom 12:12) ?Mi mi lukaot kampani blong ol man we oli laekem ol samting long saed blong speret? (Rom 1:11, 12) ?Mi mi harem se mi mas talemaot gud nyus? (1 Kor. 9:16) Sipos yu save ansa yes long ol kwestin ya, samting ya i soemaot se yu wantem putum ol samting we oli moa impoten oli stap long fasples.
4 Luklukgud Long Program Blong Yu Evri Dei: Afta we yu jekemgud ol samting we yu wantem long hat blong yu, yu mas makemaot ol samting we i impoten moa blong yusum taem blong yu long hem. Samting ya i minim se makemaot taem blong ridim Baebol, mo olgeta Wajtaoa mo Wekap! wetem taem blong mekemrere ol miting. Mo tu, yu mas makemaot taem blong stadi mo prea wetem famle blong yu. Putum wan mak long taem we yufala i yusum blong lukluk televisin no kompyuta. Yu mas gat strong tingting blong go long olgeta miting blong kongregesen, mo putum olgeta long fasples long program blong yu. Mekem plan blong ful famle i joen long wok blong prij evri wik.
5 I sua se, sipos yumi putum ol samting we oli moa impoten long fasples long laef blong yumi, bambae yumi kasem bigfala glad.